Joni 20
20
Jesu mbwaakabuka kuswa kubafu
(Mate 28:1-8; Maako 16:1-8; Luka 24:1-12)
1Macuunsacuunsa paSondo, kapacishiyabo, Maliya wa kuMagadala wakaya kucuumbwe akucana ayi libwe lyakunkulushikwaawo pamulyango. 2Mpomunyaawo wakacica kuya kuli Simoni Pita ashikwiiya umwi, uyo Jesu ngwaakalinga kusunishi, wabaambila ayi, “Bamukushaamo Mwaami mucuumbwe alimwi tatwishi nkobamubika!”
3Lyalo Pita ashikwiiyanyina umwi uyo bakanyamuka akuya kucuumbwe. 4Boonse bobilo bakalinga kuya cicica, sombi shikwiiya umwi uyo wakashiyaamo Pita, aboobo wakataanguna kushika. 5Lyalo wakakotama akusondela mucuumbwe akubonabo shisani nshaakalinga kupombeletweemo. Nakubi boobo taakwe kwinjila. 6Lyalo pesule alakwe Pita wakashika akwiindililabo kwinjila mukati. Mpeeke wakabonabo shisani kashibungene apo mpaakalinga 7acisani ncaakalinga kupombeletwe kumutwi. Cisani ico tecakalinga pantu pomwi ashisani shimwi shoonse, sombi cakalinga kupetetwe ceenka palubasu. 8Mpomunyaawo shikwiiya umwi uyo wakataanguna kushika kucuumbwe, wakenjila mukati alakwe. Wakashibona shintu ishi akushoma. 9(Paciindi ici kabatana kushoma Malembo akwe Lesa aamba ayi ulyeelete kubuka kuswa kubafu.) 10Lyalo abo bashikwiiya bakaboolela kumaandaabo.
Jesu mbwaakaboneka kuli Maliya wa kuMagadala
(Mate 28:9-10; Maako 16:9-11)
11Sombi Maliya wakalinga kwiimfwi pafwaafwi acuumbwe kaalila. Kaacilila, wakakotama akusondela mucuumbwe. 12Mpeeke wakabona baanjelo bobilo kabafwete shituba. Bakalinga kushiite pakalinga mutuntu wakwe Jesu, umwi kumitwi aumwi kumitandabilo.
13Mpomunyaawo bakamwiipusha ayi, “Owalutundu, ino utoolilanshi?” Lakwe wakakumbula ayi, “Bantu bakusha Baami bangu mucuumbwe alimwi nshishi nkobabatola.”
14Ndyaakamana kwaamba boobo, wakacebuka akubona Jesu kaaimfwi, nakubi boobo taakwe kumwishiba. 15Jesu wakeepusha Maliya ayi, “Owalutundu, ino utoolilanshi? Ngani ngotoolangoola?” Maliya wakayeeya ayi ngushikulama muunda. Aboobo wakamwaambila ayi, “Mwebo ta, na ndimwe mwabakushaamo, amundwiite nkomwabatola kwaamba ayi nkababwese.”
16Mpomunyaawo Jesu wakaamba ayi, “Maliya!” Lyalo Maliya wakapiluluka akwaamba muciEbulu ayi, “Laboni!” (Nkokwaamba ayi “Mufundishi.”)
17Jesu wakamwaambila ayi, “Utancatilili ceebo nshina kuya kuli baTa. Sombi koya ukaambile bashikwiiya bangu ayi, ‘Ntooya kuli baTa alimwi mbobaishiwanu amwebo, nguLesa wangu amwebo nguLesa wanu.’ ” 18Maliya wa kuMagadala wakaya walwiita bashikwiiya ayi wabona Mwaami alimwi akubalwiita nshaakaamba.
Jesu mbwaakaboneka kubashikwiiya bakwe
(Mate 28:16-20; Maako 16:14-18; Luka 24:36-49)
19PaSondo bushiku bweenka ubo macolesha, bashikwiiya bakalinga kubungene muŋanda ashisasa kashicalitwe cakutanjila muntu ceebo bakalinga kuloonda baJuda. Mpomunyaawo Jesu wakaboneka pakati kabo akwaamba ayi, “Luumuno lube amwebo.” 20Ndyaakamana kwaamba boobo, wakabatondesha maansaakwe akumbafu nkwaakayaswa. Bashikwiiya bakasangalala abuumbi kubona Mwaami wabo. 21Jesu wakabaambila alimwi ayi, “Luumuno lube amwebo! Ono bweenka baTa mbobakantuma, anebo ntoomutuma mbweeke ubo.” 22Lyalo wakabayoyela akubaambila ayi, “Amutambule Mushimu Usalashi. 23Na mwalekelela muntu uli woonse shibiibi shakwe, ingayi ndushinisho walekelelwa. Ono na mwabula kumulekelela, ingayi ncakwiila teshi akalekelelwe.”#Mate 16:19; 18:18
Shakutashoma kwakwe Tomasi
24Ono Tomasi (wakalinga kwiitwa ayi Mpuundu,) womwi wa bashikwiiya, taakalingaawo Jesu ndyaakaboneka kubashikwiiya bakwe bamwi boonse. 25Aboobo bashikwiiya bamwi abo bakamulwiita ayi, “Twababona Baami!”
Tomasi wakabakumbula ayi, “Inga nshisuminiiwo, sombibo nkabone shilonda sha misipikili mumaansaakwe akwinjisha munwe wangu mushilonda isho alimwi alyaansa lyangu kumbafu nkwaakayaswa lisumo.”
26Ndipakeenda nsondo, bashikwiiya alimwi bakalinga kubungene muŋanda. Tomasi alakwe wakalingaamo. Shisasa shakalinga kucalitwe, sombi Jesu wakesa weemikana pakati kabo akwaamba ayi, “Luumuno lube amwebo!” 27Lyalo wakaambila Tomasi ayi, “Njisha munwe wako apa alimwi ubone amaansaangu. Fungulula lyaansa lyako unjishe kumbafu shangu. Ono cileke kutonsha, ushome.”
28Tomasi wakaambila Jesu ayi, “NoBaami bangu, nobaLesa bangu!”
29Jesu wakamwiipusha ayi, “Sa washooma ceebo wamboona? Balicite coolwe abo bashoma kabatana kubona.”
Ceebo cinene ca libuku ili
30Nshiinji shaankamiko nshaakacita Jesu pameenso abashikwiiya bakwe, shitalembetwe mulibuku ili. 31Sombi ishi shakalembwa kwaamba ayi mushome ayi Jesu ngoUsalitwe, Mwanaakwe Lesa alimwi ayi kwiinda mukumushoma, mube abuumi butamaani.
Currently Selected:
Joni 20: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
