Luka 11

Jesu mbwaakeeisha bwakupaila

(Mate 6:9-13; 7:7-11)

1Bumwi bushiku Jesu wakalinga kupaila kumusena umwi. Ndyaakamanisha, umwi shikwiiya wakwe wakamwaambila ayi, “Nkambo, amutwiishe bwakupaila bweenka mbuli Joni mbwaakeeisha bashikwiiya bakwe.” 2Jesu wakabaambila ayi, “Pakupaila munokwaamba ayi,

‘Ta, alilemekwe liina lyanu.

Abwise Bweene bwanu.

3Amutupe lyoonse shakulya nshetubula.

4Amutulekelele shibiibi shesu

bweenka mbotulekelela batubishisha.

Mutatwinjishi mumasunko.’ ”

5Lyalo wakabaambila alimwi ayi, “Ino na umwi peenka pano waya kuŋanda ya mubye pakati ka mashiku akwaamba ayi, ‘Mwana, mbwelekeeko shinkwa wotatwe 6mukwiinga ndapolelwa mweensu uli palweendo. Ono nshicite cakumupa ayi alye!’ 7Ono na mubyo wakumbwitabo mukati ayi, ‘Utanshuupi! Kumulyango twacalaako kale alimwi nebo abana bangu toona kale. Inga nshikoonshi kubuka ayi nkupe coonse ncoosuni.’ 8Ntoomulwiita ayi, nabi akabule kubuka akukupa shinkwa mukwiinga wa cibusa anguwe, ulaakubuka akukupa coonse ncoosuni mukwiinga wakakatila kumusenga.

9“Paceebo ceeco ndamwaambila ayi, amusenge mulaakupekwa, amulangoole mulaakucana alimwi mukonkoonshe mulaakucalwitwa. 10Ceebo uyo woonse usenga ulapekwa, awooyo ulangoola ulacana, alakwe ukonkoonsha ulacalwitwa. 11Sa kuli mushali musankwa pakati kanu weenga wapa mwanaakwe nsoka na wasenga nswi? 12Nabi na wasenga liyi, sa inga wamupa ntalaŋongo? 13Ono na mwebo, nobantu nobeshishibi, kamwishi kupa bana banu shipo shibotu, ino lakwe Ishiwanu wa kwiculu inga waalilwa buyani kupa Mushimu Usalashi kubaabo bamusenga?”

Jesu aBilusebulu

(Mate 12:22-30; Maako 3:20-27)

14Jesu wakalinga kukusha shikaswa wakalinga kukasha musankwa umwi kwaamba. Shikaswa ndyaakaswaamo, muntu uyo wakatalika kwaamba. Mpeeke bantu boonse bakalingaawo bakakankamana. 15Sombi bamwi bakaamba ayi, “Ulakusha bashikaswa mukwiinga Bilusebulu, mwaami wa bashikaswa, ngoomupa nkusu.”#Mate 9:34; 10:25

16Ciindi ceenka ico bamwi bakeelesha kusunka Jesu ayi abatondeshe citondesho kuswa kwiculu cakubonesha ayi Lesa ngowakamutuma.#Mate 12:38; 16:1; Maako 8:11 17Sombi Jesu wakalinga kwishi miyeeyo yabo, lyalo wakabaambila ayi, “Buleelo boonse bweenga bwabukilana akutalika kulwana, buleelo ubo bulamwaika. Na bantu ba muŋanda yomwi babukilana, iyo ŋanda ilawa. 18Ino na Satana lakwe watalika kulilwana, sa inga buleelo bwakwe bwayuma? Sobwe! Mukwiinga mwebo mulaamba ayi, nguBilusebulu umpa nkusu shakukusha bashikaswa. 19Ino na nebo ndakusha bashikaswa munkusu shakwe Bilusebulu, ino abo bakonkela ndimwe balabakusha munkusu shakwe ni? Paceebo ceeco, balaakumushinina akutondesha ayi mulilubite. 20Teshi Bilusebulu, sombi nguLesa uyo umpa nkusu shakukusha bashikaswa. Nkokwaamba ayi Bweene bwakwe Lesa buli pali ndimwe.

