2 Makabisi 14
14
Alikimusi mbwaakabekesha Judasi
Alikumusi mbwaakapikisha Judasi
1Ndipakeenda shaaka shotatwe, Judasi abantu bakwe bakanyumfwa ayi Demetiliyasi, mwanaakwe Seleyukusi, wakaya kucito caTilipolisi a likoto linene amaato aanji, 2alimwi ayi wakabwesa cishi coonse, wakacaya Antyokusi pantu pomwi amucafwilishi wakwe Lisiyasi. 3Alikumusi, uyo wakalekale wakalinga Mupailishi Munene wakalibisha kashanga ciindi cilya kupilingana, wakanyumfwisha ayi takoonshi kukala muluumuno nabi kusebensa mulimo waku Cipaililo Cisalalite. 4Lyalo wakaya ku mwaami Demetiliyasi mumwaka wa 151, kuya mukumupa mushini wagolodi amalala, alimwi amisampi ya maolifi isho nshakalinga kushibite kubenga ku Ŋanda yakwe Lesa. Pabushiku ubo takuuwo cimwi ncakacita. 5Kuswawaawo wakacana ciindi cakucita nshakalinga kusuni shabuluya, pabushiku Demetiliyasi ndyaakamwiita kulibungano lyabeendeleshi bakwe, akumwipusha miyeeyo yabaJuda asheesho shobasuni.
6Mpomunyaawo Alikumusi wakakumbula ayi, “Bene Juda beetwa ayi baAsideya, muntanjilili wabo ngu Judasi Makabisi, bakayuminabo kulwana nkondo, akuteeya toose, aboobo cishi citokwaalilwa kukala muluumuno. 7Nciceeco ncobakakushila pacuuna ca Mupailishi Munene ico ncondakatambula kuswa kubashali bangu, ntokwaamba shakuba Mupailishi Munene, ono ndesookuno. 8Pakutalika ndisuni kulama amoyo walushinisho shoonse shicatikisha mwebo nobaami, alimwi ndisuni kucafwa babyeesu bali kucishi cinemisheesu, ceebo cishi cesu coonse citoopenga asheesho shabobulya shobatoocita bantu aba. 9Mwebo nobaami, mulishishi shoonse ishi, ono toosenga nkumbu shanu isho shishibikitwe aboonse. 10Ncakwiila ciindi coonse Judasi ceeshi anooli muumi, nciyumu mucishi kuba aluumuno.”
11Lakwe ndyakaamanisha kwaamba maswi aya, beendeleshi bapatite Judasi, bakayunga bukali bwakwe Demetiliyasi. 12Aboobo mwaami Demetiliyasi wakeeta Nikanoli, uyo wakalinga mutanjilili wa likoto lya nsofu, akumubika ayi abe mweendeleshi wakuJuda, akumutuma kweenka uko. 13Wakamwaambila ayi akacaye Judasi akupalanganya bantu bakwe, lyalo akabike Alikimusi kuba Mupailishi Munene ku Ŋanda yakwe Lesa yabulemu. 14Lyalo boonse batashomi bamucishi caJuda, abo bakacica nkondo yakwe Judisi, bakabungana akunyumfwana a Nikanoli, kabayeeya ayi balo balakwikala kabotu ceebo camapesho amakatasho awita bene Juda.
Nikanoli mbobanyumfwana aJudasi
15BaJuda ndibakanyumfwa ayi Nikanoli utoosa mukulwana, alimwi bantu batashomi bapakanaakwe, bakalitila bulongo kumitwi akutalika kupaila kuli Lesa uyo wakasala coonde ayi cibeewo lyoonse, lakwe ngucinjilisha bantu bakwe munshila ikankamika. 16Lyalo mutanjilili wabo ndyaakapingula, beshilumamba bakanyamuka akuya mukulwana abalwanibabo pafwaafwi amushi wa Desawu. 17Simoni, mukwabo Judasi wakatalikila kulwana a Nikanoli. Paciindi ciniinibo kwakaboneka ayi Simoni wakalinga kuya bukomwa ceebo cakuya cifundumukila.
18Nabi cakalinga boobo, Nikanoli wakeeshiba ayi bantu bakwe Judasi, batekubonesha buyumu bwabo alimwi batekulwana cabusankwa pakusuna kufuna cishi cabo, wakaloonda kumanisha makani aya kwiinda mukutila bulowa. 19Aboobo wakatuma Posidoniyusi, Tewodotusi alimwi aMatatiyasi, ayi baye mukunyumfwana abaJuda.
20Ndibakabandika kabotu makani oonse, mutanjilili wabo wakabashibisha bantu bakwe, lyalo ndibakabona ayi boonse bacatana pantu pomwi, bakanyumfwana sha cipangano. 21Bakasala bushiku bwakaamba ayi bamatanjilili bobilo abo bakakumane beenka palubasu. Kwakashika cikoci comwi kuswa kulikoto lyomwi lyabeshilumamba abo, lyalo bakabika shuuna shabulemu pamusena uli kabotu. 22Sombi Judasi wakalinga wasisa beshilumamba bamwi mumisena yeelete, kuloonda kwaamba ayi ndabona balwanibabo balakonsha kucita shintu shimwi shiteelete mukubabeca. Sombi bobilo aba bakabandikabo kabotu.
23Nikanoli wakala kuJelusalemu kutacita cintu cibiibi, lyalo wakababoosha bantu boonse balya mbaakapanaakwe. 24Wakalinga kusuni ayi Judasi anookalaakwe ciindi coonse, ncakwiila bobilo aba bakaba beshicibusa cancinencine. 25Nikanoli wakalinga kwaambila Judasi ayi eebe, abe abaana. Judasi wakeeba, lyalo wakakalikana akuba mbuli bantu boonse.
