Luka 19

Jesu aSakeyo

1Jesu ndyaakenjila muJeliko wakalinga kwiindilitebo. 2MuJeliko umo mwakalinga muntu wiitwa ayi Sakeyo, musonkeshi munene wakalinga mubile. 3Wakalinga kuyanda kubona Jesu mbwaabete, sombi mukwiinga wa kufwiimpa, taakwe kumubona ceebo ca bantu kufula. 4Aboobo wakacica kuya kunembo mukutanta kucisamu ca mukuyu kwaamba ayi amuboone mukwiinga Jesu mpwaakalinga kuya mukwiinda. 5Jesu ndyaakashika pamusena apo wakalanga kwiculu akumwaambila ayi, “Sakeyo, fwambaana seluka ceebo ndyeelete kuya mukwikala kuŋanda yako sunu.”

6Mpomunyaawo Sakeyo wakaseluka cakufwambaana akutambula Jesu cakusangalala. 7Lyalo bantu boonse bakabona cikani ici bakatalika kutongooka akwaamba ayi, “Amubone muntu uyu waya mukushikila kuŋanda ya mucita shibi.” 8Sombi Sakeyo wakanyamuka akwaambila Mwaami Jesu ayi, “Amubone, Nkambo, ndaakupa musa wa buboni bwangu kubakandu. Peculu lya waawo na kuli ngondakanyengelela buboni, ndaakumubooshesha akwiilikaawo mankanda one.”

9Jesu wakamwaambila ayi, “Lupulusho sunu lwashika muŋanda ino mukwiinga alakwe musankwa uyu ngumwanaakwe Abulaamu. 10Ceebo MwanaaMuntu wakesa mukuyandoola akupulusha basowekete.”#Mate 18:11

Cikoshanyo ca maali a golodi

(Mate 25:14-30)

11Bantu kabacikutika cikani ici, Jesu wakatolelela kubaambila cikoshanyo mukwiinga wakashika pafwaafwi akuJelusalemu. Mpeeke bantu bakalinga kuyeeya ayi Bweene bakwe Lesa bulibo pafwaafwi kuboneka. 12Mpomunyaawo wakaamba ayi, “Kwakalinga musankwa wakalinga kulemekwa uyo wakaya kucishi ca kulaale ayi akapekwe bwaami akuboolela alimwi. 13Kaatana kuya wakeeta basebenshi bakwe bali likumi akubapa lyaali lyaali lya golodi alimwi akubaambila ayi, ‘Pamaali aya ndisuni nkacane mpindu.’ 14Ono mbaakalinga kwikalaabo mucishi umo tebakalinga kusuni kwaamba ayi abe mwaami. Aboobo bakatuma nkombe pesule ayi, ‘Swebo tatusuni kwaamba ayi uyo muntu abe mwaami wesu.’

15“Nakubi boobo muntu uyo wakaya mukupekwa bwaami, lyalo wakapiluka. Ingayi ashikebo, wakeeta basebenshi bakwe abo mbwaakapa maali ayi eshibe ngobakacaninaawo. 16Mpeeke mutaanshi wakesa akwaamba ayi, ‘Palyaali lyanu nkambo, ndakacaninaawo amwi ali likumi.’ 17Mpomunyaawo wakamwaambila ayi, ‘Wakacita kabotu omusebenshi mubotu! Ono mukwiinga washomeka mushintu shiniini utooba mweendeleshi wa mandabala anene ali likumi.’ 18Alakwe musebenshi wabili wakesa waamba ayi, ‘Nkambo, palyaali lyanu ndakacaninaawo amwi osanwe.’ 19Mwaami wakamwaambila ayi, ‘Webo utooba mweendeleshi wa mandabala anene ali osanwe.’

20“Musebenshi watatu wakesa waamba ayi, ‘Nkambo, ndi lyaali lyanu, ndakalyaangabo pakatambala akulishisa. 21Ndakaloonda mukwiinga muli bakali. Mulabwesa shiteshi shaanu akutebula mpomutakwe kushanga.’ 22Mwaami wakwe wakamwaambila ayi, ‘Webo omusebenshi mubiibi! Ono maswi eenka ngowasebensesha atookushinina. Ulishi kwaamba ayi ndimukali, ndabwesa shiteshi shaangu akutebula mpontakwe kushanga. 23Ino ono tookwe kulibikilanshi kubutala bwa maali? Naakwiinga pakuboola ndacana mpindu peculu.’

