Mateyo 5

Jesu mbwaakashimikila pakalundu

1Ono Jesu ndyaakabona bantu baanji baanji, wakatanta pakalundu akwikala panshi. Bashikwiiya bakwe abalo bakaya peenka mpaakalinga.

Bantu bacite coolwe

(Luka 6:20-23)

2Lyalo wakatalika kubeeisha ayi,

3“Balicite coolwe abo bakandu mumushimu

mukwiinga Bweene bwa kwiculu mbwabo.

4“Balicite coolwe abo balila,

mukwiinga Lesa ulaakubasangalasha.#Isa 61:2

5“Balicite coolwe abo balibombya,

mukwiinga Lesa ulaakubapa cishi ncaakabashomesha.#Kulu 37:11

6“Balicite coolwe abo bacite nsala anyotwa ya bululami,

mukwiinga Lesa ulaakubapa anshebabula shoonse.#Isa 55:1-2

7“Balicite coolwe abo balekelela babyaabo,

mukwiinga Lesa ulaakubalekelela abalo.

8“Balicite coolwe abo basalalite mumyoyo,

mukwiinga balaakubona Lesa.#Kulu 24:3-4

9“Balicite coolwe abo baleta lunyumfwano,

mukwiinga balaakwiitwa ayi mbana bakwe Lesa.

10“Balicite coolwe abo bapenshekwa

ceebo balacita kuyanda kwakwe Lesa,

mukwiinga Bweene bwa kwiculu mbwabo.

11“Mulicite coolwe na bantu kabamutukana, kabamupensha alimwi akumubekesha shikani shibiibi ceebo ca ndime.#1 Pita 4:14 12Amusangalale akukondwa mukwiinga cilambu canu ncinene kwiculu. Mbweeke ubo bantu mbobakapensha balaluki bakalingaako kale kale.#2 Maka 36:16; Mili 7:52

Jesu mbwaakaamba shamwiinyo amumuni

(Maako 9:50; Luka 14:34-35)

13“Mwebo ndimwe mwiinyo wa cishi, sombi na mwiinyo wasambalala, inga mwacita buyani kwaamba ayi ube kabotu alimwi? Taucite ncito, nkuusowabo abantu kabalyatolaawo.#Maako 9:50; Luka 14:34-35

14“Mwebo ndimwe mumuni wa cishi. Ndabala inene iyakitwe pakalundu taikoonshi kushisikwa.#Joni 8:12; 9:5 15Ncakwiila na bantu bamunika lilampi tabafwekiwo nongo, sombi balalibika patuba kwaamba ayi limunikile boonse bali muŋanda.#Maako 4:21; Luka 8:16; 11:33 16Mbweeke ubo amwebo amuboneshe mumuni wanu kubantu, kwaamba ayi babone milimo yanu ibotu, akupa bulemu kuli Ishiwanu wa kwiculu.#1 Pita 2:12

Kwiisha shaMilawo

17“Mutayeeyi ayi ndakesa mukumanisha Milawo yakwe Mose nabi kwiisha kwa balaluki bakulukulu. Nshikwe kwisa mukushimanisha, sombi kucita kweelana ashilembetwe. 18Ntoomulwiita calushinisho ayi kushikila liculu acishi shikamaane, taaku libala liniini lya Milawo lyeshi likapusanishikwe tibili shoonse shikacitike.#Luka 16:17 19Paceebo ceeco, uyo woonse usotoka mulawo uniini nabi womwi, akwiisha bantu kunocita bweenka ubo, ulaakuba muniini muBweene bwakwe Lesa. Sombi uyo ukonkela Milawo akwiishako bamwi ulaakuba munene muBweene bwa kwiculu. 20Aboobo ntoomwaambila ayi sombibo na bululami bwanu buleenda boobo bwa bafundishi ba Milawo abaFalisi, teshi mukenjile muBweene bwa kwiculu.

Kwiisha shakukalala

21“Mwakanyumfwaawo bakulukulu mbobakalwiitikwa ayi, ‘Utacayi, mukwiinga uyo woonse ucaya mubye ulyeelete koomboloshekwa.’#Kulo 20:13; Duto 5:17 22Sombi nebo ntoomulwiita ayi uyo woonse ucitile mfundilishi mubye, ulyeelete koomboloshekwa. Awooyo waambila mubye ayi, ‘Taaku mboobete!’ ulyeelete koomboloshekwa munkuta inene. Sombi uyo waamba ayi, ‘Webo omuluya!’ ulyeelete wawaalwa mumulilo utamaani. 23Aboobo, na utoopa cipo pacipaililo, ono weebaluka ayi kuli ncewakabishisha mukwanu, 24shiya cipo cako kunembo lya cipaililo, utaangune uye unyumfwanaakwe, ndyeenga waboola kwisa mukupa cipo cako.

25“Ulyeelete kufwambaana kunyumfwana ashimilandunyoko kamuciya kunkuta. Mukwiinga inga waakukutola mumaansa amoomboloshi, alakwe moomboloshi wakutola mumaansa amushilikaani, lakwe inga waakukubika muntolongo. 26Ntoomulwiita calushinisho ayi teshi ukasweemo umo, kushikila ukalipile shoonse shiyandika.

