Joni 19

1Mpomunyaawo Pilato wakaambila bashilumamba ayi batole Jesu mukumukwipa. 2Abalo bashilumamba bakapanga mushini wa myuumfwa, bamufwalika kumutwi akumufwalika cisani cifubelafubela. 3Mpeeke bakaya kuli nguwe akumwaansha ayi, “Waboneka oMwaami wa baJuda!” Kuswawaawo bakamuuma mpaka.

4Pilato wakaswita pansengwe alimwi akwaambila baJuda ayi, “Amubone, ntoomukusha pansengwe kuli ndimwe kwaamba ayi mwishibe ayi taaku mulandu ngondacanina muntu uyu.” 5Ono Jesu ndibakamukusha pansengwe kaafwete mushini wa myuumfwa acisani cifubelafubela, Pilato wakabaambila ayi, “Ngooyu muntu wanu.”

6Bapailishi banene abeshikulindilila kuŊanda yakwe Lesa ndibakamubona, bakoolobesha ayi, “Aapopwe pamucilingano, aapopwe pamucilingano!” Mpomunyaawo Pilato wakabaambila ayi, “Amumubwese nobeene muye mukamupoope. Nebo taaku mulandu ngondamucanina.”

7Mpeeke balo bakamukumbula ayi, “Tulicite mulawo alimwi kweelana amulawo uyo, uyu muntu ulyeelete kufwa ceebo walinga kulibanda ayi nguMwanaakwe Lesa.”

8Ingayi Pilato anyumfwe boobo, boowa bwakamucata abuumbi. 9Lyalo wakenjila alimwi muŋanda yakwe akwiipusha Jesu ayi, “Anu webo kumishaanu nkuli?” Sombi Jesu taakwe kumukumbula.

10Mpomunyaawo Pilato wakamwiipusha ayi, “Sa teshi unkumbule? Sa tooshi kwaamba ayi ndicite nkusu shakukwaangulula nabi shakwaamba ayi upopwe pamucilingano?” 11Jesu lyalo wakakumbula ayi, “Nootakwe kupekwa nkusu kuswa kuli baTa, naakwiinga toocite nkusu pali ndime. Nakubi boobo uyo wakangaba kuli ndiwe ngoocite cibiibi cinene.”

12Ndyaakanyumfwa boobo, Pilato wakalinga kusuni kwaangulula Jesu, sombi baJuda bakoolobesha ayi, “Na mwaangulule muntu uyo, ingayi tamubete shicibusa wakwe Sisa muleli munene wa kuLoma. Uyo woonse ulipa bwaami, ingayi ngumulwani wa muleli munene wa kuLoma.”

13Pilato ndyaakanyumfwa makani aya, wakakusha Jesu pansengwe akwikala pacuuna ca boomboloshi pamusena wakalinga kwiitwa ayi, “Lubansa lwa mabwe.” (MuciEbulu balaamba ayi, “Gabata.”) 14Bwakalinga bushiku bwakulibambila shaPasika alimwi lisuba lyakalinga kuya pakati ka mutwi, Pilato ndyaakaambila baJuda ayi, “Ngooyu mwaami wanu!” 15Balo bakoolobesha ayi, “Aacaikwe, aacaikwe, aapopwe pamucilingano!”

Pilato wakabeepusha ayi, “Sa mulisuni ayi mpope mwaami wanu pamucilingano?” Bamatanjilili ba bapailishi bakakumbula ayi, “Taaku aumwi mwaami ngotucite, eenkabo muleli munene wa kuLoma.”

16Mpomunyaawo Pilato wakabika Jesu mumaansaabo kwaamba ayi bakamupoope pamucilingano.

Jesu mbwaakapopwa pamucilingano

(Mate 27:32-44; Maako 15:21-32; Luka 23:26-43)

Paceebo ceeco bashilumamba bakatola Jesu. 17Wakaswa mundabala ilya kaayumwite mucilingano wakwe kuya kumusena wiitwa ayi, “Cifuwa ca mutwi.” (MuciEbulu balaamba ayi, “Gologota.”) 18Pamusena uyo mpobakamupopela pamucilingano. Bakapopa abamwi basankwa bobilo, umwi kululyo aumwi kucipiko, Jesu pakati. 19Pilato wakalemba cishibisho akucibika pamucilingano wakwe Jesu cakalinga kulembetwe ayi, “Jesu wa kuNasaleti, mwaami wa baJuda.” 20BaJuda baanji bakabelengaawo ceebo kumusena nkobakamupopela kwakalinga pafwaafwi andabala ya Jelusalemu. Cishibisho ico cakalinga kulembetwe muciEbulu, ciLatini aciGiliki. 21Mpomunyaawo bamatanjilili ba bapailishi ba baJuda bakaambila Pilato ayi, “Mutalembi ayi, ‘Mwaami wa baJuda,’ sombi mulembe ayi, ‘Uyu muntu wakalinga kulibanda ayi ndi mwaami wa baJuda.’ ” 22Pilato wakakumbula ayi, “Ncendalemba ndaleemba, camana.”

