Mateyo 10

Batumwi bakwe Jesu bali likumi abobilo

(Maako 3:13-19; Luka 6:12-16)

1Jesu wakabunganya bashikwiiya bakwe bali likumi abobilo, wabapa nkusu shakukusha bashikaswa alimwi akushilika malwashi apusenepusene. 2Meena abo ngaaya, Simoni wiitwa ayi Pita alimwi aAndulu mukwabo, Jemusi mwanaakwe Sebedi aJoni mukwabo, 3Filipo aBatolomeyo, Tomasi aMateyo shikusonkesha, Jemusi mwanaakwe Alufeyasi aTadeyasi, 4Simoni shikulwanina lwaanguluko alimwi aJudasi Isikalyoti uyo wakaaba Jesu.

Jesu mbwaakatuma bashikwiiya bakwe

(Maako 6:7-13; Luka 9:1-6)

5Jesu wakatuma bashikwiiya likumi abobilo abo akubalwiita ayi, “Mutayi mukwinjila mucishi ca baswamashi bakunsengwe nabi mundabala ya bene Samaliya. 6Sombi mulyeelete kuya kubene Isilaeli bali anga nimbelele shisowekete. 7Kamuya mukashimikile ayi, ‘Bweene bwa kwiculu buli pafwaafwi.’ 8Mukashilike balwashi, mukabushe bafu, akushilika bashimanata, alimwi akukusha bashikaswa. Mwapekwabo, amwebo mukapebo. 9Mutabwesi maali a golodi, a silifa nabi a mukuba mumpotomona shanu. 10Mutanyamuni coola nabi kunyamuna cakufwala ca peculu acimwi, nsapato nabi nkoli ceebo musebenshi ulyeelete kulita pancito yakwe.#1 Koli 9:14; 1 Timo 5:18

11“Ono na mwashika mundabala nabi mumushi uli woonse, mulyeelete kuyandoola muntu weenga wamutambula. Mukekaale kuli nguwe kushikila mukasweemo umo. 12Pakwinjila muŋanda mukaambe ayi, ‘Luumuno lube amwebo.’ 13Lyalo na bantu bali muŋanda iyo bamutambula, luumuno lwanu lukabe ambabo. Sombi na babula kumutambula, mukasweemo aluumuno lwanu. 14Na kwabula muntu nabi womwi weenga wamutambula nabi kukutika maswi anu, pakuswaamo mukalipaampe lusuko kushimpanta.#Mili 13:51 15Ntoomulwiita calushinisho ayi pabushiku bwakoomboloshekwa, Lesa ulaakupa ndabala iyo mulandu unene kwiinda Sodoma aGomola!#Mate 11:24; Mata 19:24-28#Luka 10:4-12

Mapensho atoosa

(Maako 13:9-13; Luka 21:12-17)

16“Amubone, ntoomutuma anga nimbelele pakati kabaumpe, aboobo amucenjelele anga ninsoka akulibombya anga nimpolobe.#Luka 10:3 17Mukabacenjelele bantu ceebo balaakumutola munkuta akumukwiipa mushoonde shabo. 18Balaakumutola kubaleli abamaami ceebo ca liina lyangu, kwaamba ayi mukape bukamboni pameenso abo alimwi akubaswamashi bakunsengwe. 19Ono na bakamwaange, mutakalisukami ayi, ‘Ino tukaambe buyani?’ nabi ayi, ‘Tukaambenshi?’ mukwiinga Lesa ulaakumupa nceshi mukaambe. 20Ceebo teshi ndimwe mweshi mukanokwaamba, sombi Mushimu wakwe Ishiwanu uli kwiculu ngweshi ukabe muli ndimwe.#Maako 13:9-11; Luka 12:11-12; 21:12-15

21“Muntu ulaakubenga mukwabo wa lifumo lyomwi ayi acaikwe, abalo bamaishiwabo balaakubenga bana babo. Abalo baana balaakubukila bamashali babo, akubacaisha.#Maako 13:12 22Bantu boonse balaakumupata ceebo ca ndime. Sombi uyo eshi akayuminine kushikila kumamanino a mapensho aya, ulaakupulushikwa.#Mate 24:9; Maako 13:13; Luka 21:17; Mate 24:13; Maako 13:13 23Na bakamupenshe mundabala imwi, mukacicile kundabala imwi. Ntoomwaambila calushinisho ayi kamutana kumanisha mandabala oonse a muIsilaeli, MwanaaMuntu ulaakwisa.

