Luka 12

Jesu mbwaakacenjesha pakwaamba ncootaciti

(Mate 10:26-27)

1Paciindi ico, bantu bali shuulu shuulu ndibakabungana cakwaamba ayi bantu bakatalika kulyatana, Jesu wakataanguna kwaambila bashikwiiya bakwe ayi, “Amucenjele acimena ca baFalisi, nkokwaamba ayi kwaamba nshebataciti. 2Taaku cintu cifweketwe nceshi cikabule kufwekulwa, nabi cishisitwe ceshi cikabule kushibikwa. 3Aboobo isho shoonse nshemwakaamba mumunshinshe shilaakunyumfwika lumwi lubala alimwi shoonse nshemwakatepetesha muntu mucipinda shilaakwaambilishikwa pameenso a bantu.

Weelete kuloondwa

(Mate 10:28-31)

4“Ntoomulwiita nobeensuma ayi mutanoloonda baabo bacayabo mubili, sombi taaku cimwi nceenga bacita. 5Ono ntoomutondesha wooyo ngomweelete kuloonda. Amuloonde Lesa uyo weenga amana kucaya mubili ulicite nkusu shakuuwaala mumulilo utamaani. Ee, ntoomwaambila ayi amumuloonde.

6“Sa te tuntiinga tosanwe tuloolwa maali obilobo? Ono taaku nabi komwi ka ntuto Lesa nkaalubite. 7Sombi mwebo amisusu ya mumitwi yanu yoonse ilibelengetwe. Paceebo ceeco mutaloondi mukwiinga mwebo mulayandika kwiinda tuntiinga tuunji.

Shakusumina akukaka Jesu

(Mate 10:32-33; 12:32; 10:19-20)

8“Ntoomulwiita ayi uyo weenga wansumina pameenso a bantu, alakwe MwanaaMuntu ulaakumusumina pameenso a baanjelo bakwe Lesa. 9Sombi uyo weenga wankaka pameenso a bantu, alakwe MwanaaMuntu ulaakumukaka pameenso a baanjelo bakwe Lesa. 10Uyo woonse waamba maswi abiibi kuMwanaaMuntu inga walekelelwa, sombi uyo woonse ucobola Mushimu Usalashi, teshi akalekelelwe.#Mate 12:32; Maako 3:29

11“Baakumucata ayi bakamoomboloshe mushoonde sha baJuda, kubeendeleshi nabi kubaleli, mutakalisukami ayi mutooliimikanina buyani mukwaamba nabi nceshi mukaambe. 12Mukwiinga Mushimu Usalashi ulaakumwiisha paciindi ceenka ico nshemweelete kwaamba.”#Mate 10:19-20; Maako 13:11; Luka 21:14-15

Cikoshanyo ca mubile muluya

13Umwi muntu wakalinga mulikoto wakaambila Jesu ayi, “NoBafundishi, amumwaambile nandumi yangu ampeeko buboni bwakashiya bata balobe.”

14Sombi Jesu wakamukumbula ayi, “Webo ndaba, ino ngani waamba ayi nebo mbe moomboloshi pali ndimwe nabi shikwaabanya shintu shakamushiila ishiwanu mulobe.” 15Lyalo Jesu wakaambila bantu abo ayi, “Amucenjele alimwi mulibaambe ayi mutabi bantu basunishi bubile. Ceebo buumi bwa muntu tabubete mukufula kwa buboni mbwaacite.”

16Mpeeke Jesu wakabalwiita cikoshanyo ayi, “Umwi muntu mubile wakalinga kucite muunda umo mwakaswa shakulya shiinji. 17Ndyaakabona boobo, wakatalika kuyeeya mumoyo ayi, ‘Ntoocita buyani butala nshicite mwakubika shakulya shangu shoonse ishi?’ 18Lyalo wakaamba ayi, ‘Mbulya mbweencite. Ntoomwaya matala angu akuyaka amwi anene mweshi nkabike shakulya shangu shoonse abuboni bwangu bumwi boonse. 19Ono ndaakulyaambila ayi, Ulicite buboni buunji bweshi bukabule kumana kwamyaaka iinji. Aboobo liibe, kolya, konwa akusekana.’ 20Sombi Lesa wakamwaambila ayi, ‘Webo omuluya! Sunu lyeenka mashiku utoofwa. Ino shintu shoonse ishi nshiwakalinga kubamba kushika cecino ciindi shitooba shakwe ni?’ ” 21Mpeeke Jesu pakumanisha wakaamba ayi, “Mbweeke ubo mbocibete kubaabo balilundikila buboni, sombi tababiliteewo kuli Lesa.”

