Luka 9

Jesu mbwaakatuma batumwi bali likumi abobilo

(Mate 10:5-15; Maako 6:7-13)

1Jesu wakabunganya batumwi bakwe akubapa nkusu shakukusha bashikaswa akushilika malwashi. 2Lyalo Jesu wakabatuma mukushimikila shaBweene bwakwe Lesa akushilika balwashi. 3Wakabaambila ayi, “Mutanyamuniiwo cintu nacibi comwi mulweendo lwanu, mutabwesi nkooli, coola, cakulya, maali nabi cakufwala ca peculu acimwi. 4Kulilabo muŋanda mweshi bakamutambule kabotu, mukekaale mweenka umo kushikila bushiku bwakuswa mundabala iyo. 5Uko koonse nkweshi bakabule kumutambula, pakuswaamo mundabala iyo, mukalipampe lusuko kumyeendo. Ici cilaakuba citondesho cakwaamba ayi balicite mulandu.”#Mili 13:51#Luka 10:4-11 6Mpeeke batumwi bakeenda mumishi yoonse, kuya cishimikila Makani Abotu akushilika balwashi pali poonse.

Elodi mbwaakapenshekwa mumoyo

(Mate 14:1-12; Maako 6:14-29)

7Ono mwaami Elodi, mweendeleshi wa cishi ca Galili, ndyaakanyumfwa shoonse shakacitika, wakapenshekwa mumoyo mukwiinga bantu bamwi bakalinga kwaamba ayi Joni wakabuka kuswa kubafu. 8Bamwi bakalinga kwaamba ayi nguElija waboneka alimwi, abalo bamwi ayi ngumulaluki womwi wa baabo balaluki bakulukulu wabuka.#Mate 16:14; Maako 8:28; Luka 9:19 9Sombi Elodi wakaamba ayi, “Joni ndakamutimbusha mutwi, ino ngani utoocita shintu ishi nshentoonyumfwa?” Kuswawaawo wakalinga kuyanda kubona Jesu uyo.

Jesu mbwaakapa cakulya bantu bali shuulu shosanwe

(Mate 14:13-21; Maako 6:30-44; Joni 6:1-14)

10Ono ndibakaboolela batumwi abo Jesu mbaakalinga atuma, bakamulwiita shoonse nshebakacita. Mpomunyaawo Jesu wakaya eenka abatumwi bakwe kundabala ya Betisaida. 11Bantu baanji baanji ndibakanyumfwa bakamukonkela uko nkwaakaya. Jesu wakabatambula, akubaambila shaBweene bwakwe Lesa, akushilika baabo bakalinga kusuni kuba kabotu.

12Lisuba ndilyakalinga kuya cipila, bashikwiiya bakwe bali likumi abobilo bakaya kuli Jesu akumulwiita ayi, “Amubaambile bantu baye mumishi amumisena ili pafwaafwi bakalangoole cakulya akwakoona mukwiinga kuno takwikaali bantu.” 13Sombi Jesu wakabaambila ayi, “Mwebo nweenka amubape cakulya.” Bashikwiiya bakakumbula ayi, “Tulicitebo shinkwa wosanwe atuswi tobilo. Ono sa mulisuni kwaamba ayi tuye tuule shakulya shikwana bantu boonse aba?” 14(Pakalinga basankwa ndabona shuulu shosanwe.) Lyalo Jesu wakaambila bashikwiiya bakwe ayi, “Amwaambile bantu bekale mumakotomakoto amakumi osanwe osanwe.”

15Bashikwiiya bakacita mbweeke ubo. 16Lyalo Jesu wakanyamuna shinkwa wosanwe atuswi tobilo uto, wakalanga kwiculu akulumba Lesa, wakomoona akupa bashikwiiya ayi baabile bantu. 17Bantu boonse bakalya akukuta. Mpomunyaawo bashikwiiya bakabwesa shoonse shakashiyaako bantu akususha tutundu likumi atobilo.

Pita mbwaakabanda Jesu ayi ngoUsalitwe wakwe Lesa

(Mate 16:13-19; Maako 8:27-29)

18Bumwi bushiku Jesu kaapaila eenka, bashikwiiya bwakwe abalo bakalingaawo pafwaafwi. Mpeeke wakabeepusha ayi, “Anu bantu balaamba ayi ndime ni?”

19Balo bakamukumbula ayi, “Bamwi balaamba ayi ndimwe baJoni Mubombeki, bamwi ayi ndimwe baElija, abalo bamwi ayi muli womwi wa balaluki bakulukulu uyo wakabuka.”#Mate 14:1-2; Maako 6:14-15; Luka 9:7-8

20Lyalo Jesu wakabeepusha ayi, “Ino mwebo mulaamba ayi ndime ni?” Pita wakakumbula ayi, “Ndimwe Usalitwe wakwe Lesa.”#Joni 6:68-69 21Mpomunyaawo Jesu wakakonkomesha bashikwiiya bakwe ayi batalwiiti muntu nabi womwi cikani ici.

