Mateyo 13

Cikoshanyo ca mushangi

(Maako 4:1-9; Luka 8:4-8)

1Pabushiku bweenka ubo, Jesu wakaswa muŋanda akuya mukwikala muloombe lwa lweenge. 2Likoto lya bantu baanji lyakamubunganina, lyalo wakenjila mubwaato wekala, sombi bantu balo boonse bakeemikana muloombe lwa lweenge petala.#Luka 5:1-3 3Jesu wakabalwiita shintu shiinji mushikoshanyo. Wakaamba ayi, “Kwakalinga muntu umwi wakaya mukushanga mbuto. 4Ono ndyaakalinga kushanga, shimwi mbuto shakalokela munshila abalo bayuni bakesa bashilya. 5Shimwi shakalokela pabulongo bwa mabwe. Imbuto ishi shakafwambaana kumena ceebo bulongo bwakalingabo peculu. 6Sombi lumwi ndilwakabala, busonga boonse bwakapya akuyuma, ceebo miyanda taikwe kuya bunene panshi. 7Imbuto shimwi shakalokela pamyuumfwa, ayalo myuumfwa ndiyakakula yakashitilisha busonga. 8Ono mbuto shimwi shakalokela pabulongo bubotu akucata shakacata. Shimwi shakacata mwaanda, shimwi makumi osanwe alyomwi ashalo shimwi makumi otatwe.”

9Lyalo Jesu wakabaambila ayi, “Uyo ucite matwi aanyumfwe!”

Ceebo cinene ca shikoshanyo

(Maako 4:10-12; Luka 8:9-10)

10Mpomunyaawo bashikwiiya bakwe bakamwiipusha ayi, “Nceebonshi ncemubalwiitila mushikoshanyo bantu?” 11Jesu wakabakumbula ayi, “Mwebo mwakapekwa lushibo lwa shintu shishisitwe sha Bweene bwa kwiculu, sombi balo tabakwe kupekwa. 12Mukwiinga uyo ucite kale ulaakubikilwaawo, aboobo ulaakuba ashiinji. Sombi ucite kaniini ulaakunyaikwa nabi kaako koonse nkaacite.#Mate 25:29; Maako 4:25; Luka 8:18; 19:26 13Ndabalwiita mushikoshanyo ceebo nabi balangilisha, sombi tababoneshi alimwi nabi balakutika, sombi tabanyumfwi nabi kunyumfwishisha. 14Cacitika muli mbabo kweelana ambwaakaamba Isaya mulaluki mukulukulu ayi,

‘Ncakwiila mulaakukutikisha sombi teshi mukanyumfwishishe,

mulaakulangilishisha sombi teshi mukabonesheshe.

15Mukwiinga bantu aba mbeshicimpamya,

alimwi bashinka mumatwi akucala meenso abo.

Nakuteshi boobo naakwiinga kababonesha akunyumfwishisha

akuba amyoyo yakusuna kukutika,

kwaamba ayi basanduke kuswa kushibiibi shabo,

ayi nebo neLesa mbashilike.’#Isa 6:9-10

16“Sombi mwebo mulicite coolwe mukwiinga meenso anu alabona, aalo matwi anu alanyumfwa. 17Ntoomulwiita calushinisho ayi balaluki bakulukulu baanji, alimwi abantu baanji baluleme, bakalinga kuyandishisha kubona sheeshi nshemutoobona, sombi tabakwe kushibona. Bakalinga kuyandishisha kunyumfwa shintu nshemunyumfwa, sombi tabakwe kushinyumfwa.#Luka 10:23-24

Jesu mbwaakasansulula cikoshanyo ca mushangi

(Maako 4:13-20; Luka 8:11-15)

