Mateyo 3

Kushimikila kwakwe Joni Mubombeki

(Maako 1:1-8; Luka 3:1-18; Joni 1:19-28)

1Munshiku sheenka isho Joni Mubombeki wakesa muluyanga lwa muJudeya kaashimikila ayi, 2“Amusanduke kuswa kushibiibi shanu mukwiinga Bweene bwakwe Lesa buli pafwaafwi.”#Mate 4:17; Maako 1:15 3Isaya mulaluki mukulukulu wakalinga kwaamba Joni, ndyaakaamba ayi,

“Muntu umwi utokoolobesha muluyanga ayi,

‘Amubambe nshila ya Mwaami.

Amumululikile nshila.’ ”#Isa 40:3

4Joni wakalinga kufwala shakufwala shakapangwa abooya bwa ngamela alimwi alaamba wacipaya mubukome. Wakalinga kulyabo nsoshi abuuci.#2 Baami 1:8 5Bantu bakaya kuli nguwe kuswa kuJelusalemu, mucishi coonse ca Judeya alimwi amishi yoonse ishingulukite Mulonga wa Joodani. 6Ndibakamana kulyaambilila shibiibi shabo, wakababombeka muMulonga wa Joodani.

7Ono Joni ndyaakabona baFalisi abaSaduki baanji kabesa kuli nguwe mukubombekwa, wakabaambila ayi, “Nobana ba nsoka mwebo! Ngani wamucenjesha kuloonda bukali bwakwe Lesa butoosa?#Mate 12:34; 23:34 8Amucite ncito shibotu shitondesha ayi mwasanduka kuswa kushibiibi shanu. 9Mutanoolibeca mumyoyo yanu ayi, ‘Swebo tulicite Abulaamu ishiwesu.’ Ntoomulwiita calushinisho ayi Lesa ulakonsha kusandula mabwe kuba bamulunyungu lwakwe Abulaamu.#Joni 8:33 10Bulya keembe kakutimbwishako shisamu kumiyanda kalibambitwe kale. Aboobo, cisamu coonse citacati shisepo shibotu, cilaakutemwa akuwaalwa mumulilo.#Mate 7:19 11Nebo ntoomubombeka amaanshi kutondesha kwaamba ayi mwasanduka kuswa kushibiibi, sombi uyo utoosa pesule lyangu uleendaawo nkusu pali ndime. Nsheeleteewo akunyamuna nsapato shakwe. Uyo lakwe ulaakumubombeka aMushimu Usalashi alimwi amulilo. 12Lakwe ulicite kale acakuululushishako maila. Ulaakululusha maila akwe akwaalongela mubutala. Lyalo ulaakutenta buungu boonse mumulilo utashimiki.”

Kubombekwa kwakwe Jesu

(Maako 1:9-11; Luka 3:21-22)

13Paciindi ico, Jesu wakaswa kucishi ca Galili akushika kuMulonga wa Joodani, uko kwakalinga Joni ayi abombekwe. 14Sombi Joni wakalinga kusuni kumukakila. Wakamwaambila ayi, “Nebo ndime njelete kubombekwa amwebo, ono mwesa buyani kuli ndime?”

15Sombi Jesu wakamukumbula ayi, “Paciindi cino cita bweenka ubo. Na tucite boobo, nkokwaamba ayi tutoocita kuyanda kwakwe Lesa.” Mpeeke Joni alakwe wakasumina.

16Jesu ndyaakamanabo kubombekwa wakaswa mumaanshi. Mpomunyaawo liculu lyakacaluka, lyalo wakabona Mushimu wakwe Lesa kauselukila pali nguwe anga nimpolobe. 17Mpeeke liswi lyakanyumfwika kuswa kwiculu ayi, “Uyu ngoMwanaangu ngoonsuni. Pali nguwe ndikondetwe abuumbi.”#Mata 22:2; Kulu 2:7; Isa 42:1; Mate 12:1; 17:5; Maako 1:11; Luka 9:35

Currently Selected:

Mateyo 3: BBBLI

Highlight

Copy