Jesu mbwaakaamba shakupenshekwa alufu lwakwe

(Mate 16:20-28; Maako 8:30—9:1)

22Wakabaambila alimwi ayi, “MwanaaMuntu ulyeelete kupenshekwa abuumbi, akukakwa abamaloba, bamatanjilili ba bapailishi abafundishi ba Milawo. Balaakumucaya, sombi pabushiku bwatatu ulaakubushikwa kuswa kubafu.”

23Kuswawaawo wakabaambila boonse ayi, “Na muntu utooyanda kukonkela ndime, ulyeelete kushiya akusuula shintu shoonse shimusangalasha, wanyamuna mucilingano wakwe lyoonse akunkonkela.#Mate 1:11; Luka 3:22 24Mukwiinga uyo woonse usuni kupulusha buumi bwa buntu, ulaakubusowa. Sombi uyo woonse usowa buumi bwakwe ceebo ca ndime, ncakwiila ulaakubucana. 25Ino mbubotunshi buliimo na muntu waba ashintu shoonse shili mucishi ca panshi cino, sombi buumi bwakwe bwancinencine wabusowa nabi walinyonyoola? Taamuuwo! 26Paceebo ceeco uyo woonse unyumfwa nsoni ceebo ca ndime amaswi angu, alakwe MwanaaMuntu ulaakumunyumfwila nsoni pakwisa mubulemu bwakwe amubulemu bwa baIshi alimwi abwa baanjelo basalalite. 27Ncakwiila ntoomwaambila ayi mpobali bamwi pano peenka beshi bakabule kufwa kabatana kubona Bweene bwakwe Lesa.”

Mubili wakwe Jesu mbowakasanduka

(Mate 17:1-8; Maako 9:2-8)

28Ndipakeenda nshiku shosanwe ashotatwe Jesu ndyaakamana kwaamba makani aya, wakatola Pita, Joni alimwi aJemusi pakalundu mukupaila. 29Mpomunyaawo ndyaakalinga kupaila, ciwa cakwe Jesu cakasanduka ashakufwala shakwe shakaboolabo tuu. 30Paciindi ceenka ico kwakaboneka basankwa bobilo kabaamba aJesu. Aba bantu bakalinga nguMose aElija. 31Bakaboneka mubulemu bwa kwiculu alimwi kabaamba aJesu palufu ulo ndwaakalinga kuya mukufwita kuJelusalemu kweelana akubamba kwakwe Lesa. 32Pita abaabo mbaakalingaabo bakanyumfwa tulo, mpeeke ndibakapapuka bakabona bulemu bwakwe Jesu abantu bobilo kabeemfwi anguwe. 33Ndibakalinga kukumbulukabo bantu bobilo abo, Pita wakaambila Jesu ayi, “Nkambo, cabota abuumbi kwaamba ayi tuli waano. Atuyake nkunka shotatwe, imwi ibe yaanu, imwi yakwe Mose alimwi ayakwe Elija.” (Pita taakalinga kwishi ncaakalinga kwaamba.)

34Kaacaambabo, kwakaboneka likumbi lyakabafwekelesha. Bashikwiiya abo bakaloonda likumbi ndilyakabafwekelesha boonse. 35Lyalo mulikumbi umo mwakanyumfwika liswi lyakwaamba ayi, “Uyu ngoMwanaangu ngundakasala, aboobo amumunyumfwile!”#Isa 42:1; Mate 3:17; 12:18; Maako 1:11; Luka 3:22#2 Pita 1:17-18

36Mpeeke liswi ndilyakacileka kunyumfwika, bashikwiiya bakabonabo Jesu wacaala eenka. Kuswawaawo bakacuumunabo cikani ici, kutalwiitaawo nabi womwi munshiku isho.

Jesu mbwaakashilika mwanike musankwa wakalinga kucite shikaswa

(Mate 17:14-18; Maako 9:14-27)

37Bushiku bwakaboolaawo, ndibakaseluka pakalundu, likoto linene lya bantu lyakacinsha Jesu. 38Mpomunyaawo, musankwa umwi mulikoto ilyo wakoolobesha ayi, “Nkambo, ndamusenga ayi amunyumfwileko nkumbu mwanaangu mukwiinga ngomwaana eenkabo ngooncite. 39Ulicite shikaswa ucita na wamucata ulooloma. Ulamunyukumuna kushikila waswa lyoofu kumulomo. Kuswawaawo taamuleeki kushikila walicisa. 40Ono ndalinga ndasenga bashikwiiya banu aba ayi bamukuushe, sombi baalilwa.” 41Lyalo Jesu wakakumbula ayi “Mwebo nobantu nomutacite lushomo, nobeshicimpamya, anu nkalaanu ciindi cilaamfu buyani? Anu nindilile ciindi cilaamfu buyani ayi mushome? Amumulete kokuno mwanaanu.” 42Mwaana uyo ndyaakalinga kuya kuli Jesu shikaswa wakamuwaala panshi akumunyukumuna. Sombi Jesu wakakalalila shikaswa akushilika mwaana uyo. Mpeeke wakamuboosha kuli baishi.