Shoma muli Lesa

(Mate 6:25-34)

22Kuswawaawo Jesu wakaambila bashikwiiya bakwe ayi, “Paceebo ceeco ntoomwaambila ayi mutalisukami pabuumi bwanu ayi na ndaakulyanshi nabi mubili wanu ayi nkafwalenshi. 23Mutaciti boobo mukwiinga buumi bulayandika kwiinda shakulya awalo mubili ulayandika kwiinda shakufwala. 24Amuyeeye bacikwangala, tabashangi, tabatebuli, tabacite ŋanda shakusungilaamo shintu nabi matala. Sombi Lesa ulabasanina. Sa tamwishi kwaamba ayi mulayandika abuumbi kuli Lesa kwiinda bayuni? 25Ngani pali ndimwe weenga walinungilako buumi napaceyi kwiinda mukulisukama pashintu ishi? 26Ino ono na tamucikoonshi kucita kantu kaniini mbuli kaako, mulalisukaminanshi ashintu shimwi shoonse? 27Amuyeeye maluba a muluundu mbwaakula. Taasebensi nabi kutunga shakufwala, sombi ntoomulwiita ayi nabi Solomoni mububile bwakwe boonse, taakwe kubaawo ashakufwala shibotu shiboneka mbuli maluba ayo.#1 Baami 10:4-7; 2 Maka 9:3-6 28Ono na Lesa ulafwalika boobo bwiisu ubo bucita sunu mpobuli, sombi ciilo bwapya, sa mwebo inga taamufwaliki kwiindaawo? Kuceya lushomo ndomucite mwebo nobantu!

29“Anu mutanoolisukama nabi kuyeeya bunene nceshi mulye nabi kunwa. 30Ishi nsheshintu bantu bakunsengwe shibayandoola, sombi Ishiwanu ulishi kwaamba ayi shoonse ishi mulishisuni. 31Aboobo amuyandoole Bweene bwakwe Lesa, lyalo Lesa ulaakumupa shintu shoonse ishi.

Bubile bwa kwiculu

(Mate 6:19-21)

32“Mwebo nolitanga liniini, mutaloondi mukwiinga Ishiwanu camukonda kumupa bwaami. 33Amuulishe buboni mbomucite, maali mupe bapengete. Amulilangweete mpotomona shitabooli alimwi amubike buboni bwanu kwiculu nkweshi bukabule kuceya mukwiinga taaku beepi beenga bashikaako atubambala tatukoonshi kubunyonyoola. 34Amucite boobo mukwiinga myoyo yanu ilaba kweenka uko kuli bubile bwanu.

Basebenshi balibambite

35“Kamulibambite kusebensa alimwi malampi anu kaanyaka lyoonse.#Mate 25:1-13 36Amube mbuli basebenshi batoolindilila mwaami wabo utooswa kubwiinga kwaamba ayi apo poonse mpweshi ashite akukonkoonsha, beendililebo kumucalwita.#Maako 13:34-36 37Balicite coolwe basebenshi beshi bakacanike kabalangila alimwi kabalibambite mwaami wabo aakuboola. Ntoomwaambila calushinisho ayi mwaami wabo ulaakufwala shakufwala shakusebenselaamo, kwikalika basebenshi aba panshi akubapa shakulya. 38Balicite coolwe basebenshi abo mbweshi akacane balilibambite, nakubi kwaamba ayi wesa pakati ka mashiku nabi kumuyamaca. 39Sombi amunyumfwishe cikani ici. Naakwiinga mwine ŋanda keeshi ciindi mwiipi ndyeshi ese, inga taalekibo mwiipi ayi enjile muŋanda yakwe. 40Amwebo mbweeke ubo, amwikale kamulibambite mukwiinga MwanaaMuntu ulaakwisa paciindi ncemutamwingashite.”#Mate 24:43-44