18“Ono amunyumfwe mbocaamba cikoshanyo ca mushangi. 19Na bantu banyumfwa maswi a Bweene bwakwe Lesa cakubula kwaanyumfwisha, alakwe Satana ulesa wakushamo sheesho shashangwa mumyoyo yabo. Bantu bali boobo nshembuto shakalokela munshila. 20Imbuto isho shakalokela pabulongo bwa mabwe mbantu abo bacita na banyumfwa maswi akwe Lesa, baleendililabo kwaatambula cakusangalala. 21Sombi maswi taanjili cankusu mumyoyo yabo, aboobo taakaali ciindi. Makatasho nabi mapensho na abapolela ceebo ca maswi akwe Lesa, balatentuka kufwambaana. 22Ono isho shakalokela pamyuumfwa mbantu abo banyumfwa maswi akwe Lesa, sombi shintu sha mucishi ca panshi, akusuna bubile, shilafulunganya maswi akwe Lesa, aboobo tabacati shisepo. 23Sombi mbuto shakalokela mubulongo bubotu mbantu abo banyumfwa maswi akwe Lesa akwaacita. Aboobo balacata shisepo, bamwi mwaanda, bamwi makumi osanwe alyomwi abalo bamwi makumi otatwe.”

Cikoshanyo ca maila amisonde

24Jesu wakabaambila acimwi cikoshanyo ayi, “Bweene bwa kwiculu buli anga ngumuntu wakashanga mbuto ibotu ya maila mumuunda wakwe. 25Sombi mashiku bantu boonse ndibakalinga kulete, mulwani wakwe wakesa mukushanga misonde mumuunda wa maila, ndyaakamanisha wakaya. 26Ono maila alya ndyaakakula akutalika kusapuka ayalo misonde yakaboneka. 27Basebenshi ba mwine muunda bakaya mukumwaambila ayi, ‘Nkambo te mwakashangabo maila eenka mumuunda wanu? Ino misonde yaswa kuli alimwi?’ 28Lakwe wakabakumbula ayi, ‘Ngumulwani wangu wacita shoonse ishi.’ Mpeeke basebenshi bakamwiipusha ayi, ‘Sa mulisuni ayi tukainonkole misonde?’ 29Sombi lakwe wakabakumbula ayi, ‘Tau ceebo pakunonkola inga mwanonkweta kumwi amaila. 30Amwileeke misonde amaila shoonse shikulile pantu pomwi kushikila ciindi cakutebula. Lyalo ndaakwaambila beshikutebula ayi bakataangune kubunjika misonde akuyaanga milemile ayi itentwe. Lyalo ndyeshi bakacese maila akwaabika mubutala.’ ”

Cikoshanyo ca mbuto ya masitadi

(Maako 4:30-32; Luka 13:18-19)

31Jesu wakabalwiita acimwi cikoshanyo ayi, “Bweene bwa kwiculu bulikoshenye aluseke lwa masitadi ulo muntu ndwaashanga mumuunda wakwe. 32Nabi nduseke luniini kwiinda nseke shoonse, sombi na lwamena cilaba cisamu cinene kwiinda pambewu shoonse. Lyalo bayuni balesa akupanga shinswa mumisampi ya ncico.”

Cikoshanyo ca cimena

(Maako 13:20-21)

33Jesu alimwi wakabalwiita acimwi cikoshanyo ayi, “Bweene bwa kwiculu buli anga ncimena ciniini mwanakashi ncaakasenkanya mushikopo shotatwe sha fulaulo, kushikila woonse wafutumuka.”

Jesu ncaakalinga kwaambila mushikoshanyo

(Maako 4:33-34)

34Jesu wakaambila bantu shoonse ishi mushikoshanyo. Taaku cintu nabi comwi ncaatakwe kwaamba mucikoshanyo. 35Shoonse ishi shakacitika kweelana ambwaakaamba mulaluki mukulukulu ayi,

“Ndaakubaambila mushikoshanyo,

ndaakubayubulwita shintu shakalinga kushisitwe kuswa kumatalikilo a cishi ca panshi.”#Kulu 78:2

