2 Makabisi 12
12
BaJuda bakela kuJopa mbobakacaikwa
1Lisiyasi ndyaakamana kupangana a Judasi, wakaboolela kumwaami, lyalo bene Juda bakatalika kulima myuunda yabo. 2Sombi beendeleshi bamwi bamisena yakubelenga, mbuli Timoti a Apolonyasi mwanaakwe Genayeyusi, alimwi aIlonyomusi, Demofoni, alimwi a Nikanoli, mweendeleshi waku Kipilo, tabakwe kubasuminisha baJuda kukala muluumuno.
3Bantu bamwi bakuJopa bakacita shintu shibiibi mbuli sheeshi: bakeeta baJuda mbobakalaabo, ayi bese abakaabo, abanababo mumaato ayo ngobakabambila, kuboneka anga tapalingawo lupato pakati kabo. 4Ishi shakalinga shintu shobakapangana bantu bekala mundabala iyo. Lyalo baJuda bakasumina, anga mbantu basuni luumuno, kutayeeya cibiibi cili coonse. Sombi ndibakashika pakati kamulonga, bakapisha mumaanshi. Bantu boonse aba bakalinga 200.
5Judasi ndyaakanyumfwa shalukutwe isho shakacitika ku mushobo wakwe, wakashibisha beshilumamba bakwe. 6Lyalo bakapaila kuli Lesa, Mombooloshi ululeme, bakaya mukubalwana bantu abo bakacaya bamakwabo. Bakatenta ŋanda shoonse shakuncito amaato oonse ciindi camashiku, lyalo boonse bakalinga bacicilaamo bakabacaya amupeeni. 7Pakucana kwaamba ayi minjililo ya ndabala iyo yakalinga kucalitwe, bakaswaako kabayeeya kuboolela cakufwambaana, ayi bakanyonyoole ndabala yaJopa yoonse. 8Sombi Judasi wakanyumfwa ayi bantu bakuJaminiya bakalinga kuyeeya kucita baJuda bakooko shintu shamushobo uyu. 9Aboobo wakalwana abene Jaminiya ciindi camashiku. Wakatenta maanda akucito amaato oonse, cakwaamba ayi cibilibili camulilo cakalinga kuboneka kuJelusalemu kulampa makilomita makumi osanwe.
Judasi mbwaakakoma nkondo yaku Gilyadi
10Ndyaakalinga kuswa kuJaminiya, wakeenda munsinso ulaampa makilomita obilo mukusuna ayi akalwane a Timoti, kwakashika bamaAlabu 5,000 balwanina paanshi alimwi 500 balwanina pamaaki, kwisa mukulwanaabo. 11Nkondo yakakomena abuumbi, sombi Lesa wakalinga kubacafwa, paceebo ceeci Judasi ababye bakakoma balwanibabo. Ndibakakomwa, bantu batakalikene aba bakasenga Judasi ayi bapange cibusa, bakashomesha ayi batoobapa baJuda shifubwa akunoobacafwa mushintu shoonse. 12Pakubona kwaamba ayi bantu aba balakonsha kubacafwa mushintu shiinji, Judasi wakasumina ayi kube luumuno, lyalo bakanyumfwana aJudasi, akuboolela kumisumba yabo.
13Pesule lyasheeshi Judasi wakalinga kusuni kubwesa ndabala imwi beene njobakayumisha amuumbu shabulongo amakonko amabwe. Mukati kandabala iyi mwakalinga bantu batashomi bamishobo iinji. Liina lyandabala iyi yakalinga kwiitwa ayi Kasipini. 14Bantu bamundabala iyo bakalinga kushoma buyumu bwamuumbu yabo akufula shakulya kwashobakalinga kucite. Bakalinga kutukana baJuda akubasampula alimwi bakalinga koolobesha pakusampula liina lyakwe Lesa. 15Sombi Judasi abantu bakwe, bakapaila kuli Lesa mwine cishi capaanshi, uyo wakapwayoola muumbu shakuJeliko muciindi cakwe Joshuwa, kutasebensesha shilwanyo shankondo, bakacicila kumuumbu calubilo kabakalalite. 16Bakabwesa ndabala iyo mukwiinga kwakalinga kuyanda kwakwe Lesa. Bakacaya bantu baanji baanji, kucana kwaamba ayi Cishiba cakalinga pafwaafwi, cakesula malowa.
