Luka 20

Jesu mbobakamwiipusha pabulemu ankusu

(Mate 21:23-27; Maako 11:27-33)

1Bumwi bushiku Jesu ndyaakalinga kwiisha akushimikila Makani Abotu muŊanda yakwe Lesa, bamatanjilili ba bapailishi, bafundishi ba Milawo alimwi abamaloba ba baJuda bakaya kuli nguwe 2akwiipusha ayi, “Ino ninkusunshi nshoocite shakucita shintu ishi? Wakakupa nkusu shakucita bobulya ngani?”

3Jesu wakabakumbula ayi, “Anebo ntoomwiipushawo mwiipusho womwi. 4Amundwiite, ino ngani wakapa Joni nkusu shakwaamba ayi anoobombeka? Sa nguLesa na mbantu?”

5Mpeeke bakatalika kupikishanya beene abeene ayi, “Na twaambe ayi, ‘NguLesa,’ lakwe utokwaamba ayi, ‘Ino tamukwe kushomenanshi maswi ngaakalinga kwaamba?’ 6Ono na twaambe ayi, ‘Mbantu,’ bantu boonse aba batootuuma mabwe mukwiinga balishi ayi Joni wakalinga mulaluki.” 7Paceebo ceeco bakamukumbula ayi, “Cito na mbaani.”

8Lyalo Jesu wakabaambila ayi, “Anebo anu teshi mulwiite wooyo wakampa nkusu shakucita shintu ishi.”

Cikoshanyo ca balimi bakabweleka muunda wa minyansa

(Mate 21:33-46; Maako 12:1-12)

9Mpomunyaawo Jesu wakatalika kubalwiita cikoshanyo ayi, “Kwakalinga musankwa wakalima muunda wa minyansa akuubwelekesha balimi bamwi. Mpeeke wakaya lweendo kucishi cimwi nkwaakekala ciindi cilaamfu. Ndicakashika ciindi cakutebula shisepo, musankwa uyo#Isa 5:1 10wakatuma musebenshi wakwe kubalimi abo kwaamba ayi bakamupeewo shisepo sha mumuunda wakwe. Sombi balimi abo bakacata musebenshi uyo bamuuma akumutanda maansabo. 11Mwine muunda uyo wakatumaako aumwi musebenshi alakwe bakamuuma, bamusebaanya cilensha nsoni akumutanda maansabo. 12Mpeeke wakatumaako aumwi watatu, sombi alakwe bakamupwayoola akumusowela pansengwe lya muunda. 13Lyalo mwine muunda uyo wakaamba ayi, ‘Ntoocita buyani? Anu ntootumakobo mwanaangu ngoonsunishi mpashi lakwe balaakumupa bulemu.’ 14Sombi balimi abo ndibakamubona, bakatalika kulwiitana ayi, ‘Uyu ngweshi akapyane buboni boonse, atumucaaye kwaamba ayi buboni boonse bukabe bwesu.’ 15Aboobo bakamukushila pansengwe lya muunda akumucaya.”

Mpomunyaawo Jesu wakabeepusha ayi, “Ino nciinshi nceshi akacite mwine muunda kubalimi abo? 16Ulaakwisa mukucaya balimi abo akupa bamwi muunda uyo.” Bantu ndibakanyumfwa boobo bakaamba ayi, “Citakacitiki!”

17Jesu wakabalangishisha akubeepusha ayi, “Ono malembo aya alaambanshi?

‘Libwe bayaki ndibakakaka,

lyakaba ndyelibwe lya mulikonko lya ŋanda.’#Kulu 118:22

18Uyo woonse eshi akawiteewo, ulaakutyokooka. Sombi uyo ngweshi likalokele, ulaakusansooka.”

Mwiipusho wa pakupeleka musonko

(Mate 22:15-22; Maako 12:13-17)

19Bafundishi ba Milawo abamatanjilili ba bapailishi bakalinga kusuni kucata Jesu paciindi ceenka ico mukwiinga bakeshiba ayi Jesu wakalinga kwaamba mbabo mucikoshanyo ca balimi. Sombi bakaloonda bantu bakalingaawo. 20Aboobo bakalinga kulindila ciindi ceelete kucata Jesu. Bakapa maali bantu bamwi ayi babece kushomeka akubatuma mukusunka Jesu mumiipusho kwaamba ayi aabwe mumaansa a nkuta ya mweendeleshi wa kuLoma. 21Bantu abo bakeepusha Jesu ayi, “Bafundishi, tulishi kwaamba ayi mulaamba akwiisha shiluleme. Tulishi kwaamba ayi mwebo tamusalululi, sombi muleeisha nshila yakwe Lesa calushinisho. 22Amutulwiite, sa Milawo ilatusuminisha kupa musonko kuli Sisa, muleli munene wa kuLoma, na tau?”

