Mateyo 15
15
Kwiisha kwa bakulukulu
(Maako 7:1-13)
1Mpomunyaawo baFalisi abafundishi ba Milawo bamwi bakaswa kuJelusalemu, bakaya kuli Jesu mukwiipusha ayi, 2“Ceebonshi bashikwiiya bako tabakonkeli kwiisha kwa bakulukulu? Ino tabasambilinshi kumaansa pakulya kweelana amulawo wa ciJuda?” 3Jesu wakabakumbula ayi, “Ino mwebo nceebonshi ncemushiila mulawo wakwe Lesa akukonkela kwiisha kwa bakulukulu? 4Mukwiinga Lesa wakaamba ayi, ‘Lemeka baiso abanyoko,’ alimwi ayi, ‘Uyo woonse unyansha baishi nabi banyina, ncakwiila ulyeelete kucaikwa.’#Kulo 20:12; Duto 5:16; Kulo 21:17; Bene Lefi 20:9 5Sombi mwebo mulaamba ayi na muntu waambila baishi nabi banyina ayi, ‘Lucafwo loonse ndondalinga kweelete kumupa, ndapa kuli Lesa,’ taaelete kulemeka baishi alucafwo ulo. 6Mukucita boobo, mulaubya maswi akwe Lesa ceebo ca milawo yanu ya bakulukulu. 7Mwebo nobantu nomwaamba nshemutaciti! Anu Isaya wakaamba kabotu ndyaakalaluka shapali ndimwe ayi,
8‘Aba bantu balandemekabo pamulomo
sombi myoyo yabo ili kulaale anebo.
9Kupaila nkobampaila, taaku mbokubete
mukwiinga baleeisha milawo ipangabo bantu
anga njemilawo yakwe Lesa!’ ”#Isa 29:13
Shintu shibisha muntu
(Maako 7:14-23)
10Jesu wakeeta bantu baanji baanji balya akubaambila ayi, “Amukutike alimwi munyumfwishishe! 11Teshi ceeco cintu cinjila mulifumo lya muntu cimubisha, sombi nceeco ciswa mukanwa.”
12Lyalo bashikwiiya bakwe bakesa mukumwiipusha ayi, “Sa mulishi kwaamba ayi baFalisi tabakwe kukondwa ndibanyumfwa maswi anu?” 13Jesu wakakumbula ayi, “Mbewu ili yoonse njebatakwe kushanga baTa bali kwiculu ilaakutumunwa. 14Mutalisukami ambabo, mbamatanjilili boofu. Aboobo na moofu watanjilila moofunyina, boonse bobilo balawita mucilindi.”#Luka 6:39
15Sombi Pita wakaamba ayi, “Amutusansulwite cikoshanyo ici.” 16Mpeeke Jesu wakabeepusha ayi, “Anu amwebo abobulya tamunyumfwishi? 17Sa tamwishi kwaamba ayi, cintu coonse cinjila mukanwa lya muntu cileendilila kuya mumala alimwi cilaswa? 18Sombi shintu shiswa mumulomo wa muntu, mukwiinga shilaswa mumoyo, nsheshimubisha.#Mate 12:34 19Mukwiinga mumoyo momuswa miyeeyo ibiibi, ya bucayi, bulale, bufuule, bwiipi, bukamboni bwakubeca alimwi abufuyishi. 20Ishi nsheshintu shibisha muntu, sombi kulya kaatakwe kusamba kumaansa takubishi muntu.”
Lushomo lwa mwanakashi
(Maako 7:24-30)
21Lyalo Jesu ndyaakaswaako uko, wakaya kucishi ca mandabala anene aTaya aSidoni. 22Mpeeke kwakesa mwanakashi kuli Jesu wa kuKenani uyo wakalinga kwikala kweenka uko. Wakoolobesha ayi, “Amunyumfwileeko nkumbu Nkambo, nobana bakwe Defedi! Mwanaangu mwanakashi ulicite bashikaswa.”
23Sombi Jesu taakwe kumukumbulaawo nabi liswi lyomwi. Lyalo bashikwiiya bakwe bakaya kuli Jesu akumusenga ayi, “Amwaambile mwanakashi uyu anooya, mukwiinga utootukonkela akutuyobekela!” 24Mpomunyaawo Jesu wakakumbula ayi, “Ndakatumwabo kumbelele shisowekete sha mushobo wa bene Isilaeli.” 25Lyalo mwanakashi wakesa mukufukama kunembo lyakwe akwaamba ayi, “Nkambo, amuncaafwe!”
26Mpomunyaawo Jesu wakakumbula ayi, “Teshi cibotu kunyaya baana cakulya akupa bakabwa.” 27Alakwe mwanakashi wakakumbula ayi, “Mbocibete Nkambo, sombi abalo bakabwa balabweselela shakulya shilokeela pakulya mwine ŋanda.” 28Lyalo Jesu wakakumbula ayi, “Nankashi, lushomo lwako ndunene abuumbi! Acicitike kweelana akuyanda kwako.” Paciindi ceenka ico mwanaakwe mwanakashi wakaba kabotu.
Jesu mbwaakashilika bantu baanji
29Jesu wakaswaako uko akwiinda muloombe lwa Lweenge lwa Galili. Mpomunyaawo wakatanta pakalundu akwikala peenka apo. 30Mpeeke bantu baanji baanji bakaya kuli Jesu bakatola bantu balema myeendo, boofu, balema bamwi, bacibuulu alimwi abamwi balwashi baanji. Bakabooneka kunembo lyakwe Jesu, peenka wakabashilika. 31Bantu boonse bakakankamana ndibakabona bacibuulu kabaamba, balema kababa kabotu, balema myeendo kabeenda alimwi aboofu kababona. Lyalo bakalumbaisha Lesa wa bene Isilaeli.
Jesu mbwaakapa cakulya shuulu shone sha bantu
(Maako 8:1-10)
32Jesu wakabunganya bashikwiiya bakwe akubaambila ayi, “Ndanyumfwila nkumbu bantu aba mukwiinga bekala nshiku shotatwe anebo alimwi bulya tabacite acakulya. Nshisuni kubaambila ayi baye mwabo mwabo kabatana kulya mukwiinga inga kabaya ciwisuka munshila.” 33Bashikwiiya bakwe bakamwiipusha ayi, “Ino tutooshicana kuli shakulya shakwaamba ayi tupe bantu baanji bobulya muno muluyanga?” 34Jesu wakabeepusha ayi, “Ino mulicite shinkwa wongaye?” Abalo bakakumbula ayi, “Tulicite shinkwa wosanwe awobilo alimwi atuswi tuniinibo.”
35Mpomunyaawo Jesu wakaambila bantu ayi bekale panshi. 36Lyalo wakabwesa shinkwa wosanwe awobilo uyo alimwi atuswi, ndyaakamana kulumba Lesa, wakakomoona shinkwa akupa bashikwiiya bakwe ayi baabile bantu. Abalo bashikwiiya bakwe bakabaabila. 37Mpeeke boonse bantu bakalya akukuta. Lyalo bashikwiiya bakesusha tutundu tosanwe atobilo twa sheesho nshebakashiyaako bantu. 38Bantu bakalya bakalinga shuulu shone, kutabelengelako banakashi abaana.
39Lyalo Jesu wakaambila bantu ayi banooya kumaanda abo, lakwe wakenjila mubwaato akuya kucishi ca kuMagadani.
Currently Selected:
Mateyo 15: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
