Joni 18

Mbobakacata Jesu

(Mate 26:47-56; Maako 14:43-50; Luka 22:47-53)

1Jesu ndyaakamana kupaila wakaswaako abashikwiiya bakwe, wasubuka kalonga ka Kidiloni. Uko kwakalinga muunda uyo Jesu abashikwiiya bakwe mobakenjila. 2Judasi alakwe, uyo wakaaba Jesu kubalwani wakalinga kwishiiko kumusena uyo ceebo liinji liinji Jesu abashikwiiya bakwe bakalinga kuyaako. 3Aboobo Judasi wakashika kumusena uko kaali alikoto lya bashilumamba abeshikulindilila kuŊanda yakwe Lesa, abo bakatumwa abamatanjilili ba bapailishi alimwi abaFalisi. Bakalinga kuyumwite malampi ashimunimweenge ashakulwanisha.

4Jesu wakalinga kwishi kale shoonse shakalinga kweelete kumucitikila. Aboobo wakasenaako akubeepusha ayi, “Ino ngani ngomutooyandoola?” 5Bakamukumbula ayi, “Tutooyandoola Jesu wa kuNasaleti.” Jesu wakaamba ayi, “Ndime.” Alakwe Judasi, uyo wakamwaaba kubalwani, wakalinga kwiimfwi ambabo.

6Jesu ndyaakaamba ayi, “Ndime,” bakaboola pesule akuwita panshi. 7Jesu wakabeepusha alimwi ayi, “Anu ngani ngomutooyandoola?” Abalo bakamukumbula ayi, “Jesu wa kuNasaleti.”

8Mpomunyaawo Jesu wakabaambila ayi, “Ndamulwiita kale ayi ndime. Ono na mutooyandoola ndime, amuleke aba mbondyaabo banooya.” 9Wakaamba boobo ayi maswi alya ngaakaamba ayi, “Ta, nshikwe kusowaawo nabi womwi pabaabo mbomwakampa,” acitike cancinencine.

10Mpeeke Simoni Pita wakalinga kucite mupeeni, wakookusha akusutula kutwi walulyo musha wa mupailishi munene. Musha uyo wakalinga kwiitwa ayi Malukasi. 11Jesu wakaambila Pita ayi, “Boosha mupeeni mookala! Sa utooyeeya kwaamba ayi nsheelete kunwita munkomeshi ya mapensho baTa njebampa?”#Mate 26:39; Maako 14:36; Luka 22:42

Jesu mbwaakoomboloshekwa aAnasi

12Likoto lya bashilumamba, mutanjilili wabo alimwi abeshikulindila Ŋanda yakwe Lesa bakacata Jesu akumwaanga. 13Bakataanguna kumutola kuli Anasi, mupongoshi wakwe Kayafasi, uyo wakalinga mupailishi munene mwaaka uyo. 14Kayafasi ngowakaambila beendeleshinyina ba munkuta ayi ncibotu muntu womwi kufwita bantu boonse.#Joni 11:49-50

Pita mbwaakakaka Jesu

(Mate 26:69-70; Maako 14:66-68; Luka 22:55-57)

15Simoni Pita aumwi shikwiiya bakalinga kuya cikonkela Jesu. Shikwiiya umwi uyo wakenjila pantu pomwi aJesu mulubansa lwa ŋanda ya mupailishi munene ceebo wakalinga kushibikitwe kuli nguwe. 16Sombi Pita wakacaala pansengwe kaaimfwi pamulyango. Lyalo shikwiiya umwi uyo wakaboolela pansengwe akwaamba amwanakashi musebenshi uyo wakalinga pamulyango, ayi asuminishe Pita kwinjila mukati. Mpeeke wakamusuminisha.

17Mwanakashi wakalinga pamulyango apo wakeepusha Pita ayi, “Sa te awebo uli womwi wa bashikwiiya ba muntu uyu?” Pita wakakumbula ayi, “Sobwe.”

18Mpomunyaawo basebenshi bamwi abeshikulindilila kuŊanda yakwe Lesa bakakunka mulilo ayi bayote ceebo kwakalinga mpewo. Pita alakwe wakalinga kwiimfwi ambabo kumulilo.

Mupailishi munene mbwaakeepusha Jesu

(Mate 26:59-66; Maako 14:55-64; Luka 22:66-71)

19Paciindi ceenka ico, mupailishi munene wakeepusha Jesu shabashikwiiya bakwe alimwi akwiisha kwakwe. 20Jesu wakamukumbula ayi, “Ndakalinga kwiishisha pameenso a bantu boonse. Ndakalinga kwiisha mushoonde shanu amuŊanda yakwe Lesa umo mubunganina bantu. Taakuuwo ncendakaambila kumapela. 21Ino mutoonjipushishanshi? Amwiipushe baabo mbondakalinga kwiisha mukwiinga balishi nshendakalinga kwaamba.”

