Mateyo 11
11
Joni Mubombeki wakatuma bashikwiiya bakwe kuli Jesu
(Luka 7:18-35)
1Jesu ndyaakamana kwiisha bashikwiiya bakwe bali likumi abobilo, wakaswaako uko akuya bwiisha akushimikila mumandabala. 2Ono Joni Mubombeki ndyaakalinga muntolongo, wakanyumfwa shamilimo yakwe Klistu, wakatuma bashikwiiya bakwe bamwi kuli Jesu 3mukwiipusha ayi, “Sa ndimwe baabo mbwaakaamba Joni ayi balaakwisa nabi tunoocilangila umwi?”
4Jesu wakabakumbula ayi, “Kamuya mukalwiite Joni isho nshemwanyumfwa akubona, 5boofu batoolasha, balema myeendo batokweenda, beshimanata batooba kabotu, bashinkite matwi batoonyumfwa, bafu batoobushikwa alimwi bakandu batooshimikilwa Makani Abotu.#Isa 35:5-6; Isa 61:1 6Ulicite coolwe muntu uyo utatonshi muli ndime.”
7Ono bashikwiiya bakwe Joni ndibakaya, Jesu wakatalika kwaambila bantu baanji baanji bakalingaawo shakwe Joni Mubombeki ayi, “Ndimwakaya muluyanga mwakaya mukubonanshi? Sa mwakaya mukubona litete lyakalinga kutenkaana kumuuwo? 8Ino nciinshi ncemwakaya mukubona? Sa ngumuntu wakalinga kufwete shakufwala shibotu? Tau, bafwala shakufwala shibotu balekala mumaanda a bamaami. 9Amundwiite, nciinshi ncemwakaya mukubona? Sa ngumulaluki? Ee, ntoomulwiita calushinisho ayi ngumunene kwiinda pamulaluki. 10Mukwiinga Joni ngowooyo wakaambwa muMalembo akwe Lesa ayi, ‘Ndaakutuma muntu wangu kunembo lyako eshi akakubambile nshila.’#Mala 3:1 11Ntoomwaambila calushinisho ayi Joni ngumunene kwiinda pabantu boonse kuswabo kale kale. Sombi uyo muniini muBweene bwa kwiculu ngumunene kwiinda nguwe. 12Kuswa kuciindi cakwe Joni Mubombeki, kushikila sunu, Bweene bwa kwiculu bwashika cankusu, abalo beshishitaala batokweelesha kubutola mushitaala. 13Mukwiinga kwiisha kwa balaluki bakulukulu alimwi aMilawo yakwe Mose, shoonse shakalinga kwaamba paBweene kushikila Joni ndyaakesa.#Luka 16:16 14Aboobo na kamusuni kushoma maswi abo, Joni ngoElija uyo wakaambwa ayi ulaakwisa.#Mala 4:5; Mate 17:10-13; Maako 9:11-13 15Uyo ucite matwi anyumfwe!
16“Anu bantu ba cecino ciindi inga ndabakoshanisha anshi? Bali anga mbanike bashiite pamushika kaboolobeshanya ayi, 17‘Twakamulishisha ngoma, sombi mwebo tamukwe kushana. Twakamwiimbila nyimbo sha buumba, sombi mwebo tamukwe kulila.’ 18Joni Mubombeki wakalinga kulikasha kulya alimwi taakalinga kunwa, sombi bantu bakaamba ayi, ‘Ulicite shikaswa.’ 19Ono MwanaaMuntu ndyaakesa kaalya akunwa, bantu bakaamba ayi, ‘Amubone ngumulyabi, ngucakolwa, ngushicibusa abeshikusonkesha alimwi abamucita shibi.’ Sombi busongo bwakwe Lesa bulaboneka ayi buliluleme kwiinda mumilimo ya mbubo.”
Mapensho kumandabala atakwe kushoma
(Luka 10:13-15)
20Mpomunyaawo Jesu wakatalika kukalalila bantu ba mumandabala umo mwaakacitila shaankamiko, mukwiinga tabakwe kusanduka kuswa kushibiibi. 21Wakabaambila ayi, “Mapensho kuli ndimwe nomandabala a Kolasini aBetisaida, mukwiinga shaankamiko isho shakacitilwa muli ndimwe, neshakacitilwa muTaya aSidoni, mandabala anene a bantu bakunsengwe, naakwiinga bakasanduka kale kuswa kushibiibi akufwala masaka alimwi akulinanika milota, kutondesha ayi balyuungumene ceebo cakubisha.#Isa 23:1-18; Ese 26:1—28:26; Jowe 3:4-8; Amo 1:9-10; Seka 9:2-4 22Ntoomwaambila calushinisho ayi pabushiku bwakoomboloshekwa Lesa ulaakumupa mulandu unene kwiinda Taya aSidoni! 23Awebo Kapenaumu, sa utooyeeya ayi ulaakusumpwitwa kwiculu? Sobwe, ulaakuwaalwa panshi pamusena wa bafu! Mukwiinga shaankamiko isho naakwiinga shakacitilwa muSodoma, naakwiinga ndabala iyi keeciliiwo asunu.#Isa 14:13-15; Mata 19:24-28 24Sombi ntookulwiita ayi pabushiku bwa koomboloshekwa, Lesa ulaakumupa mulandu unene kwiinda Sodoma!”#Mate 10:15; Luka 10:12
Muli Jesu momuli kookesha
(Luka 10:21-22)
25Paciindi ceenka ico Jesu wakapaila ayi, “Ndamulumba Ta, noBaami ba kwiculu acishi ca panshi mukwiinga mwayubulwita bantu bateeite shintu nshemwakashisa kubantu basongo abeeite. 26Ncakwiila Ta, mwebo mwakacita kweelana akuyanda kwanu.
27“BaTa bakabika shintu shoonse mumaansaangu. Taaku muntu ushi Mwaana, sombi baTa beenka. Taaku muntu ushi baTa, sombi Mwaana eenka alimwi awooyo Mwaana ngwaasala ayi ayubulwite.#Joni 3:35; Joni 1:18; 10:15
28“Amwise kuli ndime mwebo noonse nomushiite, nomwalemenwa, nebo ntoomupa kookesha. 29Amulipatike lijoko lyangu, mwiiye kuli ndime ceebo nebo ndimoote alimwi ndimubombu mumoyo. Paceebo ceeco, mulaakucana kookesha mumyoyo yanu.#Jele 6:16 30Mukwiinga lijoko lyangu ndyuubu alimwi amukuli wangu nguniini.”
Currently Selected:
Mateyo 11: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
