Luka 10

Jesu mbwaakatuma bali makumi osanwe aobilo alimwi abobilo

1Kuswawaawo Mwaami Jesu wakasala abamwi basankwa bali makumi osanwe aobilo alimwi abobilo akubatuma kunembo lyakwe kuya mumandabala amisena yoonse mwaakalinga kulibambite kuya mwiine. 2Mpomunyaawo wakabaambila ayi, “Shakutebula shafula, sombi beshikutebula baceya. Amusenge Mwine muunda kwaamba ayi atume abamwi basebenshi beshikutebula.#Mate 9:37-38 3Kamuya, sombi amubone ntoomutuma anga mbana ba mbelele pakati kabaumpe.#Mate 10:16 4Mutanyamuni mpotomona, coola nabi nsapato. Mutanoosowa ciindi kwaanshanya abantu munshila. 5Muŋanda muli moonse momwenjila amutaangune kwaamba ayi, ‘Luumuno lube muŋanda ino.’ 6Muŋanda iyo muli muntu shiluumuno, luumuno lwanu lulaakuba pali nguwe. Sombi na taamu muntu wa mushobo wooyo, luumuno lulaakuboola kuli ndimwe. 7Mukekaale muŋanda yeenka iyo alimwi mukalye akunwa coonse nceshi bakamupe mukwiinga musebenshi woonse ulalita pamulimo wakwe. Mutakanoobala maanda.#1 Koli 9:14; 1 Timo 5:18 8Na mukashike mundabala mweshi bakamutambule mukalye coonse nceshi bakamupe. 9Mukashilike balwashi mundabala iyo alimwi akubaambila bantu uko ayi, ‘Bweene bwakwe Lesa bwasena pafwaafwi amwebo.’ 10Sombi na mukashike mundabala imwi bantu bakabule kumutambula, mukaye munshila sha mundabala iyo mukaambe ayi, 11‘Nabi lusuko lwa mundabala ino ulo lwalamatila kumyeendo yesu twalupampa lukabe kamboni. Sombi mwishibe ayi Bweene bwakwe Lesa buli pafwaafwi!’#Mili 13:51#Mate 10:7-14; Maako 6:8-11; Luka 9:3-5 12Ntoomwaambila calushinisho ayi pabushiku bwakoomboloshekwa, ndabala iyo ilaakuba amulandu kwiinda ndabala ya Sodoma!#Mata 19:24-28; Mate 11:24; Mate 10:15

Mapensho kumandabala atakwe kushoma

(Mate 11:20-24)

13“Mapensho kuli ndimwe nomandabala a Kolasini aBetisaida mukwiinga shaankamiko isho shakacitilwa muli ndimwe, neshakacitilwa muTaya aSidoni, mandabala anene a bantu bakunsengwe, naakwiinga bakasanduka kale kuswa kushibiibi akufwala masaka alimwi akulinanika milota, kutondesha ayi balyuungumene ceebo cakubisha.#Isa 23:1-18; Ese 26:1—28:26; Jowe 3:4-8; Amo 1:9-10; Seka 9:2-4 14Ntoomwaambila calushinisho ayi pabushiku bwakoomboloshekwa Lesa ulaakumupa mulandu unene kwiinda Taya aSidoni! 15Awebo Kapenaumu, sa utooyeeya ayi ulaakusumpwitwa kwiculu? Sobwe, ulaakuwaalwa panshi pamusena wa bafu!”#Isa 14:13-15

16Jesu wakaambila bashikwiiya bakwe ayi, “Uyo woonse unyumfwila ndimwe ulanyumfwila ndime, uyo ukaka ndimwe ulakaka ndime, alakwe uyo woonse ukaka ndime wakaka awooyo wakantuma.”#Mate 10:40; Maako 9:37; Luka 9:48; Joni 13:20

Kuboola kwa bali makumi osanwe aobilo alimwi abobilo

17Bali makumi osanwe aobilo alimwi abobilo bakaboola kabasangalete, kabaamba ayi, “Nkambo, ono abashikaswa boonse bakalinga kutunyumfwila nditwakalinga kubakusha muliina lyanu!”

18Jesu wakabakumbula ayi, “Ndakamubona Satana kaaloka kuswa kwiculu mbuli kubeka kwa mfula. 19Ono amunyumfwe! Ndamupa nkusu sha kweenda pansoka apantalaŋongo alimwi akukoma nkusu shoonse sha Mulwani. Taaku ceshi cikamuciise.#Kulu 91:13 20Sombi mutasangalali kwaamba ayi bashikaswa batoomunyumfwila, anu amusangalale mukwiinga meena anu alilembetwe kwiculu.”

Jesu mbwaakasangalala

(Mate 11:25-27; 13:16-17)

21Paciindi ico Jesu wakasangalala muMushimu Usalashi. Mpeeke wakaamba ayi, “Ndamulumba Ta, noBaami ba kwiculu acishi ca panshi mukwiinga mwayubulwita bantu bateeite shintu nshemwakashisa kubantu basongo abeeite. Ncakwiila Ta, mwebo mwakacita kweelana akuyanda kwanu.