Jesu mbwaakapandulula cikoshanyo ca misonde amaila

36Mpomunyaawo Jesu wakashiya bantu baanji balya akwinjila muŋanda. Mpeeke bashikwiiya bakwe bakaya mukumusenga ayi, “Amutupandulwite cikoshanyo ca nsaku ya misonde mumuunda wa maila.” 37Jesu wakabakumbula ayi, “Uyo wakashanga maila nguMwanaaMuntu. 38Muunda uyo ncishi ca panshi. Maila mbantu ba muBweene bwa kwiculu, ayalo misonde mbantu ba Mubiibi. 39Ono mulwani wakashanga misonde nguMubiibi. Sombi ciindi ca kutebula ngamamanino a cishi ca panshi alimwi beshikutebula mbaanjelo. 40Bweenka mbuli nsaku ya misonde mboibunganishikwa akutentwa mumulilo, akumamanino a cishi ca panshi bweenka ubo mbweshi kukabe. 41MwanaaMuntu ulaakutuma baanjelo bakwe ayi bakakuushe bantu babisha babyabo abamucita shibi boonse muBweene bwakwe 42akubawaala mumulilo utamaani. Mwalo umo mweshi bakanoolila akulumanya meeno. 43Lyalo baluleme balaakubala mbuli lisuba muBweene bwakwe Ishiwabo. Uyo ucite matwi anyumfwe!”

Cikoshanyo ca bubile bushisitwe

44“Bweene bwa kwiculu bulikoshenye abuboni bwakalinga kushisitwe mumuunda, ubo muntu mbwaakeetukila akubushisa pambi. Ono mukusangalala wakaya mukuulisha shintu shoonse nshaakalinga kucite, akuula muunda uyo.

Cikoshanyo ca libwe lya makwebo

45“Bweene bwa kwiculu bulikoshenye amusambashi uyandoola mabwe abotu amakwebo. 46Na wacana libwe libotu abuumbi, ulaya mukuulisha shintu shakwe shoonse akulyuula.

Cikoshanyo ca koombe

47“Bweene bwa kwiculu bulikoshenye akoombe kawaalwa mulweenge, akucata nswi shipusenepusene. 48Ono ndikakesula bakakakwelela kwitala. Lyalo bakekala panshi akutalika kusala nswi shibotu nshebakalinga kubika mumitaanga, akusowa shibiibi. 49Bweenka ubo mbweshi cikabe akumamanino a cishi ca panshi. Baanjelo balaakwisa mukupansaanya babiibi kuswa kubaluleme, 50akubawaala mumulilo utamaani umo mweshi bakanoolila akulumanya meeno.”

Shintu shalushinisho shipya ashikulukulu

51Jesu wakeepusha bashikwiiya bakwe ayi, “Sa mwashinyumfwisha shoonse ishi?” Balo bakakumbula ayi, “Ee, twanyuumfwa.” 52Lyalo Jesu wakabakumbula ayi, “Paceebo ceeco mufundishi woonse wa Milawo uyo wakeeya maswi a Bweene bwa kwiculu, uli anga ngumwine ŋanda, uyo ukusha shintu shipya ashikulukulu muŋanda yakusungilaamo shintu.”

Jesu mbwaakakakwa kuNasaleti

(Maako 6:1-6; Luka 4:16-30)

53Jesu ndyaakamanisha kubalwiita shikoshanyo ishi, wakaswaako uko 54akuya kundabala ya kumishaabo. Ndyaakashika wakeeisha bantu mucoonde ca baJuda cakwaamba ayi boonse bakakankamana akutalika kwaamba ayi, “Ino uyu muntu wakakusha kuli busongo ubu ankusu ishi shakucita shaankamiko? 55Sa uyu teshi ngomwaana wa mubeseshi ulya? Sa te baMaliya mbobanyina? Sa te banandumi shakwe nguJemusi, Josefu, Simoni aJudasi? 56Abalo banankashi shakwe te tuli abo kweenka kuno? Ino lakwe shoonse ishi wakashicana kuli?” 57Aboobo bakamusuula. Sombi Jesu wakabaambila ayi, “Mulaluki ulalemekwa kuli koonse kukushakobo kumishaabo, akuŋanda yakwe mwiine.”#Joni 4:44 58Aboobo Jesu taakwe kucitawo shaankamiko shiinji uko ceebo tabakwe kumushoma.

Currently Selected:

Mateyo 13: BBBLI

Highlight

Copy