2 Makabisi 13
13
Menelausi mbwaakacaikwa
1Mumwaaka wa 149, Judasi ababye bakanyumfwa ayi Antyokusi Yupata utoosa kuJuda abeshilumamba bakwe baanji baanji. 2Bakanyumfwa alimwi ayi mucafwilishi wakwe Lisiyasi uyo wakalinga mweendeleshi wakwe munene ngomutanjilili waŋanda yankondo, wakalinga anguwe. Wakalinga kucite likoto lyabeshilumamba baciGiliki balwanina paanshi 110,000, balwanina pamaaki 300 ashikoci kabacite amipeeni ikolete.
3Menelausi wakapakana ambabo, lakwe uyo ceebo camaano abubeshi abumpelenge wakalinga kumuyumya yumya Antyokusi, sombi kuteshi ayi wakalinga kusunina shibotu cishi cakwe sobwe, sombi lakwe wakalinga kuyeeya ayi Mwaami utoomukalika pacuuna cakuba Mupailishi Munene. 4Sombi Lesa, Mwaami wa baami, wakalengesha ayi Antyokusi akalalile muntu mubiibi uyo. Bushiku bumwi Lisiyasi wakaambila mwaami ayi mapesho oonse aya akesa ceebo cakwe Menelausi. Aboobo mwaami wakapingula ayi Menelausi abwesekwe, akuyaakwe kuBeleya mukupaila kweenka uko pakukonkela nshila iyo njakashibila. 5Kundabala ya Beleya kwakalinga ŋanda ilaamfu mamita 22, yakalinga kuswite milota, yakalinga kucite caandaanda mukati. 6Mweenka umo mobakalinga kuwaala muntu usampula tulesa twabo nabi kucita cibiibi cimwi cinene, ayi afwite mweenka umo. 7Menelausi mbwaakafwa bweenka ubo, muntu wakalinga kusampula milawo. Tekwakalingawo shikumubika mucuumbwe. 8Sheenka ishi sheshakalinga kweelete kucitika kuli nguwe, pakucana ayi wakabishila cipaililo cakwe Lesa cakulambilaawo, mulilo wancico amilota yancico shoonse isho shilisalalite. Aboobo alakwe wakafwa kwiinda mukumuwaala mumilota.
Nkondo yakalinga pafwaafwi andabala ya Modini
9Lyalo mwaami Antyokusi wakalinga kwisa mumoyo kamuswite kulisumpula kwabushincinko, wakalinga kusuni kubacitila shibiibi baJuda shindaawo pali sheesho beeshi nshobakacita. 10Judasi ndyaakanyumfwa sheenka ishi, wakaambila bantu bakwe ayi banoopaila mashiku amalumwi, ceebo ono bakabula lucafwo kwiinda kalekale, alimwi balwani bakalinga pafwaafwi kubanyaya milawo yabo, cishi cabo aŊanda yakwe Lesa. 11Banoosenga Lesa ayi atasuminishi bantu bakwe abo bakalinga batalika conoono kukala abuumi bwakuliiba kuwita mumaansa abantu basampula Lesa. 12Lyalo boonse bakapaila bweenka ubo pantu pomwi kabasenga Mwaami Lesa Shinkumbu, kumwi kabalila akutalya, akuliwaala paanshi inshiku shotatwe. Pesule pasheeshi Judasi wakabayumya yumya, akubaambila ayi balibambile kulwana.
13Bakapangana cabushishi abacinenenene, akusuminishanya shakulwana nkondo amwaami uyo mukushoma lucafwo, lwakwe Lesa, ayi beshilumamba bamwaami batanjili mucishi caJuda akubwesa ndabala ya Jelusalemu. 14Lyalo mukushoma Mulengi wacishi capaanshi, wakalengesha bantu bakwe ayi balwane nkondo kutaboola mwisule, akusumina kufwita Milawo, Ŋanda yakwe Lesa, ndabala yabo, cishi cabo a milawo akuyaka misumba pafwaafwi aku Modini. 15Kuswawaawo wakashibisha bantu liswi lya nkondo ayi, “Kukoma kulaswa kuli Lesa.” Lyalo Judasi wakasala bacikula bwangu bayumu kuyaabo mashiku enkaayo mukulwana kumisumba yankondo ya mwaami, kweenka uko bakacaya balwani bakalinga 2,000. Bantu bakwe bakayasa nsofu yakalinga kutanjilila shibye pantu pomwi awakalinga kutantiteewo. 16Aboobo mumisumba yabalwani mwakesula cifulunganya aboowa, lyalo Judasi abantu bakwe bakaboolela ndibakamana kukoma. 17Sheenka ishi shakacitika ciindi cakumuyamaca, lyalo ishi shakacitika ceebo calucafwo lwa Mwaami Lesa.
Antyokusi wasanu mbwaakapa cibusa abaJuda
18Mwaami Antyokusi ndyaakalibonena pafwaafwi ayi baJuda mbayumu kukoma abuumbi, wakayeeya kubakoma mumaano. 19Wakakumaanobo ku Betisuwa, ndabala imwi iyumu yabene Juda, sombi bene Juda bakababoosha bantu bakwe. Bakeelesha alimwi, sombi baJuda bakabakoma. 20Lyalo Judasi wakatumisha bantu bamundabala iyo shintu shisunikwi. 21Sombi Lodokusi, wamulikoto lya baJuda, wakashibisha balwani bushishi bwabeshilumamba bene Juda. Aboobo Judasi wakamuyandoola, akumucaya. 22Mwaami wakabandika ciindi cabili abantu bakuBetisuwa, lyalo bakasuminishanya boonse, sombi balo bakamukoma alimwi. 23Pesule lyasheeshi mwaami Antyokusi wakanyumfwa ayi Filipo, uyo wakamushiila mulimo wakulama Ŋanda yankondo ku Antyoki wakamubukila, mpeeke wakapenga abuumbi. Lyalo wakanyumfwaabo, akubasuminisha isho shobakaamba, kushomesha ayi ulaakubacitila cabululami. Wakapakana abo, kubenga mulambu, wakalemenesha Ŋanda yakwe Lesa, wakapa shipo shiinji. 24Wakamutambula akabotu Makabisi, lyalo wakasala Egimonidesi ayi abe mweendeleshi kutalikila kuPitolemaisi akushika kuGela. 25Pesule lyasheeshi mwaami Antyokusi wakaya kuPitolemaisi, sombi bantu bakooko bakamukalalila ceebo cacipangano ncaakacita abaJuda balo bakakaka kucisumina. 26Lisiyasi wakatanta peculu akwaambilisha bubotu bwacipangano ico. Lyalo myooyo yabantu abo yakamulekelela, Lisiyasi amwaami bakaboolela kuAntyoki. Mboshakacitika ubo ciindi mwaami Antyokusi ndyaakaya mukulwana abaJuda, wakaboolakobo.
Currently Selected:
2 Makabisi 13: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.