22Ndyaakamana kwaamba boobo, shikulindilila wakalinga kwiimfwi pafwaafwi wakamuuma lupaka pameenso akwaamba ayi, “Sa mbobakumbula mupailishi munene ubo?” 23Jesu wakaamba ayi, “Na kuli cibiibi ncendaamba, caambe. Ono na ndaamba ciluleme, nciinshi ncewangumina?”

24Lyalo Anasi wakamutumya kaangitwebo kuli Kayafasi, mupailishi munene.

Pita mbwaakakaka Jesu alimwi

(Mate 26:71-75; Maako 14:69-72; Luka 22:58-62)

25Pita kaaciimfwi kumulilo kaayota, bamwi bakamwiipusha ayi, “Sa te awebo uli womwi wa bashikwiiya ba muntu uyu?” Sombi Pita wakakaka akwaamba ayi, “Sobwe, nshiishi shikwiiya wakwe.”

26Mpeeke umwi musha wa mupailishi munene, mukwabo musankwa uyo Pita ngwaakalinga asutula kutwi, wakamwiipusha ayi, “Sa te awebo ndalinga ndakubona mumuunda kooli amuntu ulya?” 27Sombi Pita wakakaka alimwi. Lyalo kombwe wakalila.

Jesu mbwaakoomboloshekwa kuli Pilato

(Mate 27:1-2, 11-14; Maako 15:1-5; Luka 23:1-5)

28Kuswa kuli Kayafasi, Jesu bakamutola kuŋanda yakwe Pilato, mweendeleshi wakaswa kuLoma. Lyakalinga macuunsa, aboobo bamaloba ba baJuda tabakwe kwinjila muŋanda yakwe ceebo bakalinga kuloonda kuba bantu batasalalite kweelana aMilawo. Bakacita boobo mukwiinga bakalinga kusuni kulya cakulya ca bushiku bwa Pasika bwakwiibaluka kusotokela. 29Lyalo Pilato wakaswita pansengwe akuya kuli mbabo mukubeepusha ayi, “Ngumulandunshi ngoomutoopa muntu uyu?” 30Balo bakamukumbula ayi, “Naatalinga kucita shibiibi muntu uyu, naakwiinga tatumuleti kuli ndimwe.”

31Mpomunyaawo Pilato wakaamba ayi, “Anu amumutoole nobeene mukamoomboloshe kwiinda mumilawo yanu.” Sombi balo bakakumbula ayi, “Swebo tatusuminishikwi kucaya muntu.” 32Shakacitika kweelana abwakaamba Jesu ndyaakaamba shalufu lwakwe.#Joni 3:14; 12:32

33Pilato wakenjila alimwi muŋanda yakwe, weeta Jesu akumwiipusha ayi, “Sa ndiwe mwaami wa baJuda?” 34Jesu wakakumbula ayi, “Sa utoolyaambililabo omwiine nabi kuli bamwi bakulwiita shapali ndime?”

35Pilato wakaamba ayi, “Sa nebo ndi muJuda? BaJudanyoko abamatanjilili ba bapailishi mbobakuleta kuli ndime. Ino wakacitanshi?” 36Jesu wakakumbula ayi, “Bweene bwangu tabwishi bwa mucishi ca panshi pano. Nebwakalinga bwa panshi, naakwiinga bakonkela ndime batoolwana kwaamba ayi ntaabwi kubeendeleshi ba baJuda. Ono bweene bwangu tabwishi bwa mucishi cino.”

37Aboobo Pilato wakeepusha ayi, “Nkokwaamba ayi uli mwaami?” Jesu wakakumbula ayi, “Waamba kabotu pakwaamba ayi ndi mwaami. Ncakwiila nceceeco ncendakashalilwa alimwi ncendakeshita mucishi ca panshi. Ndakesita kusansulula shalushinisho. Woonse uyo uli kulubasu lwa lushinisho, ulanyumfwa nsheŋamba.” 38Pilato wakeepusha alimwi ayi, “Anu lushinisho ulo ndootokwaamba nciinshi?”

Jesu mbwaakapingulwa kucaikwa

(Mate 27:15-31; Maako 15:6-20; Luka 23:13-25)

Ndyaakamana kwaamba boobo, Pilato wakaswita pansengwe mukulwiita bamaloba ba baJuda ayi, “Taaku mulandu ngondacanina muntu uyu. 39Sombi kweelana akwishibila kwanu ndyeelete kumwaangulwiita kaili womwi pabushiku bwa Pasika bwakwiibaluka kusotokela. Ono sa mulisuni kwaamba ayi mwaangulwite Mwaami wa baJuda uyu?” 40Mpeeke bakoolobesha ayi, “Sobwe! Tulisuni Balabasi, kuteshi muntu uyu.” (Ono Balabasi uyo wakalinga shikulwanina lwaanguluko.)

Currently Selected:

Joni 18: BBBLI

Highlight

Copy