Nikanoli mbwaakabukila Judasi
26Alikumusi ulya ndyaakabona Nikanoli aJudasi mbobakanyumfwana kabotu, wakabwesa cipepala cacipangano cilya akuya kuli Demetiliyasi. Wakamwaambila ayi Nikanoli taatooshomeka kubulelo, ceebo wakasala Judasi ayi akalye liina lyakwe aakufwa. 27Mwaami wakakalala, lyalo shintu nshakabeca muntu mubiibi uyo nshakaamba shakabusha bukali bwa mwaami. Aboobo mwaami Demetiliyasi wakalembela Nikanoli nkalata yakwaamba ayi wakakalala acipangano cabo, lyalo wakapingula ayi atumishe bwangu Makabisi ku Antyoki kaangitwe. 28Nikanoli ndyaakatambula makani aya, wakapenshekwa mumoyo wakwe, wakanyumfwa nkumbu ceebo bakamukakatisha kupwaya Cipangano ico, kakuli Judasi taakwe kucita cintu nabi comwi citaluleme. 29Sombi cakalinga ciyumu kutyola mulawo wamwaami. Lyalo wakatalika kuyandoola nshila yakucatilaamo Judasi kwiinda mukumunyengelela. 30Lakwe Judasi ndyaakabona ayi Nikanoli tatomupa bulemu mbuli kataanshi, alimwi ayi nawakumanaakwe taaku ndyaakalinga kumusekela. Lyalo wakeshiba ayi kucinca kwakwe kutondesha ayi kuli ncaakalinga kumuyeeyela cibiibi mumoyo wakwe.
31Nikanoli ndyaakabona ayi Judasi wacenjela, wakaya kuŊanda yakwe Lesa inene alimwi isalalite, ciindi bapailishi ndibakalinga kubenga milambu mbuli mbobacita nshiku shoonse, lyalo wakapingula ayi bamwaabe Judasi kuli nguwe. 32Bapailishi bakashinisha akulumbila ayi tabeshiiko nkwaabete muntu uyo ngwatoyandoola. Lyalo Nikanoli wakanyamuna lyaansa akutondeka musena Usalalite Wiindaawo ulya akwaamba ayi, 33“Na mwaalilwe nkumpa Judasi ayi mwaange, ntoopwayoola Ŋanda yakwe Lesa iyi, Cipaililo ntoociwishila paanshi. Lyalo pamusena pano ntooyaka ŋanda yakwe Dinonyisusi, kalesa kesu.”
34Ndyaakamana kwaamba maswi aya, wakaswaako. Peenka apo bapailishi bakanyamuna maansa kwiculu, bakatalika kupaila kuli Lesa, uyo wakalinga kucinjilisha mushobo webo ciindi coonse. Bakaamba ayi, 35“Mwaami Lesa mwiine wa shoonse, taakuncobula, cakakusangalasha ayi pano pabe ŋanda njokalaamo pakati kesu. 36Ono webo nosalalite, Mwaami Lesa Usalalite lyoonse, Ŋanda iyi njotwasalasha onoono wilaame kabotu ayi itabishikwi alimwi.”
Lasisi mbwaakafwa
37Muntu umwi liina lyakwe nguLasisi, womwi mubacinenenene bamuJelusalemu, wakamubekesha kuli Nikanoli. Wakamubekesha uyo wakalinga muntu usuni babye bamucishi ico, alimwi ayi bantu bakalinga kumulemenesha lyalo kabamwiita ayi ngu ishi waba Juda. 38Munshiku shakalekale bene Juda kabateendelani abantu bamishobo imwi, bakalinga bamupa mulandu ceebo cakulambila kwabene Juda, cakwaamba ayi taakalinga kuloonda kushibikwa ayi ngu mwine Juda ceebo camushobo wakwe. 39Pakubonesha ayi ulipatite baJuda, Nikanoli wakatuma beshilumamba beendilila 500 ayi bakamucate. 40Wakalinga kuyeeya ayi utoopensha baJuda na amwaange eenka uyo. 41Ciindi beshilumamba ndibakalinga pafwaafwi kubwesa ŋanda ilaamfu yankondo kabatyola cisasa paminjililo, bakaleta mulilo, akutenta shisasa shoonse. Lasisi ndyaakabona ayi bamushinguluka, wakaliyasa mupeeni wakwe. 42Wakasala kufwa mubulemu, kwiinda kuwita mumaansa abamucita shibi akunyumfwa musebaanyo uteelete bulemu bwakwe.
43Ceebo cakufwambaana, takwe kulisaya bweelete amupeeni, wakaalilwa kulicaya. Ciindi ceenka ico beshilumamba bakatalika kwinjila kumulyango. Mpomunyaawo lakwe wakaliyumya, wakacica akutanta palikonko lya muumbu waliwaala paanshi pakati kabalwani. 44Boonse bakamutalamuka paniini, bashiya musena, lakwe nkuwita peenka apo. 45Kaaciyoya sombi kakalalite, wakanyamuka, malowa kaya buswa, mushilonda nshakalicisa mumubili wakwe, wakacicila pakati pabantu balya, weemikana pamwandaami wakucalishaako. 46Malowa akwe oonse akaswa ono, wakakusha matumbo akwe, waacata mumaansaakwe. Wakabawaalila bantu abo wapaila kumwiine wa buumi akuyoya ayi amuboosheshe sheenka ishi. Ncakwiila ubo mbwaakafwa.
Currently Selected:
2 Makabisi 14: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.