Luka 21

Cipo ca mwanakashi mukalubinje

(Maako 12:41-44)

1Jesu ndyaakalangalanga wakabona bantu babile kababika shipo shabo mucakubikaamo shipo sha maali ca muŊanda yakwe Lesa. 2Wakabona amwanakashi mukalubinje mukandu kaabikaamo tumaali twa mukuba tobilo. 3Lyalo wakaamba ayi, “Ntoomulwiita calushinisho ayi uyu mukalubinje mukandu wabikamo bupe bwiinda bwa bamwi boonse 4mukwiinga boonse balikukusha pamaali aanji ngobacite, sombi lakwe mubukandu bwakwe wabikamo maali oonse ngaali kucite muŋanda yakwe.”

Jesu mbwaakaamba shakunyonyoolwa kwa Ŋanda yakwe Lesa

(Mate 24:1-2; Maako 13:1-2)

5Bashikwiiya bakwe Jesu bamwi bakalinga kwaamba pamakani a Ŋanda yakwe Lesa, mbuli mbweeyakitwe amabwe abotu ashipo shikankamika shakapekwa mukulemeka Lesa. Mpeeke Jesu wakaamba ayi, 6“Ishi shoonse nshemubwene, cilaakushika ciindi ndyeshi kukabule libwe nabi lyomwi palibwenyina. Mabwe oonse alaakumwayululwa.”

Makatasho alimwi amapensho

(Mate 24:3-14; Maako 13:3-13)

7Lyalo bashikwiiya bakeepusha ayi, “Bafundishi, ino ishi shilaakucitika lili alimwi tulaakwishibila kunshi ayi shintu shoonse ishi shitooyanda kucitika?”

8Jesu wakaamba ayi, “Amucenjele kwaamba ayi kutakabi muntu nabi womwi eshi akamucenjeeke. Mukwiinga bantu baanji balaakwisa muliina lyangu kabaamba ayi, ‘Ndime wooyo Usalitwe wakwe Lesa!’ alimwi ayi, ‘Ciindi cashikila!’ Mutakabakonkeli. 9Mwaakunyumfwa makani a nkondo alimwi ashimfulunganya mushishi, mutakaloondi. Ishi shintu shilyeelete kutaanguna kucitika, sombi tashaambi ayi mamanino a cishi ali pafwaafwi.”

10Mpeeke Jesu wakatolelela kubaambila ayi, “Mushobo umwi ulaakubukila ubye, abwalo buleelo bulaakubukila bulelonyina. 11Kulaakuba shitentanshi shiyoosha, nsala, malwashi mumisena ipusenepusene. Kulaakucitika shintu shiloondesha ashitondesho shikankamika kuswa kwiculu. 12Sombi shoonse ishi kashitana kucitika, mulaakwaangwa akupenshekwa. Mulaakutolwa mushoonde sha baJuda mukoomboloshekwa akubikwa muntolongo. Mulaakwiimikana kunembo lya bamaami abaleli ceebo ca liina lyangu. 13Ici cilaakuba nceciindi ca kwaambilisha Makani Abotu pameenso abo. 14Ono mutakalisukami mumyoyo kuyeeya mbweshi mukaambe 15mukwiinga ndaakumupa maswi a busongo bwakwaamba ayi taaku mulwani wanu eshi akacikoonshe kwaakaka nabi kupikisha.#Isa 13:10; Ese 32:7; Ciyu 6:12-13 16Abashali banu boonse, bamakwabanu, beshikamukowa ababyaanu balaakumwaaba kubalwani, bamwi pakati kanu balaakucaikwa. 17Bantu boonse balaakumupata ceebo ca liina lyangu. 18Nakubi boobo taaku mususu nabi womwi weshi ukakushikwe mumitwi yanu. 19Kwiinda mukushoma cakutaboola pesule mulaakutambula buumi bwancinencine.

