Mateyo 17
17
Mubili wakwe Jesu mbowakasanduka
(Maako 9:2-13; Luka 9:28-36)
1Ndipakeenda nshiku shosanwe abomwi, Jesu wakatola Pita, abamukowa bobilo Jemusi aJoni kukalundu kalaamfu, akutanta peculu beenkabo. 2Mpomunyaawo mubili wakwe Jesu wakasanduka pameenso abo. Ciwa cakwe cakabala anga ndisuba ashalo shakufwala shakwe shakaboolabo tuu. 3Lyalo bashikwiiya botatwe balya bakabona Mose aElija kabaamba aJesu. 4Ndyaakabona boobo, Pita wakaambila Jesu ayi, “Nkambo, cabota abuumbi kwaamba ayi tuli waano! Na kamusuni, ntooyaka nkunka shotatwe, imwi ibe yaanu, imwi yakwe Mose alimwi ayakwe Elija.”
5Ndyaakalinga kucaamba, kwakaboneka likumbi lituba tuu lyakabafwekelela, lyalo mulikumbi umo mwakanyumfwika liswi lyakwaamba ayi, “Uyu ngoMwanaangu ngoonsuni alimwi muli nguwe ndakondwa. Amumunyumfwile!”#Mata 22:2; Kulu 2:7; Isa 42:1; Mate 3:17; 12:18; Maako 1:11; Luka 3:22; Duto 18:15 #2 Pita 1:17-18 6Ono bashikwiiya ndibakanyumfwa boobo, bakaloonda abuumbi cakwaamba ayi bakawa bufubeme. 7Sombi Jesu wakaya mukubacata akubaambila ayi, “Amubuke, mutaloondi!” 8Lyalo ndibakeenamuka, taaku aumwi muntu ngobakabonaawo, sombibo Jesu eenka.
9Ndibakalinga kuseluka kuswa pakalundu, Jesu wakabaambila ayi, “Ishi nshemwabona mutakalwiiti muntu nabi womwi, kushikila MwanaaMuntu akabushikwe kuswa kubafu.” 10Lyalo bashikwiiya bakwe bakamwiipusha ayi, “Nceebonshi bafundishi ba Milawo ncebaambila ayi Elija ngoweelete kutaanguna kwisa?”#Mala 4:5 11Jesu wakabakumbula ayi, “Ncancinencine Elija ngoweelete kutaanguna kwisa kwaamba ayi akaboteshe shintu shoonse. 12Sombi nebo ntoomulwiita ayi Elija wakesa kale alimwi bantu tabakwe kumwishiba, sombi bakacita cili coonse ncebakalinga kusuni kuli nguwe. Mbweeke ubo MwanaaMuntu alakwe mbweshi bakamupeenshe.”#Mate 11:14 13Lyalo bashikwiiya bakwe bakanyumfwa ayi wakalinga kubaambila makani akwe Joni Mubombeki.
Jesu mbwaakashilika mwanike musankwa wakalinga kucite shikaswa
(Maako 9:14-29; Luka 9:37-43a)
14Ono ndibakashika kwakalinga bantu baanji, umwi muntu wakaya mukufukama kunembo lyakwe Jesu akwaamba ayi, 15“Nkambo, amunyumfwileko nkumbu mwanaangu ceebo ngushikashita alimwi ulapenshekwa abuumbi. Liinji liinji ulawita mumulilo amumaanshi. 16Ndakamuleta kubashikwiiya banu, sombi baalilwa kumushilika.”
17Lyalo Jesu wakabakumbula ayi, “Mwebo nobantu nomutacite lushomo, nobeshicimpamya, anu nkalaanu ciindi cilaamfu buyani? Anu nindilile ciindi cilaamfu buyani kwaamba ayi mushome? Amumulete kokuno!” 18Mpomunyaawo Jesu wakakalalila shikaswa uyo wakalinga mumusankwa uyo, mpeeke wakaswaamo. Lyalo wakaba kabotu paciindi ceenka ico.
19Mpeeke bashikwiiya bakwe bakaya mukumwiipusha kulubasu ayi, “Ino swebo twaalilwa buyani kukusha shikaswa ulya?” 20Jesu wakabakumbula ayi, “Ceebo lushomo lwanu nduniini. Ntoomulwiita calushinisho ayi na kamucite lushomo luli mbuli luseke lwa masitadi, mulakonsha kwaambila kalundu aka ayi, ‘Swaawo apo uye waalya’, akalo kalaakuswaawo cancinencine. Taaku nceenga camwaalilaawo tau!#Mate 21:21; Maako 11:23; 1 Koli 13:2 [21Taaku acimwi nceenga cakusha shikaswa wa mushobo uyu, sombibo mipailo akulikasha kulya.”]
Jesu mbwaakaamba shalufu lwakwe alimwi
(Maako 9:30-32; Luka 9:43b-45)
22Ono bashikwiiya ndibakalinga kubungene muGalili, Jesu wakabaambila ayi, “MwanaaMuntu ulaakwaabwa mumaansa abantu 23abo beshi bakamucaaye, sombi ulaakubushikwa kuswa kubafu pabushiku bwatatu.” Ndibakanyumfwa boobo, bashikwiiya bakwe bakacatwa buumba.
Jesu mbwaakapeleka musonko wa Ŋanda yakwe Lesa
24Ono Jesu abashikwiiya bakwe ndibakashika kuKapenaumu, basonkeshi ba musonko wa kuŊanda yakwe Lesa bakaya kuli Pita mukwiipusha ayi, “Sa mufundishi wanu alakwe ulasonka?”#Kulo 30:13; 38:26 25Lakwe wakakumbula ayi, “Ee, ulasonka.” Lyalo Pita ndyaakenjila muŋanda, Jesu ngowakataanguna kwaamba, akumwiipusha ayi, “Ino webo Simoni utooyeeya buyani? Ino bamaami ba pacishi mbaani mbobeelete kusonkesha? Mbaana ba mucishi cabo na mbeensu?” 26Pita wakakumbula ayi, “Mbeensu!” Jesu wakamwaambila ayi, “Anu baana ba mucishi cabo tabeelete kusonka. 27Ono kwaamba ayi tutabakalashi basonkeshi aba, koya kulweenge ukalobe. Inswi njeshi utaangune kuloba, wiicenamune mukanwa. Utoocanamo maali akwana musonko wangu awaako, utole uye ukasonke.”
Currently Selected:
Mateyo 17: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