21“Na muntu ushimpite kaalama ŋanda yakwe kaalibambite ashakulwanisha shoonse, buboni bwakwe inga tabwiipikwi. 22Sombi umwi umwiindaawo nkusu na wesa mukumulwana, wamukoma, ulamunyaya shakulwanisha shakwe nshaacinkitemo manungo akwaabanya bantu buboni ubo mbwaaipa.

23“Uyo woonse utabete kulubasu lwangu ngumulwani wangu alimwi uyo utooboli pantu pomwi anebo ulapalanganya.#Maako 9:40

Shikaswa mbwaaboolela mumuntu

(Mate 12:43-45)

24“Na shikaswa waswa mumuntu, ulaya bweenda muluundu kuyandoola kwakookeshesha. Na kwabula kucanika, ulaamba ayi, ‘Ntooboolela mumuntu wangu mondakaswa.’ 25Ono na waboola ulacana muntu uyo ulibo kabotu. 26Lyalo ulaya mukuletelaawo abamwi bali bosanwe abobilo babiibi kwiinda pali nguwe. Mpeeke balenjila akwikala mumuntu uyo. Aboobo bwikaalo bwa muntu uyo bulabica kwiinda bwakutaanguna.”

Kukondwa kwancinencine

27Jesu ndyaakamana kwaamba boobo, walutundu umwi mulikoto wakoolobesha ayi, “Ulicite coolwe mwanakashi wakamushala akumuyamwisha!” 28Sombi Jesu wakakumbula ayi, “Ee, sombi bacite coolwe cinene mbaabo banyumfwa maswi akwe Lesa akucita mbwaamba!”

Bantu mbobakayanda citondesho

(Mate 12:38-42)

29Bantu ndibakalinga kuya cifula, Jesu wakatalika kwaamba ayi, “Bantu ba cecino ciindi mbabiibi. Balisuni kubona citondesho cakuswa kwiculu, ono taaku nceshi batondeshekwe, sombibo citondesho cakwe Jona.#Mate 16:4; Maako 8:12 30Ceebo bweenka Jona mbwaakaba citondesho kubene Ninife, alakwe MwanaaMuntu mbweshi akabe citondesho kubantu ba cecino ciindi.#Joni 3:4 31Pabushiku bwakoomboloshekwa mwaami mwanakashi wa kumalenge ulaakumushinina ceebo wakaswa kweela cishi kwisa mukunyumfwa busongo bwakwe Solomoni. Sombi pano mpwaali wiinda Solomoni!#1 Baami 10:1-10; 2 Maka 9:1-12 32Pabushiku bwakoomboloshekwa, bene Ninife balaakumushinina ceebo balo bakasanduka kuswa kushibiibi shabo ndyaakabashimikila Jona. Sombi pano mpwaali wiinda Jona!#Jona 3:5

Mumuni wa mubili

(Mate 5:15; 6:22-23)

33“Taaku muntu unyasha lilampi akulishisa nabi kulifwekelesha nongo, sombi ulalibika peculu kwaamba ayi limunikile boonse batoonjila muŋanda.#Mate 5:15; Maako 4:21; Luka 8:16 34Meenso anu ngomumuni wa mubili wanu. Na meenso anu kaali kabotu, amubili woonse ulaba mumumuni. Sombi na meenso anu kaatabete kabotu, nkokwaamba ayi mubili woonse ulaba mumunshinshe. 35Paceebo ceeco amucenjele kwaamba ayi mumuni uli muli ndimwe utabi munshinshe. 36Aboobo na mubili woonse uli mumumuni cakubula patooshiya napaceyi, mubili woonse unanooli mumumuni bweenka mbuli lilampi mbolikumunikila.”

