Luka 15

Cikoshanyo ca mbelele isowekete

(Mate 18:12-14)

1Ono basonkeshi abataalinga kukonkela Milawo yakwe Mose, bakabungana pakalinga Jesu ayi banyumfwe kwiisha kwakwe. 2Mpomunyaawo baFalisi abafundishi ba Milawo bakatalika kutongooka akwaamba ayi, “Uyu muntu ulatambula buyani bantu batakonkeli Milawo yakwe Mose akulyaabo?”#Luka 5:29-30

3Lyalo Jesu wakabalwiita cikoshanyo ici ayi, 4“Na womwi pali ndimwe kaacite mbelele shili mwaanda, ono yomwi yasoweka, sa te ulashiya sheshilya shili 99 kumafulo akuya mukwiilangoola kushikila weecana? 5Lyalo na weecana ulasangalala akwiinyamuna pacifushi 6akwiitola kuŋanda. Mpeeke uleeta babye abeshimukobonyina akubalwiita ayi, ‘Amusekelele anebo, mukwiinga mbelele yangu yakalinga yasoweka ndeecana.’ 7Ntoomulwiita ayi akwalo kwiculu kulaba kusekelela bweenka ubo pamucita shibi womwi na wasanduka kuswa kushibiibi, kwiinda pabantu bali 99 baluleme batayandiki kusanduka.

Cikoshanyo ca lyaali lisowekete

8“Nabi na twaambe ayi walutundu umwi kaacite maali asilifa ali likumi, sombi lyomwi lyasoweka, ulacita buyani? Sa te ulamunika lilampi akupyanga ŋanda yakwe akulangoola kabotu moonse kushikila walicana? 9Mpeeke na walicana, uleeta babye abeshimukobonyina pantu pomwi akubalwiita ayi, ‘Ndisangalete abuumbi mukwiinga lyaali lyangu lyakalinga lyasoweka ndalicana. Atusekelele!’ 10Ntoomulwiita ayi akwiculu bweenka ubo, baanjelo bakwe Lesa balasangalala abuumbi pamucita shibi womwi uyo usanduka kuswa kushibiibi.”

Cikoshanyo ca mwaana musankwa wakasoweka

11Jesu wakabaambila alimwi ayi, “Kwakalinga musankwa umwi wakalinga kucite baana basankwa bobilo. 12Ono mwanikebantu wakaambila baishi ayi, ‘Ta, amumpe buboni mbonjelete kwaabilwa.’ Mpeeke ishiwabo wakabaanya buboni bwakwe kuli mbabo. 13Kapatana kwiinda nshiku shiinji, mwanikebantu uyo wakoolisha buboni bwakwe akunyamuka lweendo kuya kucishi ca kulaale. Uko nkwaakaya, wakanyonyoola buboni bwakwe boonse mubwikaalo bubiibi. 14Ndyaakamana kunyonyoola buboni, mucishi ico mwakaba nsala inene abuumbi, lyalo wakatalika kupenga. 15Mpeeke wakaya kumuntu umwi wa mucishi ico kwaamba ayi akasebensele cakulya. Ono muntu uyo wakamupa ncito yakweembela nkumba. 16Musankwa uyo wakalinga kukumbwa taaye uyo nkumba ngoshakalinga kulya uko, sombi taaku muntu nabi womwi wakalinga kumupa cakulya. 17Pesule ndyaakesaamo maano wakalyaamboosha mwiine ayi, ‘Basebenshi boonse ba bata balicite shakulya shiinji abuumbi, ono nebo kuno ntooyanda kufwa kunsala! 18Ntoonyamuka nje kuli bata nkaambe ayi, Ta, ndaabisha kuli Lesa akuli ndimwe. 19Nsheelete kwiitwa alimwi ayi mwanaanu. Sombi mundeele anga ngumusebenshi wanu.’ 20Mpomunyaawo wakanyamuka akuboolela kuli baishi. Kaacilibo palaale baishi bakamubona, mpeeke bakamunyumfwila nkumbu akumucicilila bamukumbata akumufyonta. 21Mwaana uyo wakaambila baishi ayi, ‘Ta, ndakabisha kuli Lesa akuli ndimwe. Nsheelete kwiitwa ayi mwanaanu.’ 22Sombi baishi bakaambila basebenshi babo ayi, ‘Amufwambaane! Amulete cakufwala cibotu afwale. Mumufwalike ninga kumunwe ansapato. 23Amulete ŋombe ilya iinite bunene mucaye kwaamba ayi tulye tusekelele. 24Mukwiinga mwanaangu uyu wakalinga kufwite, ono waba muumi alimwi wakalinga kusowekete, ono wacanika.’ Lyalo bakatalika kusekelela.

25“Ciindi ico munenebantu wakalinga mumuunda. Ono ndyaakashika pafwaafwi aŋanda, wakanyumfwa bantu bakalinga kwiimba akushana. 26Paceebo ceeco wakeeta musebenshi womwi akumwiipusha cakalinga kucitika. 27Musebenshi wakakumbula ayi, ‘Mukwanu wesa, aboobo baiso bamucaila ŋombe iinite bunene mukwiinga waboola kaali muumi.’ 28Munenebantu uyo wakakalala abuumbi alimwi wakakaka akwinjila muŋanda. Paceebo ceeco baishi bakaswita pansengwe mukumukombelela ayi enjile muŋanda. 29Sombi wakakumbula baishi ayi, ‘Amubone! Myaaka kufula njindamusebensela anga ngumusha alimwi nshina kumubishishaawo napaceyi. Sombi tamuna kumpaawo kale nabibo kapongo kwaamba ayi nsekelele abeensuma. 30Sombi mwanaanu uyu wakanyonyoola buboni bwanu mubanakashi bafuule, ndyaaboola kuŋanda, mwamucaila ŋombe iinite!’ 31Baishi bakamwaambila ayi, ‘Omwanaangu, lyoonse tuli awebo alimwi shoonse shintu nsheencite nshaako. 32Sombi tulyeelete kusekelela akusangalala mukwiinga mwanike wako wakalinga kufwite, ono waba muumi, wakalinga kusowekete, ono wacanika.’ ”

Currently Selected:

Luka 15: BBBLI

Highlight

Copy