Luka 16

Cikoshanyo ca shikulama buboni ucenjete

1Jesu wakaambila bashikwiiya bakwe ayi, “Kwakalinga musankwa mubile wakalinga kucite shikulama buboni. Bantu bakaluula muntu uyo ayi utoonyonyoola buboni bwakwe. 2Lyalo wakeeta shikulama buboni akumwiipusha ayi, ‘Ngamakaninshi aya ngoontoonyumfwa? Lemba mbone mbowalinga kweendelesha buboni mukwiinga tooelete kunoocili shikulama buboni alimwi.’ 3Mpeeke shikulama buboni uyo wakalyaamboosha mumoyo ayi, ‘Ntoocita buyani ono mwaami wangu mbwaatooyanda kunkusha ncito? Nshicite nkusu shakulima alimwi kusengelela kulampa nsoni. 4Ono mbulya mbweshi ncite kwaamba ayi bantu bakanoontambula mumaandaabo ndaakuswa ncito.’

5“Mpomunyaawo wakeeta bakalinga kucite nkongole kumwaami wakwe womwi womwi akwiipusha mutaanshi ayi, ‘Wakakweletanshi kumwaami wangu?’ 6Alakwe wakaamba ayi, ‘Shikopo mwaanda sha mafuta.’ Mpeeke shikulama buboni uyo wakamwaambila ayi, ‘Bwesa lipepa palembetwe nkongole yako. Fwambaana, kala ulembebo ayi shikopo makumi osanwe.’ 7Lyalo wakaambila umwi ayi, ‘Ino webo wakakweletanshi?’ Wakakumbula ayi, ‘Masaka ali cuulu comwi a witi.’ Mpeeke alakwe wakamwaambila ayi, ‘Bwesa lipepa palembetwe nkongole yako, ulembewo ayi masaka myaanda yosanwe ayotatwe.’ 8Mwaami wakwe uyo wakalumbaisha shikulama buboni utashomeki ceebo cakucenjela kwakwe. Mukwiinga bantu ba mucishi ca panshi cino mbasongo kubamba makani abo kwiinda bantu bali mumumuni.”

9Jesu wakatolelela kubaambila ayi, “Ntoomulwiita ayi amusebenseshe buboni bwa mucishi cino kwaamba ayi mucane beshicibusanyinaanu, buboni bwaakumana, bakamusekelele mumaanda atamaani. 10Uyo woonse ushomeka pacintu ciniini, ulaakushomeka apacintu cinene. Alakwe uyo utashomeki pacintu ciniini, teshi akashomeke apacintu cinene. 11Ono na kamutashomeki pabuboni bwa pacishi cino, ino ngani eshi akamushoome akumupa buboni bwancinencine? 12Na kamutashomeki pabuboni bwa bamwi, ino ngani eshi akamupe buboni bweelete kuba bwaanu?

13“Taaku musebenshi weenga wasebensela baami bobilo, mukwiinga ulapata umwi akusuna umwi, nabi kunyumfwila umwi akusuula umwi. Nkokwaamba ayi tamukoonshi kusebensela Lesa abuboni.”#Mate 6:24

Kwiisha kumwi kwakwe Jesu

(Mate 11:12-13; 5:31-32; Maako 10:11-12)

14BaFalisi ndibakanyumfwa makani aya, bakatalika kushibuluka Jesu mukwiinga balo bakalinga kusunishi maali. 15Sombi Jesu wakabaambila ayi, “Mwebo mulalibonekesha kubantu ayi muliluleme, nakubi boobo Lesa ulishi myoyo yanu. Mukwiinga cintu coonse bantu ncibaamba ayi ncibotu abuumbi, kuli Lesa taaku ambocibete.

16“Milawo yakwe Mose amaswi akalemba balaluki bakulukulu akalinga kukonkelwa kushikila ciindi cakwe Joni Mubombeki. Kuswa paciindi ico Makani Abotu a Bweene bwakwe Lesa alashimikilwa, alimwi bantu baanji batokweelesha cankusu kwaamba ayi benjile muBweene ubo.#Mate 11:12-13 17Sombi ncuubu abuumbi liculu acishi kumana kwiinda libala lyomwi lya Milawo kumana ncito.#Mate 5:18

18“Muntu uli woonse uleka mukaakwe akweeba umbi wacita bulale, alakwe uyo weeba mwanakashi wakalekwa wacita bulale.#Mate 5:32; 1 Koli 7:10-11

Musankwa mubile aLasalo

19“Kwakalinga musankwa mubile wakalinga kufwala shakufwala shamakwebo uyo wakalinga kulya kabotu lyoonse. 20Ono kwakalinga aumwi musankwa mupenshi wakalinga kwiitwa ayi Lasalo, uyo wakalinga kucite shilonda mubili woonse. Bantu bakalinga kumubika pamulyango wa ŋanda ya mubile uyo. 21Lasalo wakalinga kuminina mate uto twakulya twakalinga kulokeela panshi lya tebulu ya muntu mubile uyo. Abalo bakabwa bakalinga kwisa mukunoomumyanguta pashilonda.

22“Musankwa mupenshi uyo wakafwa, muuya wakwe baanjelo bakautola kwiculu kulubasu lwakwe Abulaamu. Muntu mubile uyo alakwe wakafwa akufukilwa. 23Mpeeke mubile uyo ndyaakalinga mumusena wa bafu, kaapenga cancinencine, wakalanga kwiculu akubona Lasalo kaali kulubasu lwakwe Abulaamu palaale. 24Lyalo wakoolobesha ayi, ‘Ta Abulaamu, amunyumfwileeko nkumbu. Amutume Lasalo kwaamba ayi asumpebo munwe mumaanshi ese atontoshe mulaka wangu mukwiinga ndapya abuumbi mumulilo muno.’

25“Sombi Abulaamu wakaamba ayi, ‘Omwanaangu ibaluka ayi webo ndiwakalinga muumi wakalinga wapekwa shintu shoonse shibotu, alakwe Lasalo shintu shibiibi. Sombi bulya alakwe utookondwa kuno awebo uli mumapensho anene. 26Kuteshi ceeci ceenka, pakati kesu awebo pali cilindi cilaamfu abuumbi, cakwaamba ayi taaku muntu uli kokuno weenga wacikonsha kusubuka kwisa kooko, nabi uli kooko kwisa kokuno.’ 27Mpomunyaawo mubile uyo wakaamba ayi, ‘Anu ndaseenga ta, mutume Lasalo kuŋanda ya bata 28mukwiinga ndicite bamakwesu bosanwe. Aye akabacenjeshe kwaamba ayi abalo batakesi kokuno kumusena wa mapensho.’ 29Sombi Abulaamu wakaamba ayi, ‘Abo balicite mabuku akalemba Mose abalaluki bakulukulu bamwi. Balyeelete kukonkela shilembetweemo.’ 30Mubile uyo wakakumbula ayi, ‘Sobwe ta Abulaamu, sombi na umwi waswa kubafu wayaako, ndyeenga basanduka kuswa kushibiibi shabo.’ 31Abulaamu wakamwaambila ayi, ‘Na tabanyumfwili Mose abalaluki bakulukulu, teshi bakanyumfwe nabi umwi wabuka kuswa kubafu.’ ”

Currently Selected:

Luka 16: BBBLI

Highlight

Copy