Mateyo 4

Jesu mbwaakasunkwa aSatana

(Maako 1:12-13; Luka 4:1-13)

1Lyalo Jesu wakatanjililwa aMushimu Usalashi kuya muluyanga ayi akasunkwe aMubiibi.#Ebulu 2:18; 4:15 2Ndyaakamana kulikasha kulya kwa nshiku makumi one, malumwi amashiku, Jesu wakanyumfwa nsala. 3Ono alakwe Mubiibi shikusunka wakesa akumwaambila ayi, “Na uli Mwanaakwe Lesa, ambila mabwe aya asanduke cakulya.”

4Sombi Jesu wakakumbula ayi, “Cililembetwe muMalembo akwe Lesa ayi, ‘Muntu taabi abuumi mukulyabo kweenka, sombi ulaba abuumi amaswi oonse aswa kuli Lesa.’ ”#Duto 8:3

5Kuswawaawo Mubiibi uyo wakatola Jesu kuJelusalemu, ndabala inene isalalite, akumubika pakansunswa ka ciluli ca Ŋanda yakwe Lesa. 6Mpeeke wakaambila Jesu ayi, “Na uli Mwanaakwe Lesa, liwaale panshi, mukwiinga cililembetwe muMalembo akwe Lesa ayi, ‘Lesa ulaakutuma baanjelo bakwe ayi bakakubaake,’ alimwi ayi, ‘Balaakukubaka kwaamba ayi utacisi cimpanta cako kulibwe.’ ”#Kulu 91:11-12

7Mpeeke Jesu wakamukumbula ayi, “Sombi Malembo akwe Lesa alaamba alimwi ayi, ‘Utasunki Mwaami Lesa wako.’ ”#Duto 6:16

8Kuswawaawo Mubiibi uyo wakatola Jesu kukalundu kalaamfu abuumbi. Wakamubonesha malelo oonse a mucishi ca panshi abubotu bwa ngawo, 9akumwaambila ayi, “Inga ndakupa malelo oonse aya na wafukama akunambila.”

10Lyalo Jesu wakamwaambila ayi, “Swaawo apa Satana! Ceebo kulilembetwe ayi, ‘Ulyeelete kulambila Mwaami Lesa, Lesa wako alimwi akusebenselabo nguwe.’ ”#Duto 6:13

11Mpomunyaawo Mubiibi wakaswaawo, lyalo baanjelo bakesa batabatila Jesu.

Jesu mbwaakatalika milimo yakwe muGalili

(Maako 1:14-15; Luka 4:14-15)

12Ono Jesu ndyaakanyumfwa ayi Joni bakamubika muntolongo, wakaya mukwikala mucishi ca Galili.#Mate 14:3; Maako 6:17; Luka 3:19-20 13Wakashiya ndabala ya Nasaleti akuya mukwikala mundabala ya Kapenaumu, yakalinga muloombe lwa lweenge mushishi sha Sebuluni aNafutali.#Joni 2:12 14Shakacitika kweelana ambwaakaamba mulaluki mukulukulu Isaya ayi,

15“Ocishi ca Sebuluni acishi ca Nafutali,

kuya kulweenge, akwitala lya Joodani,

webo Galili ocishi ca baswamashi bakunsengwe!

16Bantu bakalinga kwikala mumunshinshe

bakabona mumuni unene.

Abalo abo bakalinga kwikala mucishi ca cimfule ca lufu,

mumuni ulaakubamunikila.”#Isa 9:1-2

17Kuswawaawo Jesu wakatalika kushimikila, kaamba ayi, “Amusanduke kuswa kushibiibi shanu mukwiinga Bweene bwakwe Lesa buli pafwaafwi!”#Mate 3:2

Jesu mbwaakeeta beshikucaya nswi bone

(Maako 1:16-20; Luka 5:1-11)

18Ono Jesu ndyaakalinga kuya bweenda muloombe lwa Lweenge lwa Galili, wakabona Simoni wiitwa ayi Pita aAndulu mwanike wakwe, kabawaala koombe mumaanshi ceebo bakalinga beshikucaya nswi. 19Jesu wakabaambila ayi, “Amunkonkele, ndaakumupa nkusu shakuleta bantu kuli ndime bweenka mbomwalinga kucata nswi.” 20Amanebo kwaamba boobo, bakashiya toombe twabo akumukonkela.

21Ndyaakeendakobo paniini, wakabona Jemusi aJoni mwanike wakwe, bana bakwe Sebedi, kabali mubwaato aishiwabo kababamba toombe twabo. Jesu wakabeeta, 22abalo mukutacelwa bakashiya bwaato aishiwabo, bamukonkela.

Jesu mbwaakeeisha akushimikila alimwi akushilika

(Luka 6:17-19)

23Jesu wakeenda mucishi coonse ca Galili kuya ciisha mushoonde sha baJuda, akushimikila Makani Abotu a Bweene bwa kwiculu alimwi akuya cishilika malwashi apusenepusene.#Mate 9:35; Maako 1:39 24Aboobo impuwo yakushilika kwakwe yakanyumfwika mucishi coonse ca Silya. Mpeeke bantu bakatalika kutola balwashi baanji kuli nguwe abo bakalinga kuciswa cankusu, bakalinga kucite bashikaswa, beshitushita alimwi abayuminite mibili. Alakwe Jesu wakabashilika boonse. 25Lyalo bantu baanji baanji bakamukonkela kuswa kuGalili akuMandabala ali Likumi, kuJelusalemu akuJudeya alimwi akwitala lya Joodani.

Currently Selected:

Mateyo 4: BBBLI

Highlight

Copy