Kwiisha shabulale

27“Mwakanyumfwaawo bakulukulu mbobakalwiitikwa ayi, ‘Utaciti bulale.’#Kulo 20:14; Duto 5:18 28Sombi nebo ntoomulwiita ayi uyo woonse ulangilisha mwanakashi calunkumbwa, wacita kale bulale anguwe mumoyo. 29Ono na liinso lyako lyakululyo lyakulengesha ayi ubishe, ncibotu kulilobolaamo akulisowa. Mukwiinga ncibotu kusowekelwa cipansha ca mubili, kwiinda kwaamba ayi mubili woonse ukawaalwe mumulilo utamaani.#Mate 18:9; Maako 9:47 30Na lyaansa lyako lyalulyo lyakulengesha ayi ubishe, ncibotu kulitimbulaako akulisowa. Mukwiinga ncibotu kusowekelwa cipansha ca mubili, kwiinda kwaamba ayi mubili woonse ukawaalwe mumulilo utamaani.#Mate 18:8; Maako 9:43

Kwiisha shakulekana

(Mate 19:9; Maako 10:11-12; Luka 16:18)

31“Kwakaambwa alimwi ayi, ‘Uyo woonse uleka mukaakwe ulyeelete kumupa nkalata yakwishibisha ayi balekana.’#Duto 24:1-4; Mate 19:7; Maako 10:4 32Sombi nebo ntoomulwiita ayi uyo woonse uleka mukaakwe, utakwe kucita bulale, utoomulengesha kucita bulale na weebwa. Alakwe uyo weeba mwanakashi wakalekwa, wacita bulale.#Mate 19:9; Maako 10:11-12; Luka 16:18; 1 Koli 7:10-11

Kwiisha shakulumbila

33“Mwakanyumfwa alimwi mbobakaambilwa bakulukulu ayi, ‘Utalumbili cakubeca, sombi ucite kweelana ambowalumbila kuMwaami Lesa, Lesa wako.’#Bene Lefi 19:12; Shakube 30:2; Duto 23:21 34Sombi nebo ntoomulwiita ayi muteeleshi kulumbila napaceyi nakubi kulumbila ayi, ‘Kwiculu’ mukwiinga ncecuuna cakwe Lesa,#Jemu 5:12; Isa 66:1; Mate 23:22 35nabi kulumbila ayi, ‘Panshibo!’ mukwiinga mpaalyata Lesa. Utalumbili alimwi ayi, ‘KuJelusalemu!’ ceebo njendabala inene ya Mwaami Munene.#Isa 66:1; Kulu 48:2 36Muteeleshi nabi kulumbila ayi, ‘Mutwi wangu’ ceebo tamukoonshi kusandula mususu womwi ayi utube nabi kushiya. 37Mwebo amweelebo pakwaamba ayi, ‘Ee’ nabi ‘Sobwe’ mukwiinga na ceenda waawa, ingayi cilaswa kuli Satana.

Bubi tabeelanishi

(Luka 6:29-30)

38“Mwakanyumfwaawo bakulukulu mbobakalwiitikwa ayi, ‘Na muntu wakutulula liinso, awebo mutulule liinso, na ndiino ndyaakusokola, awebo musokole liino.’#Kulo 21:24; Bene Lefi 24:20; Duto 19:21 39Sombi nebo ntoomulwiita ayi bubi tabeelanishi. Na umwi wakuuma kulicili lyakululyo, piluluka akuume akucipiko. 40Na umwi utooyanda kukupa mulandu, ono wakunyaya mwinjila, utamukaashi, sombi mupe acakufwala ca peculu. 41Na umwi muntu wakukakatisha kuyaakwe mushinso ulaampa mailo yomwi, anu yaakwe mushinso wa mamailo obilo. 42Aba cintu kumuntu woonse wakusenga alimwi uyo utooyanda kubweleka utamwiimi.

Kusuna balwani bako

(Luka 6:27-28, 32-36)

43“Mwakanyumfwawo bakulukulu mbobakalwiitikwa ayi, ‘Usune mubyo, sombi upate mulwani wako.’ 44Sombi nebo ntoomulwiita ayi, ‘Amusune balwani banu akubapaililaako abo bamupensha, 45kwaamba ayi mube baana ba Ishiwanu uli kwiculu.’ Ceebo lakwe lisuba lyakwe lilaswa, lumwi lulabala pabamucita shibi abali kabotu, akuloshesha mfula baluleme abataluleme boonse. 46Ono na kamusunibo bantu abo bamusuni, nkokwaamba ayi ncilambunshi nceenga mwatambula? Te abalo beshikusonkesha musonko balacita ubo? 47Mwebo na kamwanshabo bamakwabanu, ingayi mutoocitanshi ico ciinda babyaanu bamwi? Sa te bakunsengwe balacita ubo? 48Anu mwebo mulyeelete kuba bantu basalalite, bweenka bubete Ishiwanu uli kwiculu.#Bene Lefi 19:2; Duto 18:13

Currently Selected:

Mateyo 5: BBBLI

Highlight

Copy