Mateyo 14
14
Lufu lwakwe Joni Mubombeki
(Maako 6:14-29; Luka 9:7-9)
1Ciindi ico, mwaami Elodi wa kuGalili wakanyumfwa mpuwo yakwe Jesu. 2Mpomunyaawo wakaambila bantu bakwe bacinenenene ayi, “Uyu nguJoni Mubombeki wabuka kuswa kubafu! Nceceeco ncaakonshela kucita shaankamiko ishi.”
3Ceebo pesule Joni Mubombeki kaatana kufwa, Elodi wakatuma bashilumamba ayi baange Joni akumubika muntolongo. Wakacita shoonse ishi ceebo cakwe Elodyasi muka Filipo, mukwabo. 4Mukwiinga Joni wakalinga kwaambila Elodi ayi, “Mulawo tausuminishi ayi webo umweebe.”#Luka 3:19-20#Bene Lefi 18:16; 20:21 5Elodi wakalinga kusuni kucaya Joni, sombi wakalinga kuloonda bantu ceebo bakalinga kwaamba ayi Joni ngumulaluki.
6Ono bumwi bushiku, ndibakalinga kusekelela bushiku bwa kushalwa kwakwe Elodi, mwanaakwe Elodyasi mwanakashi wakashana cakakonda Elodi abaabo bakalingaawo. 7Lyalo Elodi wakaambila mulindu uyo ayi, “Ndalumbila, ntookupa cili coonse nceshi unseenge!” 8Ono banyina ndibakamulwiita ncaaelete kusenga, wakaamba ayi, “Amumpe pano peenka mutwi wakwe Joni Mubombeki mumbale iselebete.”
9Mpomunyaawo mwaami Elodi wakacatwa buumba, sombi ceebo cakulumbila nkwakalumbila pameenso abaabo boonse bakalingaawo, wakaambila bantu ayi mulindu uyu apekwe ncaasenga. 10Mpeeke wakatuma shilumamba kuya mukutimbula Joni mutwi muntolongo. 11Lyalo mutwi wakwe bakooletela mumbale iselebete akupa mulindu uyo, alakwe wakootola kuli banyina. 12Ono bashikwiiya bakwe Joni Mubombeki bakesa mukubwesa mutuntu, baya bafukila. Kuswawaawo bakaya mukulwiita Jesu.
Jesu mbwaakapa cakulya bantu bali shuulu shosanwe
(Maako 6:30-44; Luka 9:10-17; Joni 6:1-14)
13Jesu ndyaakanyumfwa makani aya, wakenjila mubwaato akuswaako uko. Wakaya kumusena umwi eenkabo kwatakalinga kwikala bantu. Ono bantu baanji ndibakanyumfwa ayi Jesu waya, bakeenda kwitala kuswa mumandabalaabo bamukonkela. 14Jesu ndyaakasubuka, wakabona bantu baanji baanji kababungene. Lyalo wakabanyumfwila nkumbu akushilika balwashi mbobakalingaabo.
15Ndilyakookama lisuba, bashikwiiya bakwe bakesa kuli Jesu akumwaambila ayi, “Amubone, kuno nkuluundu alimwi lisuba lyepila kale. Amubaambile bantu baye mumishi mukuula cakulya cakwaamba ayi balye.” 16Jesu wakabakumbula ayi, “Tabeelete kuya. Mwebo nweenka amubape cakulya.” 17Abalo bakakumbula ayi, “Swebo tulicitebo shinkwa wosanwe atuswi tobilo.” 18Mpomunyaawo Jesu wakabaambila ayi, “Amushilete kokuno.” 19Lyalo Jesu wakaambila bantu ayi bekale panshi pabwiisu. Wakabwesa shinkwa wosanwe alimwi atuswi tobilo, walanga kwiculu akulumba Lesa. Ndyaakamanisha wakakomoona shinkwa akupa bashikwiiya bakwe abalo bakaabila bantu. 20Mpeeke bantu boonse bakalya akukuta. Mpomunyaawo bashikwiiya bakesusha tutundu likumi atobilo twa sheesho shakacaalaako. 21Ono bantu bakalyaako mpashi bakalinga shuulu shosanwe, kutabelengelako banakashi abanike.
Jesu mbwaakeenda pamaanshi
(Maako 6:45-52; Joni 6:15-21)
22Mpomunyaawo Jesu wakaambila bashikwiiya bakwe ayi benjile mubwaato, batanjile kuya kwitala lya lweenge, lakwe kaacaambila bantu ayi baye kumishaabo. 23Ndyaakamana kubalasha bantu balya, lyalo ndipakashiyashiya, wakatanta pakalundu mukupaila, wakalingakobo eenka. 24Paciindi ici bwaato bwakalinga kutene pakati ka lweenge, kabutolaanishikwabo amaaba ceebo kwakalinga cipuupu.
25Ingayi kumuyamaca Jesu wakesa kubashikwiiya bakwe kaaenda pamaanshi. 26Sombi bashikwiiya ndibakamubona kaaenda pamaanshi, bakaloonda abuumbi akooloma bakaamba ayi, “Ncipuku!” 27Sombi paciindi ceenka ico Jesu wakabaambila ayi, “Amukalike myoyo! Mutaloondi, ndime.”
28Mpomunyaawo Pita wakaamba ayi, “Nkambo, na ncakwiila ndimwe, amuŋambile ayi nse kuli ndimwe keensa ceenda pamaanshi.” 29Alakwe Jesu wakamwaambila ayi, “Kosa!” Mpeeke Pita wakaswa mubwaato akutalika kweenda pamaanshi kuya kuli Jesu. 30Ono ndyaakabona maaba wakaloonda, lyalo wakatalika kuya bupila. Wakoolobesha ayi, “Nkambo amumpulushe!” 31Mpomunyaawo Jesu wakamucata akumwaambila ayi, “Nciinshi ncewatonshesha? Kuceya lushomo ndoocite webo omuntu!” 32Ndibakenjila mubwaato, acalo cipuupu cakoomuna. 33Lyalo bashikwiiya boonse bakalinga mubwaato bakamulambila akwaamba ayi, “Ncakwiila muli bana bakwe Lesa!”
Jesu mbwaakashilika balwashi kuGenesaleti
(Maako 6:53-56)
34Lyalo ndibakasubuka lweenge, bakashika mucishi ca Genesaleti. 35Mpeeke bantu ba kumusena uyo ndibakeshiba ayi nguJesu, bakatuma nkombe kumisena yoonse yakalinga kushingulukite. Mpomunyaawo bakaleta balwashi kuli Jesu, 36akumusenga ayi asuminishe balwashi kukumyabo cakufwala cakwe. Lyalo boonse bakakumyaako, bakaba kabotu.
Currently Selected:
Mateyo 14: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