Jesu mbwaakakalalila baFalisi abafundishi ba Milawo

(Mate 23:1-36; Maako 12:38-40)

37Jesu ndyaakamana kwaamba, muFalisi wakamusenga ayi akalye anguwe. Aboobo Jesu wakaya mukulya. 38MuFalisi uyo wakakankamana ndyaakabona ayi Jesu wakatalika kulya kaatana kusamba kumaansa kweelana aMulawo wa ciJuda. 39Mpomunyaawo Mwaami Jesu wakamwaambila ayi, “Ono mwebo nobaFalisi mulasansha pansengwe lya nkomeshi ambale, sombi mumyoyo yanu muliswitebo bulyabi abubi. 40Mwebo nobantu nobaluya! Sa te uyo wakalenga pansengwe ngowakalenga amukati? 41Amupe bapengete isho shintu shili munkomeshi ambale, lyalo shoonse shintu shilaakumusalalila.

42“Mapensho kuli ndimwe nobaFalisi! Mukwiinga mulapa kuli Lesa calikumi ca mbewu shinunkila kabotu ashimwi shilengesha kwaamba ayi cakulya cibote alimwi abucisa bwa mushobo uli woonse. Sombi tamuciti shintu shiluleme kubantu nabi kusuna Lesa. Ceebo shintu ishi mwalinga kweelete kunooshicita cakutasuula shimwi.#Bene Lefi 27:30

43“Mapensho kuli ndimwe nobaFalisi! Mukwiinga mulasala shuuna sha bulemu mushoonde sha baJuda akuyanda kwaanshikwa cabulemu mumisena yakuulishisha. 44Mapensho kuli ndimwe ceebo muli anga nshuumbwe shitaboneki isho bantu nshibeendoobo cakuteshiba ayi mposhili.”

45Mpeeke mufundishi wa Milawo umwi wakamukumbula ayi, “NoBafundishi, mukwaamba boobo aswebo mwatucobola.”

46Jesu wakaamba ayi, “Mapensho akuli ndimwe nobafundishi ba Milawo! Ceebo mulapa bantu mikuli ilemu, sombi mwebo nobeene tamukumiko nabibo cikumo. 47Mapensho kuli ndimwe! Mukwiinga mulayaka shuumbwe shibotu sha balaluki bakulukulu abo beenka bamashali banu bakulukulu mbobakacaya. 48Nkokwaamba ayi ico cakacita bamashali banu bakulukulu mulacisuminisha mukwiinga balo bakabacaya, mwebo mwabayakila shuumbwe. 49Paceebo ceeco Lesa alakwe mubusongo bwakwe wakaamba ayi, ‘Ndaakubatumina balaluki abatumwi, ono bamwi pakati kabo balaakucaikwa abalo bamwi balaakubapensha.’ 50Aboobo bantu ba cecino ciindi balaakupekwa mulandu ceebo ca balaluki boonse mbobakacaya kuswa kumatalikilo a cishi, 51kuswa kukucaikwa kwakwe Abelo kushikila kukucaikwa kwakwe Sekaliya, uyo wakacailwa pakati lya cipaililo alimwi aMusena Usalalite wa Ŋanda yakwe Lesa. Ee, ntoomulwiita ayi bantu ba cecino ciindi balaakupekwa mulandu pasheeshi shoonse!#Mata 4:8; 2 Maka 4:22; Luka 8:17

52“Mapensho kuli ndimwe nobafundishi ba Milawo! Mwabwesa cakucalwisha kumulyango wa lushibo lwa lupulusho. Ceebo tamukwe kwinjila, aboobo mwakasha baabo balinga kuyanda kwinjila.”

53Jesu ndyaakaswa muŋanda umo, bafundishi ba Milawo alimwi abaFalisi bakatalika kumutongooka akumwiipusha miipusho iinji ipusenepusene. 54Bakalinga kusuni kumucanina cilubo mumyaambo yakwe.

Currently Selected:

Luka 11: BBBLI

Highlight

Copy