Jesu mbwaakaamba shakunyonyoolwa kwa Jelusalemu

(Mate 24:15-21; Maako 13:14-19)

20“Mwaakubona ayi ndabala inene ya Jelusalemu yashingulukwa abashilumamba, mukeshibe ayi kunyonyoolwa kwa njiyo kuli pafwaafwi. 21Lyalo abo bali muJudeya bakacicile kutulundu. Abo beshi bakanooli mukati mundabala inene bakasweemo, abalo abo beshi bakanooli mumishi batakenjiliimo mundabala inene iyi. 22Mukwiinga ici cilaakuba ciindi Lesa ndyeshi akaboneshe bantu bakwe ayi bakabisha kwaamba ayi shoonse shilembetwe muMalembo akwe Lesa shicitike cancinencine. 23Mapensho kubanakashi beshi bakanooli pakati abeshi bakanoocite baana bayamwa munshiku isho. Mukwiinga mapensho anene alaakuba mucishi ca panshi alimwi bukali bwakwe Lesa bulaakuba pabantu aba bene Isilaeli. 24Bamwi balaakuyaswa amipeeni alimwi balaakutolwa busha kushishi shimwi. Lyalo Jelusalemu ilaakulyatoolwa abaswamashi bakunsengwe kushikila ciindi cabo cikamaane.

Kwisa kwa MwanaaMuntu

(Mate 24:29-31; Maako 13:24-27)

25“Kulaakuba shitondesho kulisuba, kumweenshi akunyenyeenshi. Pacishi ca panshi, bantu balaakulisukama akuloonda abuumbi mushishi shoonse, pakunyumfwa kuwoota kwa lweenge amaaba. 26Bantu balaakuwisuka ceebo ca boowa pakunoolangila ceshi cikese mukucitika mucishi ca panshi coonse mukwiinga nkusu sha kwiculu shilaakutenkaanishikwa. 27Lyalo balaakubona MwanaaMuntu keesa mulikumbi ankusu alimwi abulemu bukankamika.#Danye 7:13; Ciyu 1:7 28Ono na shintu ishi shikatalike kucitika, mukanyamuke akwiinuna mitwi yanu ceebo kulubulwa kwanu kuli pafwaafwi.”

Ciiyo ca cisamu ca mukuyu

(Mate 24:32-35; Maako 13:28-31)

29Mpomunyaawo Jesu wakabaambila cikoshanyo ayi, “Amuyeeye mukuyu ashisamu shimwi shoonse. 30Na mwaboona matewu atalika kusonsa, muleshiba ayi meensa ali pafwaafwi. 31Mbweeke ubo amwebo na mukabone shintu ishi kashicitika, mukeshibe kwaamba ayi Bweene bwakwe Lesa buli pafwaafwi.

32“Ntoomulwiita calushinisho ayi shintu shoonse ishi shilaakucitika bantu boonse baliiwo bulya kabatana kumaninina kufwa. 33Liculu alimwi acishi ca panshi shilaakumana, sombi maswi angu teshi akamaneewo, sobwe.

Ceebo cinene ncemweelete kwikala kamulibambite

34“Amucenjele kwaamba ayi mutabi bantu basunibo kulya mumibala, bacakolwa alimwi balisukamabo shintu sha buumi bwa panshi pano mukwiinga inga bushiku bulya bwamucana kamutalibambite. 35Bushiku ubo bulaakwisa bweenka mbuli koose akucata bantu boonse ba mucishi ca panshi. 36Amwikale kamulibambite lyoonse, kamupaila ayi mube ankusu shakwiinda musheeshi shintu sheshi shikacitike kwaamba ayi mukeemikane kunembo lya MwanaaMuntu.”

37Munshiku isho, Jesu wakalinga kwiisha muŊanda yakwe Lesa, sombi macolesha lyoonse wakalinga kuya kuKalundu ka Olifi akwikala kweenka kulya kushikila bwaca.#Luka 19:47 38Mpeeke macuunsacuunsa bantu baanji bakalinga kuya kuŊanda yakwe Lesa kwaamba ayi bakakutike kwiisha kwakwe.

Currently Selected:

Luka 21: BBBLI

Highlight

Copy