24“Lyalo mwaami wakaambila bakalingaawo ayi, ‘Amumunyaaye lyaali ilyo mupe musebenshi ucite ali likumi.’ 25Sombi balo bakaamba ayi, ‘Nkambo, uyu ulicite kale maali ali likumi!’ 26Sombi mwaami wakakumbula ayi, ‘Ntoomulwiita ayi uyo woonse ucite kale ulaakupekwa ashimwi. Sombi uyo ucite kaniini ulaakunyaikwa akaako koonse nkaacite.#Mate 13:12; Maako 4:25; Luka 8:18 27Ono balwani bangu abo batakalinga kusuni ayi nebo mbe mwaami wabo, amubaleete kuno mubacaaye kambweneeko!’ ”#Mate 25:14-30

Jesu mbwaakenjila muJelusalemu

(Mate 21:1-11; Maako 11:1-11; Joni 12:12-19)

28Jesu ndyaakamana kwaamba boobo, wakabatanjilila kuya kuJelusalemu. 29Ndyaakashika kufwaafwi amandabala a Betifagi aBetani mweela Kalundu ka Olifi, wakatuma bashikwiiya bakwe bamwi bobilo 30akubaambila ayi, “Kamuya mumushi ulya ngomutoobona. Mwashikabo, mulacana mwanaambongolo kaangitwe uyo ngobatana kutantawo kale bantu, muye mumwaangulule, mumulete kokuno. 31Na umwi muntu amwiipushe ayi, ‘Mutoomwaangulwitanshi?’ mumwaambile ayi, ‘Mwaami ulicitaakwe ncito.’ ”

32Ncakwiila bashikwiiya abo bakaya akucana bweenka mbwaakabaambila Jesu. 33Ndibakalinga kwaangulula mwanaambongolo uyo, beene bakeepusha ayi, “Ino mutoomwaangulwitanshi?” 34Balo bakakumbula ayi, “Mwaami ulicitaakwe ncito.” 35Lyalo bakatola mwanaambongolo kuli Jesu akuyalawo shakufwala shabo sha peculu pali nguwe. Mpeeke batantikawo Jesu. 36Ndyaakalinga kuya kaatantite pambongolo, bantu bakayala shakufwala shabo sha peculu munshila.

37Ndyaakashika pafwaafwi akuJelusalemu kunkunamo ya Kalundu ka Olifi, likoto lyoonse lya bantu bakalinga kukonkela kwiisha kwakwe Jesu, lyakasangalala akutalika kulumbaisha Lesa amaswi a peculu ceebo ca milimo ya nkusu sha kwiculu njebakabona. 38Bakaamba ayi,

“Lesa aape coolwe kuMwaami uyo utoosa muliina lyakwe!

Akube luumuno kwiculu abulemu kuli Lesa!”#Kulu 118:26

39Mpomunyaawo baFalisi bamwi bakalinga mulikoto bakaambila Jesu ayi, “NoBafundishi, amwaambile bashikwiiya banu boomune!” 40Jesu wakakumbula ayi, “Ntoomulwiita ayi na aba boomune, mabwe atokoolobesha ngawo.”

Jesu mbwaakalilila Jelusalemu

41Lyalo Jesu ndyaakasena pafwaafwi akubona Jelusalemu, wakalila. 42Wakaamba ayi, “Awebo naakwiinga kooshi sheesho shintu sheenga shakuletela luumuno. Sombi mukubula coolwe shakashisikwa kuli ndiwe. 43Ciindi cilaakushika balwani bako ndyeshi bakashingulushe lilinga akukushinkila koonse koonse ayi ubule pakucicila. 44Balaakukumwayulula akunyonyoola boonse bekala muli ndiwe, alimwi teshi bakashiye libwe palibwenyina mukwiinga tookwe kwishiba ciindi Lesa ndyaakesa mukukupulusha.”

Jesu mbwaakaya muŊanda yakwe Lesa

(Mate 21:12-17; Maako 11:15-19; Joni 2:13-22)

45Kuswawaawo Jesu wakenjila muŊanda yakwe Lesa akutalika kutandamo baabo bakalinga kuulisha. 46Wakabaambila ayi, “Cililembetwe ayi, ‘Ŋanda yangu ilaakwiitwa ayi ŋanda yakupaililaamo,’ sombi mwebo mwayaalula yaba mumwakuyubila beepi!”#Isa 56:7; Jele 7:11

47Lyalo Jesu wakalinga kwiisha lyoonse muŊanda yakwe Lesa. Mpeeke bamatanjilili ba bapailishi, bafundishi ba Milawo abeendeleshi ba cishi bakatalika kuyandoola nshila yakumucailaamo.#Luka 21:37 48Sombi tabakwe kwiicana mukwiinga bantu boonse bakalinga kusuni abuumbi kunyumfwa nshaakalinga kwaamba.

Currently Selected:

Luka 19: BBBLI

Highlight

Copy