Mateyo 16

BaFalisi mbobakasenga citondesho ca kuswa kwiculu

(Maako 8:11-13; Luka 12:54-56)

1BaFalisi abaSaduki bamwi bakaya kuli Jesu mukumusunka. Bakamusenga ayi ababoneshe citondesho cakuswa kwiculu, kwaamba ayi bashome ayi Lesa ngowakamutuma.#Mate 12:38; Luka 11:16 2Sombi Jesu wakabakumbula ayi, “Na lisuba lyepila, mwebo mulaamba ayi, ‘Bulaakuca kabotu ciilo ceebo kwiculu kwasalala.’ 3Alyalo macuunsa mulaamba ayi, ‘Sunu mfula itooloka mukwiinga kuli makumbi ashiya.’ Mulishi kusansulula mbokuboneka kwiculu, sombi mulaalilwa kusansulula shitondesho sha shintu isho shitoocitika. 4Bantu ba cecino ciindi, bamucita shibi, batashomeki kuli Lesa balisuni citondesho. Ono taaku nceshi batondeshekwe, sombibo citondesho cakwe Jona.” Lyalo wakabashiya waswaawo.#Mate 12:39; Luka 11:29

Cimena ca baFalisi abaSaduki

(Maako 8:14-21)

5Ono bashikwiiya bakwe ndibakasubukila kwitala lya lweenge, bakalubaako kuyumuna shinkwa. 6Jesu wakabaambila ayi, “Amucenjele acimena ca baFalisi abaSaduki.”#Luka 12:1

7Mpomunyaawo bashikwiiya bakatalika kwaamba ayi, “Ncaambila boobo ceebo tatukwe kuyumuna shinkwa.” 8Sombi Jesu wakeshiba ncebakalinga kwaamba, peenka wakabeepusha ayi, “Ceebonshi mutokwaamba pacikani cakubula shinkwa? Kuceya lushomo ndomucite mwebo nobantu! 9Sa abobulya tamunyumfwishi? Sa tamwiibaluki ndindakakomoona shinkwa wosanwe ayi bantu bali shuulu shosanwe balye? Ino mwakesusha tutundu tongaye twa shinkwa ngobakashiyaako?#Mate 14:17-21 10Nabi mushinkwa wosanwe awobilo ngundakapa bantu bali shuulu shone, mwakesusha tutundu tongaye twa sheesho nshebakashiyaako?#Mate 15:34-38 11Ino tamuna kwishibilanshi ayi nshindalinga kumwaambila cikani ca shinkwa? Amucenjele acimena ca baFalisi abaSaduki!”

12Lyalo bashikwiiya bakwe bakanyumfwisha ayi taakalinga kubaambila kucenjela kucimena cakuseenkanya mushinkwa, sombi kwiisha kwa baFalisi abaSaduki.

Pita mbwaakabanda Jesu ayi ngoUsalitwe wakwe Lesa

(Maako 8:27-30; Luka 9:18-21)

13Ono Jesu ndyaakashika kucishi ca kuSisaliya Filipi, wakeepusha bashikwiiya bakwe ayi, “Ino bantu balaamba ayi nebo ne MwanaaMuntu ndime ni?” 14Balo bakakumbula ayi, “Bamwi balaamba ayi ndimwe baJoni Mubombeki, bamwi ayi ndimwe baElija abalo bamwi ayi ndimwe baJelemiya nabi womwi wa balaluki bakulukulu.”#Mate 14:1-2; Maako 6:14-15; Luka 9:7-8 15Mpomunyaawo Jesu wakabeepusha ayi, “Ino mwebo mulaamba ayi ndime ni?” 16Simoni Pita wakakumbula ayi, “Ndimwe Usalitwe ulya, Mwanaakwe Lesa muumi.”#Joni 6:68-69

17Mpeeke Jesu wakamukumbula ayi, “Ulicite coolwe Simoni omwanaakwe Jona! Teshi muntu wakuyubulwiita ceeci, sombi mbaTa ba kwiculu. 18Ono ntookwaambila ayi ndiwe Pita, aboobo pamwaandami uyu mpweshi nkayakile coonde cangu alimwi nkusu sha lufu teshi shikacikomeewo nalilaampi. 19Ndaakukupa shakucalwisha kuBweene bwa kwiculu, aceeco coonse nceshi ukaange pacishi ca panshi, cilaakwaangwa akwiculu, aceeco coonse nceshi ukaangulule pacishi ca panshi, akwiculu koonse cilaakwaangululwa.”#Mate 18:18; Joni 20:23

20Kuswawaawo Jesu wakaambila bashikwiiya bakwe ayi batakaambili muntu nabi womwi ayi ngoUsalitwe wakwe Lesa.

Jesu mbwaakashimika shakupenshekwa asha lufu lwakwe

(Maako 8:31—9:1; Luka 9:22-27)

21Kuswa ceeco ciindi Jesu wakatalika kusansulwita bashikwiiya bakwe ayi, “Ndyeelete kuya kuJelusalemu nkweshi nkaye mukupenshekwa abuumbi abamaloba, bamatanjilili ba bapailishi abafundishi ba Milawo. Ndaakucaikwa, sombi pabushiku bwatatu, ndaakubushikwa.”

22Ndyaakanyumfwa boobo Pita, wakatola Jesu kulubasu akutalika kumukalalila. Wakamwaambila ayi, “Tau Nkambo! Ici tacikoonshi kumucitikila napaceyuubo!” 23Mpeeke Jesu wakapiluluka akwaambila Pita ayi, “Koya kulaale, webo Satana! Webo uli mfumpu kuli ndime ceebo miyeeyo yako iyo taiswi kuli Lesa, sombi njabuntu.”

24Lyalo Jesu wakaambila bashikwiiya bakwe ayi, “Na muntu utooyanda kukonkela ndime, ulyeelete kushiya akusuula shintu shoonse shimusangalasha, wanyamuna mucilingano wakwe akunkonkela.#Mate 10:38; Luka 14:27 25Mukwiinga uyo woonse usuni kupulusha buumi bwa buntu, ulaakubusowa. Sombi uyo usowa buumi bwakwe ceebo ca ndime, ncakwiila ulaakubucana.#Mate 10:39; Luka 17:33; Joni 12:25 26Ino mbubotunshi buliimo, na muntu waba ashintu shoonse shili mucishi ca panshi, sombi buumi bwakwe bwancinencine wabusowa? Taamuuwo! Nciinshi muntu nceenga walipila kwaamba ayi acane buumi bwancinencine alimwi? 27Ceebo MwanaaMuntu ulaakwisa abaanjelo bakwe mubulemu bwa baIshi, lyalo ndyeshi akalambule muntu womwi awomwi kweelana amilimo yakwe.#Mate 25:31; Kulu 62:12; Loma 2:6 28Ntoomwaambila calushinisho ayi, mpobali bamwi peenka pano beshi bakabule kufwa, kabatana kubona MwanaaMuntu keesa muBwaami bwakwe.”

Currently Selected:

Mateyo 16: BBBLI

Highlight

Copy