23Bashilumamba ndibakamana kupopa Jesu pamucilingano, bakanyamuna shakufwala shakwe akushikwamuna mushipansha shone, waya cipansha comwi. Bakabwesa amwinjila wakwe uyo wakalinga kweensenebo kuswa peculu kushikila apanshi, kootacite mukunko. 24Paceebo ceeco bashilumamba bakaambooshanya beene ayi, “Tutakwamuni mwinjila uyu. Atuume cisolo kwaamba ayi tubone weshi autole.” Ico cakacitika kwaamba ayi Malembo akwe Lesa acitike cancinencine akwaamba ayi,

“Bakaabana shakufwala shangu

alimwi bakoomina cisolo mwiinjila wangu.”

Ncakwiila abalo bashilumamba ncebakacita ici.#Kulu 22:18

25Pafwaafwi amucilingano wakwe Jesu pakalinga kwiimfwi banyina, mukwababo mwanakashi, Maliya muka Kilopasi alimwi aMaliya wa kuMagadala. 26Jesu ndyaakabona banyina ashikwiiya ngwaakalinga kusunishi kabeemfwi pafwaafwi, wakaambila banyina ayi, “Ma, ngooyu mwanaanu.” 27Kuswawaawo wakaambila shikwiiya uyo ayi, “Mba banyoko.” Kuswa paciindi ico shikwiiya uyo wakatola banyina Jesu kuŋanda yakwe mukwikala.

Lufu lwakwe Jesu

(Mate 27:45-56; Maako 15:33-41; Luka 23:44-49)

28Jesu wakashiba ayi shoonse shacitika. Ono kwaamba ayi Malembo akwe Lesa acitike cancinencine, wakaamba ayi, “Ndafwa nyotwa.”#Kulu 69:21; 22:15 29Apo pakalinga nongo yakalinga kuswite waini usashite. Mpeeke bakasumpaamo mweepu, baubika kukasamu akucinka Jesu kumulomo. 30Jesu ndyaakamana kunwaako maanshi wakaamba ayi, “Camana.” Amanebo kwaamba boobo, wakakotamika mutwi wafwa.

Jesu mbwaakayaswa kumbafu

31Ceebo bwakalinga bushiku bwakulibambila bushiku bwakookesha bwa Cibelu, beendeleshi ba baJuda bakasenga Pilato ayi bantu bakalinga kupopetwe pamicilingano batyoloolwe myeendo, akwaangulwa kabutana kushikila bushiku bwakookesha. Bakacita boobo mukwiinga bushiku ubo bwakalinga bunene kuli mbabo. 32Aboobo bashilumamba bakaya batyola myeendo ya musankwa mutaanshi alimwi awabili abo bakapopwa pantu pomwi aJesu. 33Ono ndibaakashika pakalinga Jesu, bakacana wafwa kale, aboobo tabakwe kumutyola myeendo. 34Sombi umwi wa bashilumamba wakayasa Jesu lisumo kumbafu. Mpeeke bulowa amaanshi shakeendililabo kuswa. 35Ono musankwa wakabona sheeshi ngootoopa bukamboni alimwi bukamboni bwakwe mbwalushinisho. Ulishi kwaamba ayi nshaatokwaamba nshalushinisho ayi amwebo mushome. 36Ishi shintu shakacitika kweelana abwaamba Malembo akwe Lesa ayi, “Taaku cifuwa cakwe nabi comwi ceshi cikatyoke”#Kulo 12:46; Shakube 9:12; Kulu 34:20 37aMalembo amwi aamba ayi, “Bantu balaakulanga kuli wooyo ngobakayasa.”#Seka 12:1; Ciyu 1:7

Jesu mbwaakabikwa

(Mate 27:57-61; Maako 15:42-47; Luka 23:50-56)

38Pesule, Josefu wa kuAlimateya wakasenga Pilato ayi amusuminishe kubwesa mutuntu wakwe Jesu kuswa pamucilingano. (Josefu wakalinga kushoma muli Jesu alakwe, sombi wakalinga kuyubayuba kuloonda bamaloba ba baJuda.) Mpeeke Pilato wakamusuminisha, lyalo wakoobwesa. 39Alakwe Nikodemasi uyo wakalinga waya kuli Jesu mashiku kataanshi, wakaya aJosefu kaanyamwite mafuta anunkila kabotu asenkene amule aaloyi aanji.#Joni 3:1-2 40Basankwa bobilo abo bakabwesa mutuntu akuupombela mucisani amafuta anunkila kabotu. Bakacita boobo kweelana akwishibila kwa baJuda pakubika muntu. 41Uko kumusena kwakapopelwa Jesu kwakalinga muunda. Mumuunda umo mwakalinga cuumbwe cipya citakwe koonamo kale muntu. 42Ono ceebo cakwaamba ayi cuumbwe cakalinga pafwaafwi alimwi bwakalinga bushiku bwa kulibambila shabushiku bwakookesha bwa Cibelu, bakanyamuna mutuntu akuubika mucuumbwe.

Currently Selected:

Joni 19: BBBLI

Highlight

Copy