23Sombi Jesu wakeshiba kwaamba ayi batokwiipushabo cakubeca. Lyalo wakabaambila ayi, 24“Amuntondeshe lyaali. Ino mutwi aliina shiliiwo nsha baani?” 25Bakakumbula ayi, “Nshakwe Sisa, muleli munene wa kuLoma.” Lyalo wakabaambila ayi, “Anu amupe muleli munene wa kuLoma shintu isho shaakwe, alakwe Lesa mumupe shintu shaakwe.”

26Aboobo bakaalilwa kucana cilubo musheesho nshakaamba pameenso a bantu. Mpeeke bakakankamana ndibakanyumfwa kukumbula kwakwe, lyalo bakoomunabo tontolo.

Mwiipusho wa pakubuka kuswa kubafu

(Mate 22:23-33; Maako 12:18-27)

27BaSaduki bamwi bakesa kuli Jesu. Bantu aba mbobaamba ayi bantu bakafwa teshi bakabukeewo. Mpeeke bakamwiipusha ayi,#Mili 23:8 28“NoBafundishi, Mose wakatulembela mulawo wakwaamba ayi, ‘Na muntu wafwa, washiya mukaakwe kaatana kushalilamo mwaana mumukaakwe, mukwabo ulyeelete kweeba mukalubinje kwaamba ayi ashalileko baana mukwabo uyo wakafwa’.#Duto 25:5 29Ono kwakalinga basankwa ba mukowa bali bosanwe abobilo. Munenebantu wakeeba, sombi wakafwa kaatana kushalilamo mwaana. 30Alakwe wabili mbweeke ubo, 31awatatu bweenka, mpeeke kaciyabo kushikila boonse bali bosanwe abobilo bamana kufwa kutashalilaamo mumwanakashi uyo. 32Kumamanino, mwanakashi uyo wakafwa alakwe. 33Ono pabushiku bwakubuka kuswa kubafu, mwanakashi uyo ulaakuba muka ni? Mukwiinga boonse bamukowa bali bosanwe abobilo bakalinga kumweebete.”

34Jesu wakakumbula ayi, “Bantu ba cecino ciindi baleeba akweebwa. 35Sombi abo beelete kubushikwa kuswa kubafu akwikala muciindi citoosa, teshi bakanokweebana. 36Ceebo teshi bakafweewo balaakuba anga mbaanjelo. Balaakuba bana bakwe Lesa mukwiinga balaakubushikwa kuswa kubafu. 37Pacikani ca cikupu cakalinga kunyaka, alakwe Mose wakatondesha ayi bafu balaakubushikwa mukwiinga wakabanda Lesa ayi, ‘NguLesa wakwe Abulaamu, wakwe Isaki alimwi awakwe Jakobo.’#Kulo 3:6 38Nkokwaamba ayi teshi Lesa wa bafu, sombi nguLesa wa boomi, kuli nguwe boonse mboomi.”

39Bafundishi ba Milawo bamwi bakakumbula ayi, “Mwaamba kabotu Bafundishi!” 40Kuswawaawo bakalinga kuloonda kumwiipusha miipusho.

Mwiipusho wa pamakani a Usalitwe wakwe Lesa

(Mate 22:41-46; Maako 12:35-37)

41Jesu wakabeepusha ayi, “Ceebonshi bantu balaamba ayi Usalitwe wakwe Lesa wakashalwa mulunyungu lwakwe Defedi? 42Mukwiinga Defedi mwiine mulibuku lya Kulumbaisha wakaamba ayi,

‘Mwaami Lesa wakaambila Mwaami wangu ayi,

Kala kulyaansa lyangu lyalulyo,

43kushikila nkaalule balwani bako

kwaamba ayi babe mpopakulyata myeendo yako.’#Kulu 110:1

44Na Defedi mwiine wakamwiita ayi ‘Mwaami’, ino Usalitwe wakwe Lesa inga washalwa buyani mulunyungu lwakwe alimwi?”

Jesu mbwaakaambila bantu ayi bacenjele abafundishi ba Milawo

(Mate 23:1-36; Maako 12:38-40)

45Bantu boonse kabanyumfwite Jesu wakaambila bashikwiiya bakwe ayi, 46“Amucenjele abafundishi ba Milawo abo basuni kuya bweendaana kabafwete mingaanjo akwaanshikwa cabulemu mumishika. Balisuni kwikala pashuuna shibotu mushoonde shabo amisena ya bulemu mumibala. 47Aba bantu mbobabwesa buboni bwa bamukalubinje banakashi akubeca kupaila mipailo ilaamfulaamfu kwaamba ayi bantu bababoone. Aba bantu ncakwiila Lesa ulaakuboombolosha cankusu.”

Currently Selected:

Luka 20: BBBLI

Highlight

Copy