Mateyo 9
9
Jesu mbwaakashilika muntu uyuminite mubili
(Maako 2:1-12; Luka 5:17-26)
1Jesu wakenjila mubwaato akusubuka lweenge kushika kumushi kumishaabo. 2Mpeeke bantu bamwi bakatola musankwa wakalinga kuyuminite mubili kuli nguwe, kaalete pamacila. Jesu ndyaakabona lushomo lwabo, wakaambila wakalinga kuyuminite mubili ayi, “Kalika moyo ndaba, shibiibi shako shalekelelwa.”
3Mpeeke bamwi bafundishi ba Milawo bakalyaamboosha beene ayi, “Uyu muntu utoocobola Lesa.”
4Sombi Jesu wakeshiba ncebakalinga kuyeeya, lyalo wakaamba ayi, “Mutooyeeyelanshi shintu shibiibi mumyoyo yanu? 5Ino ncili cuubu kwaamba ayi, ‘Shibiibi shako shalekelelwa,’ nabi kwaamba ayi, ‘Nyamuka weende?’ 6Sombi ntooyanda kwaamba ayi mwishibe ayi MwanaaMuntu ulicite bulemu ankusu shakulekelela shibiibi pacishi ca panshi.” Mpomunyaawo wakaambila uyuminite mubili ayi, “Nyamuka, bwesa macila ako uye kumishaanu.” 7Mpomunyaawo wakanyamuka waya kumishaabo. 8Ono bantu boonse ndibakabona cakacitika, bakakankamana abuumbi akutalika kulumba Lesa wakapa bulemu ankusu sha mushobo uyu.
Jesu mbwaakeeta Mateyo
(Maako 2:13-17; Luka 5:27-32)
9Jesu ndyaakaswaako uko, wakabona musankwa umwi wiitwa ayi Mateyo kaashiite mukaanda ka musonko. Mpeeke Jesu wakamwaambila ayi, “Nkonkele!” Alakwe wakanyamuka, wamukonkela.
10Jesu ndyaakalinga kulya muŋanda yakwe Mateyo, beshikusonkesha baanji alimwi abantu batakonkeli Milawo yakwe Mose, bakalya pantu pomwi aJesu abashikwiiya bakwe. 11Ono baFalisi ndibakabona boobo, bakeepusha bashikwiiya bakwe Jesu ayi, “Ino mufundishi wanu utoolitanshi abeshikusonkesha alimwi abantu batakonkeli Milawo yakwe Mose?”#Luka 15:1-2 12Sombi Jesu ndyaakanyumfwa mwiipusho wabo, wakakumbula ayi, “Teshi bantu bayumu balangoola mushiliki, sombi balwashi beenka. 13Amuye mukeeye maswi akwe Lesa alya akwaamba ayi, ‘Ndisunishi nkumbu, kuteshi milambu.’ Nshikwe kwisa mukwiita baluleme, sombi bamucita shibi.”#Mate 12:7; Osi 6:6
Mwiipusho wa pakulikasha kulya
(Maako 2:18-22; Luka 5:33-39)
14Kuswawaawo, bashikwiiya bakwe Joni Mubombeki bakesa kuli Jesu akumwiipusha ayi, “Ceebonshi swebo alimwi abaFalisi tulalikasha kulya, sombi bashikwiiya banu tabalikashiiwo?”
15Jesu wakabakumbula ayi, “Sa babye shibwiinga inga balila shibwiinga kaacili abo? Sobwe! Sombi ciindi cilaakushika shibwiinga ndyeshi akakushikweewo pali mbabo. Paciindi ico ndyeshi bakalikashe kulya.
16“Taaku muntu utunga cimami ca nsalu ipya pacakufwala cikulukulu. Ceebo cimami ico mukukokonyana, nsalu ikulukulu ilakwamuka. Aboobo cilyango cilakomenenaako. 17Mbweeke ubo taaku muntu weenga wabika waini upya munkomwe sha shipaya shikulukulu. Mukwiinga nkomwe shilapasuka awalo waini ulatika ankomwe shilanyonyooka. Anu waini upya ulalongelwa munkomwe sha shipaya shipya, aboobo shoonse shobilo shilasungwa kabotu.”