Judasi mbwaakakoma beshilumamba bakwe Timoti
17Ndyaakaswa kundabala ya Kasipini, Judasi abantu bakwe bakeenda mushinso ulaampa makilomita 150 kuya mukushika kuKalakisi, uko kwakalinga baJuda beetwa ayi Tobi. 18Taakwe kumucanaako Timoti kweenka uko. Lakwe wakaswaako kutacitawo cintu, sombi wakashiya likoto linene lyabeshilumamba kweenka uko. 19Bamatanjilili bobilo bakwe Makabisi, Dositeyusi aSosipata, bakaya akubanyonyoola bantu Timoti mbaakashiya kucaanda cankondo. Boonse pantu pomwi bakalinga kwiindilila shuulu likumi. 20Lyalo Makabisi wakapansaanya beshilumamba, akusala beshikubatanjilila. Ndyaakamanisha kucita boobo, wakacicila kuya mukukumana a Timoti uyo wakalinga kucite beshilumamba balwanina paanshi bali 120,000 abeshikulwanina pamaaki 2,500. 21Ndyaakanyumfwa ayi Judasi utoosa, Timoti wakatuma banakashi, baana ashintu ku Kalinayimu, ceebo musena uyo wakalinga uyumu kulwana alimwi cakalinga kushupa kushikako, mukwiinga nshila yakalinga kwiinda pakati katulundu. 22Sombi likoto litaanshi lyakwe Judasi lyakabapolela, balwanibabo bakanyumfwa boowa akututuma ndibakabona nkusu shakwe Lesa uyo ubona shintu shoonse. Aboobo bakatalika kucica anga mbashincinko, ncakwaamba ayi baanji bakalinga kulicisa mulilwabo beene mukuyasana mipeeni yabo. 23Lyalo Judasi wakabakonkela ankusu shoonse, wakabacaya bantu bamucita shibi abo, aboobo wakacaya bantu 30,000 pantu pomwi.
24Alakwe Timoti wakacatwa abeshilumamba bakwe Dositeyusi aSosipata. Sombi mukubacenjelela wakababeca ayi bamusuminishe kuloboka. Wakababeca ayi lakwe wakalinga kwaangitwe bameenshiwabo abamakwababo baanji muntolongo yakwe, lyalo naawafwa, nkokwaamba ayi abalo nkufwa. 25Wakababeca kwiinda mukwaamba maswi aanji kabashomesha ayi ulaakubakusha bantu abo mukutabapensha. Peenka awo baJuda balya bakamuleka ayi akapulushe bamakwababo.
Judasi mbwaakakoma shimwi
26Pesule lyasheeshi Judasi wakaya ku Kalinayimu alimwi aku ŋanda njobalambilaamo kalesa nkobeeta ayi Atagatisi. Kweenka uko wakacaya bantu bali 25,000. 27Ndyaakabapalanganya akubanyonyoola balwani abo, Judasi wakaya abeshilumamba bakwe kundabala iyumu yakuEfuloni, uko nkwaakalinga kwikala Lisiyasi abantu baanji baanji bamishobo mishobo. Lyalo bakanyonyoola ndabala alimwi acoonde. Kuswawaawo bakaya mukunyonyoola ndabala ya Efuloni amalinga anjiyo uko Lisiyasi abantu boonse bamishobo mishobo. Bacikula bwangu bayumu bakekala panembo lya muumbu akulwana nkondo cakutaboola mwisule, lyalo mukati kandabala mwakalinga shilwanyo shankondo shiinji. 28Sombi baJuda bakapaila kuli Lesa Shinkusu Shoonse uyo nkusu shakwe shilatyola buyumu bwabalwani boonse. Aboobo bakabwesa ndabala iyo, akucaya bantu 25,000 abo bakalinga kwikala mundabala iyo.