22“BaTa bakabika shintu shoonse mumaansaangu. Taaku muntu ushi Mwaana, sombi baTa beenka. Taaku muntu ushi baTa, sombi Mwaana eenka alimwi awooyo Mwaana ngwaasala ayi ayubulwite.”#Joni 3:35; Joni 10:15

23Mpomunyaawo wakalanga kubashikwiiya bakwe akubaambila kulubasu ayi, “Balicite coolwe abo babona shintu ishi nshemubona! 24Ntoomulwiita ayi balaluki bakulukulu abaami baanji bakalinga kuyandishisha kubona sheeshi nshemutoobona, sombi tabakwe kushibona. Ncakwiila bakalinga kuyandishisha kunyumfwa shintu nshemunyumfwa, sombi tabakwe kushinyumfwa.”

Cikoshanyo ca mwine Samaliya mubotu

25Kuswawaawo kwakesa mufundishi wa Milawo wakasunka Jesu akumwiipusha ayi, “NoBafundishi, ndyeelete kucitanshi kwaamba ayi nkabe abuumi butamaani?”

26Jesu wakamwiipusha ayi, “Ino muMilawo mulilembetwe buyani? Ino mulabelengamonshi?”

27Mufundishi wa Milawo uyo wakakumbula ayi, “ ‘Suna Mwaami Lesa, Lesa wako amoyo wako woonse, abuumi bwako boonse, ankusu shako shoonse alimwi amiyeeyo yako yoonse,’ alimwi ayi, ‘suna mubyo bweenka mboolisuni omwiine.’ ”#Duto 6:5; Bene Lefi 19:18

28Jesu wakamwaambila ayi, “Wakumbula kabotu, kocita bweenka ubo, ulaakuba abuumi butamaani.”#Mate 22:35-40; Maako 12:28-34#Bene Lefi 18:5

29Sombi mufundishi uyo wakalinga kusuni kulitandya nsoni, lyalo wakeepusha Jesu ayi, “Ino mubyanji ngani?” 30Jesu wakamukumbula ayi, “Kwakalinga muntu wakalinga kuswa kuJelusalemu kaaya kuJeliko. Ndyaakalinga kuya bweenda munshila, wakakumanya beepi, bakamucata, bamufuula akumuuma. Mpeeke bakamushiya kaawisukite. 31Ono umwi mupailishi wakalinga kwiinda munshila yeenka iyo, ndyaakabona muntu uyo wakoomwa, wakaseesha. 32Alakwe Mwine Lefi umwi wakalinga kwiinda munshila yeenka iyo, sombi ndyaakashika pakalinga muntu uyo wakoomwa akumubona, wakaseesha. 33Sombi mwine Samaliya wakalinga pamushinso ndyaakashika pamuntu uyo akumubona, wakamunyumfwila nkumbu. 34Wakaya mpaakalinga kulete, watila mafuta awaini pashilonda shakwe akumwaangawo shisani. Ndyaakamana wakamubwesa pambongolo yakwe akumutola kuŋanda ya beensu uko nkwaakamubamba kabotu.#2 Maka 28:15

35“Bushiku bwakaboolaawo mwine Samaliya uyo wakakusha maali a silifa obilo akupa shikubamba ŋanda ya beensu akwaamba ayi, ‘Mulame kabotu muntu uyu, pakuboola ndaakukulipila maali eshi akasotokeewo pasheesho nsheshi ukasebenseshe.’ ”

36Lyalo Jesu pakumanisha wakeepusha mufundishi wa Milawo uyo ayi, “Ono mumuyeeyo wako, ngani pabantu botatwe aba mubye muntu wakoomwa kubeepi?”

37Mufundishi wa Milawo wakakumbula ayi, “Uyo wakamunyumfwila nkumbu.” Lyalo Jesu wakamwaambila ayi, “Koya ono ukacite bweenka ubo.”

Jesu mbwaakafwakashisha Malita aMaliya

38Ono Jesu abashikwiiya bakwe ndibakalinga mulweendo lwabo, bakashika mundabala mwakalinga kwikala mwanakashi wiitwa ayi Malita. Mwanakashi uyo wakabatambula camaansa obilo muŋanda yakwe. 39Malita wakalinga kucite mukwabo mwanakashi wiitwa ayi Maliya, uyo wakekala pafwaafwi aMwaami Jesu, kaakutika kwiisha kwakwe.#Joni 11:1

40Ciindi ico Malita ncito yakamufulila. Paceebo ceeco wakaya kuli Jesu akwaamba ayi, “Nkambo, sa tamubwene ayi nankashi yangu wandekela milimo yoonse? Amumwaambile ese ancaafwe.”

41Mwaami Jesu wakamukumbula ayi, “Malita, Malita walisukama akupenshekwa ashintu shiinji! 42Sombi ncintu comwibo cisunikwi. Maliya wasala cintu ciluleme alimwi teshi akanyaikweewo.”

Currently Selected:

Luka 10: BBBLI

Highlight

Copy