Musebenshi ushomeka autashomeki

(Mate 24:45-51)

41Mpeeke Pita wakeepusha ayi, “Nkambo, sa ici cikoshanyo mutoolwiitabo ndiswe sweenka, na abantu boonse?” 42Mwaami Jesu wakakumbula ayi, “Ino nguli musebenshi ushomeka ucite maano? Ngooyo mwaami wakwe ngwaakapa mulimo wakweendelesha ŋanda yakwe akunoopa babye cakulya paciindi ceelete. 43Ulicite coolwe musebenshi uyo mwaami wakwe ngweshi akacane kaasebensa boobo, aakuboola. 44Ntoomulwiita calushinisho ayi mwaami wakwe ulaakumupa mulimo wakulama shintu shoonse nshaacite. 45Ono na musebenshi uyo waamba mumoyo wakwe ayi, ‘Mwaami wangu wacelwa kwisa,’ lyalo watalika kuuma basebenshinyina basankwa abanakashi alimwi akutalika kulya, kunwa akukolwa. 46Mwaami wa musebenshi uyo ulaakwisa pabushiku mbwaatengashite aciindi ncaateshi. Ulaakumupa mulandu akumuwaala kooko nkweshi kukanooli batashomeki.

47“Musebenshi uyo ushi mwaami wakwe mbwaayanda, sombi taalibambili nabi kucita buyanda mwaami wakwe, ulaakuumwa cankusu. 48Sombi musebenshi uteshi ciyanda mwaami wakwe na wabisha cakuteshiba uloomwabo paniini. Uyo woonse upekwa shiinji ulayandika kuboosha shiinji. Uyo eenka wakapekwa shiinji ulyeelete kuboosha shiinji peculu lya sheesho nshaakapekwa.

Bantu balaakupansaana ceebo cakwe Jesu

(Mate 10:34-36)

49“Ndakesa mukuwaala mulilo mucishi. Ndalinga kusuni kwaamba ayi mulilo uyu naakwiinga koonyaka kale! 50Sombi ndyeelete kubombekwa mumapensho aanji, aboobo moyo wangu uli mubuumba kushikila mapensho aya akamaane!#Maako 10:38 51Sa mulayeeya ayi ndakesa mukuleta luumuno mucishi ca panshi? Ndakaleta kupansaana. 52Kuswa sunu bali bosanwe muŋanda balaakubukilana, botatwe balaakubukila bobilo abalo bali bobilo balaakubukila bali botatwe. 53Baishi balaakubukila mwaana musankwa, alakwe mwaana musankwa ulaakubukila baishi, banyina balaakubukila mwaana mwanakashi, alakwe mwaana mwanakashi ulaakubukila banyina. Bapongoshi banakashi balaakubukila mulokashi, alakwe mulokashi ulaakubukila bapongoshi bakwe banakashi.”#Mika 7:6

Shakwishiba ciindi

(Mate 16:2-3)

54Jesu wakaambila bantu boonse abo alimwi ayi, “Na mwaboona likumbi lyanyamuka kuswa kumbo, lyalo mulaamba ayi, ‘Mfuula itooloka sunu,’ ncakwiila ilaloka. 55Na muuwo watalika kupuupa kuswa kumalenge mulaamba ayi, ‘Sunu kutoopya ciine,’ alimwi kulaba mbweeke ubo. 56Mwebo nobantu nomwaamba nshemutaciti! Mulishi kusansulula mbociboneka cishi akwiculu. Ono cilaala buyani kwishiba shitoocitika munshiku shino?

Kunyumfwana ashimulandunyoko

(Mate 5:25-26)

57“Ino nceebonshi ncemutasalili ciluleme nobeene? 58Na utooya kunkuta ashimulandunyoko ulyeelete kufwambaana kunyumfwanaakwe kamuciya kunkuta. Ulyeelete kucita boobo mukwiinga inga wakutola kumoomboloshi, alakwe moomboloshi wakutol kumushilikani, alakwe mushilikani inga wakubika muntolongo. 59Ntoomulwiita calushinisho ayi teshi ukasweemo umo kushikila ukalipile shoonse shiyandika.”

Currently Selected:

Luka 12: BBBLI

Highlight

Copy