24“Taaku muntu utokwiiya wiinda mufundishi wakwe alimwi taaku musebenshi wiinda mwaami wakwe.#Luka 6:40; Joni 13:16; 15:20 25Anu uyo utokwiiya ulyeelete kuba bweenka mbuli mufundishi wakwe, alakwe musebenshi ulyeelete kuba mbuli mwaami wakwe. Ino na mwine ŋanda uleetwa ayi Bilusebulu, balo bekala muŋanda umo balaakweela kuli meena kubica?#Mate 9:34; 12:24; Maako 3:22; Luka 11:15

Weelete kuloondwa

(Luka 12:2-7)

26“Aboobo mutaloondi bantu. Taaku cintu cifweketwe ceshi cikabule kufwekulwa, nabi cishisitwe ceshi cikabule kushibikwa.#Maako 4:22; Luka 8:17 27Isho nshentoomulwiita mumunshinshe mukashaambe lumwi lubala, asheesho nshemunyumfwa kumapela mukashaambile pameenso a bantu. 28Mutaloondi baabo bacayabo mubili, sombi tabacikoonshi kucaya muuya. Amuloonde Lesa ukonsha kucaya mubili amuuya woonse mumulilo utamaani. 29Sa te tuntiinga tobilo tuloolwa lyaali lyomwi? Sombi taaku kanga ntiinga nabi komwi nkeenga kalokela panshi kwakuteshiba Ishiwanu. 30Sombi mwebo amisusu ya mumitwi yanu yoonse ilibelengetwe. 31Paceebo ceeco mutaloondi mukwiinga mwebo mulayandika kwiinda tuntiinga tuunji.

Shakusumina Jesu

(Luka 12:8-9)

32“Uyo woonse weenga wansumina pameenso a bantu, anebo ndaakumusumina kuli baTa bali kwiculu. 33Sombi uyo weenga wankaka pameenso a bantu, anebo ndaakumukaka kuli baTa bali kwiculu.

Bantu balaakupansaana ceebo cakwe Jesu

(Luka 12:51-53; 14:26-27)

34“Mutayeeyi ayi ndakesa mukuleta luumuno mucishi ca panshi. Nshikwe kuleta luumuno, sombi nkondo. 35Mukwiinga nebo ndakesa mukupansaanya mwaana musankwa abaishi, mwaana mwanakashi abanyina, alakwe mulokashi abapongoshi bakwe banakashi. 36Ono nkokwaamba ayi balwani ba muntu balaakuba baabo beenka mbwaakalaabo paŋanda.#Mika 7:6

37“Uyo woonse usuni baishi nabi banyina kwiinda ndime, taaelete kuba shikwiiya wangu. Uyo woonse usuni mwanaakwe musankwa nabi mwanakashi kwiinda ndime, taaelete kuba waangu. 38Uyo woonse utanyamuni mapensho akwe anga ngumucilingano akunkonkela, taaelete kuba waangu.#Mate 16:24; Maako 8:34; Luka 9:23 39Uyo woonse usunishi buumi bwakwe ulaakubusowa, sombi uyo usowa buumi bwakwe ceebo ca ndime, ulaakubucana.#Mate 16:25; Maako 8:35; Luka 9:24; 17:33; Joni 12:25

Shilambu

(Maako 9:41)

40“Uyo woonse utambula ndimwe, ulatambula ndime alimwi uyo utambula ndime, ulatambula baTa abo bakantuma.#Luka 10:16; Joni 13:20; Maako 9:17; Luka 9:48 41Uyo woonse utambula mulaluki wakwe Lesa ayi mukwiinga watumwa aLesa, alakwe ulaakutambula cilambu ca mutumwi. Uyo woonse utambula muntu ululeme ayi ceebo uliluleme, ulaakutambula cilambu ca bululami. 42Uyo woonse upa nabi maanshi kuli womwi muniini wa baabo bankonkela, ayi mukwiinga ulankonkela, ncakwiila uyo teshi akabule cilambu.”

Currently Selected:

Mateyo 10: BBBLI

Highlight

Copy