Jesu mbwaakaamba shalufu lwakwe alimwi

(Mate 17:22-23; Maako 9:30-32)

43Bantu boonse bakakankamana ndibakabona nkusu shinene shakwe Lesa shakushilika. Mpeeke bantu ndibakalinga kucikankamana shintu isho nshaakacita, Jesu wakaambila bashikwiiya bakwe ayi, 44“Amunyumfwishe makani aya mukwiinga MwanaaMuntu ulaakwaabwa mumaansa a bantu.” 45Sombi tabakwe kwishiba ncaakalinga kwaamba ceebo cakalinga kushisitwe kwaamba ayi batacinyumfwishi. Abalo bakaloonda kumwiipusha.

Ngani munene pakati kesu?

(Mate 18:1-5; Maako 9:33-37)

46Mpeeke bashikwiiya bakatalika kupikishanya shakwishiba munene pakati kabo.#Luka 22:24 47Jesu ndyaakeshiba ncibakalinga kuyeeya mumyoyo, wakabwesa mwaana akumwiimika kulubasu lwakwe. 48Lyalo wakabaambila ayi, “Uyo woonse weenga watambula mwaana wa mbuli wooyu muliina lyangu, ulatambula ndime. Uyo woonse utambula ndime watambula wooyo wakantuma. Mukwiinga uyo ngomusuula pakati kanu ngomunene.”#Mate 10:40; Luka 10:16; Joni 13:20

Uyo woonse utamupikishi uli kulubasu lwanu

(Maako 9:38-40)

49Mpeeke Joni wakaamba ayi, “NoBafundishi, twakabona muntu umwi wakalinga kukusha bashikaswa muliina lyanu, ono twakamukasha ceebo teshi wa mulikoto lyesu.” 50Sombi Jesu wakamwaambila ayi, “Kutamukasha, mukwiinga uyo woonse utamupikishi uli kulubasu lwanu.”

Mushi wa bene Samaliya mbowakakaka Jesu

51Lyalo ndicakashika ciindi cakwaamba ayi Jesu atolwe kwiculu, wakayeeya kuya kundabala inene ya Jelusalemu. 52Lyalo wakatuma batumwi kunembo lyakwe abo bakaya mukwinjila mumushi wa bene Samaliya kwaamba ayi bakamubambile musena. 53Sombi bantu ba mumushi uyo tabakwe kumutambula ceebo wakalinga kuya kuJelusalemu. 54Mpomunyaawo Jemusi aJoni, bashikwiiya bakwe Jesu, ndibakabona bobulya bakaamba ayi, “Nkambo, sa mulisuni kwaamba ayi twiite mulilo kuswa kwiculu ayi wise unyonyoole bantu aba?”#2 Baami 1:9-16

55Sombi Jesu wakacebuka akubakalalila. 56Mpeeke boonse bakanyamuka baya kumushi umwi.

Shakukonkela Jesu

(Mate 8:19-22)

57Ndibakalinga kuya bweenda munshila, muntu umwi wakaambila Jesu ayi, “Ndaakumukonkela kuli koonse nkweshi mukaye.” 58Sombi Jesu wakamukumbula ayi, “Bamwaaba balicite shilingo, alimwi abayuni balicite shiinswa, sombi MwanaaMuntu taacite ampaaona.”

59Wakaambila aumwi ayi, “Nkonkele.” Sombi lakwe muntu uyo wakaamba ayi, “Nkambo, taana mboole nje nkabike bata.” 60Jesu wakakumbula ayi, “Leka bafu bafukile bafunyinaabo, sombi webo koya ukashimikile shaBweene bwakwe Lesa.”

61Aumwi muntu wakaamba ayi, “Ntoomukonkela Nkambo, ono taanguna nje nkalaashe kuŋanda yangu.”#1 Baami 19:20 62Jesu wakamukumbula ayi, “Muntu woonse utalika kulima aŋombe, mpeeke kaacilanga kwisule, Lesa taacitaakwe ncito muBweene bwakwe.”

Currently Selected:

Luka 9: BBBLI

Highlight

Copy