Jesu mbwaakashilika mwaana mwanakashi amwanakashi wakacata cisani cakwe
(Maako 5:21-43; Luka 8:40-56)
18Jesu ndyaakalinga kucaamba, kwakesa mutanjilili umwi wa coonde ca baJuda, wafukama kunembo lyakwe akwaamba ayi, “Mwanaangu mwanakashi wafwabo onoono. Ntoomusenga kwaamba ayi mwise mubike maansaanu pali nguwe, lyalo utooba abuumi alimwi.” 19Lyalo Jesu wakanyamuka, abashikwiiya bakwe bakamukonkela.
20Ono umwi mwanakashi wakalinga kuciswa bulwashi bwa mukunko myaaka likumi ayobilo, wakesa kwisule lyakwe Jesu akucatabo kweela cisani cakwe. 21Mumoyo wakalinga kuyeeya ayi, “Na ncatebo cisani cakwe, ncakwiila ntooba kabotu.”
22Mpomunyaawo Jesu wakacebuka, ndyaakamubona wakamwaambila ayi, “Kalika moyo nankashi, lushomo lwako lwakupulusha kubulwashi.” Paciindi ceenka ico, mwanakashi uyo wakaba kabotu.
23Ono Jesu ndyaakashika kuŋanda ya mutanjilili, wakabona bantu beshikulisha mapeenga abantu baanji kabalila. 24Peenka wakabaambila ayi, “Amuswe ceebo mulindu uyu taafwite, uliletebo.” Sombi boonse bakamuweluluka. 25Ingayi bantu baswebo muŋanda, Jesu wakenjila akucata mulindu uyo palyaansa, mpeeke wakabuka. 26Impuwo iyi yakanyumfwika mucishi coonse ico.
Jesu mbwaakashilika boofu bobilo
27Jesu ndyaakaswaako uko, basankwa boofu bobilo bakamukonkela, kaboolobesha ayi, “NoBana babo baDefedi, amutunyumfwileko nkumbu!” 28Jesu ndyaakenjila muŋanda abalo boofu bakashika kuli nguwe. Lyalo wakabeepusha ayi, “Sa mutooshoma ayi ici inga ndacicita?” Abalo bakakumbula ayi, “Ee Nkambo.”
29Mpeeke Jesu wakakumya meenso abo akubaambila ayi, “Acicitike kuli ndimwe kweelana alushomo lwanu.” 30Mpomunyaawo bakatalika kubona. Lyalo Jesu wakabakonkomesha ayi, “Muteshibishi muntu nabi womwi cikani ici.” 31Sombi balo bakaya cilwiita bantu makani akacitika mucishi coonse ico.
Jesu mbwaakashilika cibuulu
32Ndibakalinga kuswaawo basankwa bobilo balya, bantu bamwi bakaleta muntu wakalinga kucite shikaswa wakalinga kumukasha kwaamba. 33Jesu ndyaakamukushamobo shikaswa, musankwa cibuulu uyo wakatalika kwaamba. Mpeeke bantu boonse bakakankamana akutalika kwaamba ayi, “Tacina kucitikawo kale ca mushobo wooyu muno muIsilaeli.”
34Sombi baFalisi bakaamba ayi, “Ngumwaami wa bashikaswa umupa nkusu shakubakusha.”#Mate 10:25; 12:24; Maako 3:22; Luka 11:15
Jesu mbwaakanyumfwila nkumbu bantu
35Jesu wakaya ceenda mumandabala oonse amumishi. Wakalinga kuya ciisha mushoonde sha baJuda akushimikila Makani Abotu a Bweene bwakwe Lesa alimwi akushilika malwashi apusenepusene.#Mate 4:23; Maako 1:39; Luka 4:44 36Ono ndyaakabona bantu baanji baanji, wakabanyumfwila nkumbu mukwiinga bakalinga kulemete akupenga anga nimbelele shitacite mweembeshi.#Shakube 27:17; 1 Baami 22:17; 2 Maka 18:16; Ese 34:5; Maako 6:34 37Mpeeke wakaambila bashikwiiya bakwe ayi, “Shakutebula shafula, sombi beshikutebula baceya. 38Aboobo amusenge Mwine muunda kwaamba ayi atume abamwi basebenshi beshikutebula.”#Luka 10:2
Currently Selected:
Mateyo 9: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