29Ndyaakaswa kooko wakacicila kuSitopoli, kundabala uko kulampa makilomita 120 kuswa kuJelusalemu. 30Sombi bene Juda bekala uko bakaambila Judasi ayi bene Sitopoli bakalinga kubacitila nkumbu a kunyumfwanaabo baJuda ciindi coonse camapesho abo. 31Aboobo Judasi ababye bakalumba bantu bene Sitopoli, akubaambila ayi batacileki kubacitila nkumbu bantu bamushobo wakwe. Pesule wakashika kuJelusalemu ciindi kacili pafwaafwi cakutalika kusekelela nshiku shashibelu.
Judasi mbwaakakoma Gogiyasi
32Ndishakeenda nshiku shakusekelela shiitwa ayi Pentekositi, Judasi wakaya mukulwana aGogiyasi uyo wakalinga kulela kuIdumeya. 33Gogiyasi wakesa abeshilumamba 3,000 balwanina paanshi a 400 balwanina pamaaki. 34Bakatalika kulwana, baJuda bamwi bakacaikwa. 35Sombi muntu umwi muJuda wamumukowa wabene Tubi, liina lyakwe Dositeyusi, ulwanina palyaaki alimwi muyumu abuumbi, wakacata Gogiyasi kumunganjo akumukwela, pakusuna ayi amucate caali muumi muntu uyo wakashinganishikwa. Sombi mulwani umwi mwine Taliki, ulwanina palyaaki, wakasotokela Dositeyusi, akumutimbula lyaansa. Lyalo Gogiyasi wakacica waya kundabala ya Malisa.
36Sombi bantu bakwe Esidiliyasi bakalwana nkondo ciindi cilaamfu, bakatalika kulema. Lyalo Judasi wakapaila kuli Lesa ayi abacafwe alimwi abe mutanjilili pankondo iyo. 37Ono Judasi, wakatalika kwiimba nyimbo mumushobo wabamashali bakwe, nyimbo ya nkondo. BaJuda bakasotokela bantu bakwe Gogiyasi kabatabengashite akubatandaanya boonse.
Mipailo yabantu abo bakafwa munkondo
38Nkondo ndiyakamana Judasi wakabunganya beshilumamba bakwe akuya kundabala ya Adulamu, ceebo bushiku bwa Cibelu bwakalinga pafwaafwi, bakalisalasha bweenka mbuli mbobakashibila, lyalo bakalemenesha bushiku bwa Cibelu kweenka uko. 39Macuunsa cuunsa kwakalinga kusunikwa ayi bakabwesa mituntu yababyaabo bakacaikwa, akuya mukubabika kufwaafwi abamashalibabo. 40Sombi uli woonse wakacaikwa wakacaninwa kafweete mumunganjo wakwe kamuli shintu shimwi shakabengwa kutulesa twine Jaminiya, shintu shikashikwa a Milawo yabaJuda. Peenka apo bakashiba ayi bantu aba bacaikwa ceebo casheenka isho. 41Boonse bakalumbaisha nshila sha Mwaami Lesa, moomboloshi ululeme, uyo ubonesha shintu shishisitwe patuba. 42Lyalo bakatalika kupaila, kusenga Mwaami Lesa ayi ashiminganye shibiibi shabo isho. Aboobo Judasi, muntu ulya, wakaambila bantu bakwe ayi baleke kucita shibiibi, pakwiinga beene bakalibonena shakawita babyaabo ceebo cashibiibi shabo. 43Lyalo wakasonkesha bantu bakwe boonse akucana maali 2,000 asilifa, akwaatumisha kuJelusalemu, ayi bakabenge milambu yakulekelelwa shiibi. Munshila iyo, wakacita cintu cibotu alimwi cinene abuumbi, ceebo wakalinga kushoma kubuka kubafu. 44Nakwiinga cakaba cintu cabuluya alimwi citacite ncito kupailila bafwite, nicakaboneka ayi tashomi ayi bafwite balakubuka. 45Miyeeyo yoobulya yakwe Judasi yakalinga inene alimwi ibotu. Wakalinga kushoma ayi bantu boonse basebesela Lesa balaakutambula cipo cibotu. Nceceeco ncakabengela milambu yakulekelelwa shibiibi, ayi bafwite balya baangululwe mushiibi shabo.
Currently Selected:
2 Makabisi 12: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.