2 Makabisi 11
11
Judasi mbwaakakoma Lisiyasi
1Ndipakeenda ciindi ciniinibo, Lisiyasi, mucafwilishi wa mwaami alimwi mukwabo, uyo weenka wakalinga mwaami munene wa mfulumende, wakapenshekwa mumoyo wakwe asheesho shakacitika. 2Wakabunganya beshilumamba balwanina paanshi 80,000 pantu pomwi abalwanina pamaaki boonse, akuya mukulwana abene Juda. Wakalinga kuyeeya kusandula ndabala ya Jelusalemu kuba ndabala yabene Gilisi. 3Wakalinga kusuni ayi asonkeshe Ŋanda yakwe Lesa yaku Jelusalemu, bweenka mbuli mbwaacita mumisena imwi njobalambilaamo tulesa twakubeca. Wakalinga kusuni alimwi ayi mwaaka uli woonse akese akoolishe musena wa Mupailishi Munene. 4Taakwe kushoma nkusu shakwe Lesa, sombi lakwe wakalinga kulisumpula ceebo ca shuulu shabeshilumamba bakwe, kubikaawo ashuulu shabeshilumamba balwanina pamaaki, ansofu shakwe makumi osanwe aotatwe. 5Lyalo wakashika kuJuda, KuBetisuwa, ndabala icite muumbu shankondo makilomita makumi otatwe kuya mukushika kuJelusalemu, akwishinguluka.
6Judasi Makabisi abantu bakwe ndibakanyumfwa ayi Lisiyasi washinguluka ndabala yabo yankondo, bakapaila ku Mwaami Lesa, bakalinga kulilishaanya kuli Lesa ayi abatumine munjelo mubotu ese apulushe bene Isilaeli. 7Makabisi ngomutaanshi kubwesa shilwanyo shakwe, akuyumya yumya babye ayi bataloondi nabi kuswa myooyo pantu pomwi alakwe, pakucita boobo bacafwilishe bamakwabo. Mpomunyaawo boonse bakacicila kweenka uko. 8Kabatana kuya kulaale kuswa kuJelusalemu, bakabona womwi wakalinga kutantite palyaaki kafwete shisani shituba, kabatanjilila, shilwanyo shagolodi kanyamwite mumaansa. 9Lyalo boonse bakalumba Lesa wankumbu, bakaba ankusu, akulibaambila kulwana, kuteshibo abantu sobwe, sombi abanyama bakali, nabi muumbu shasheela. 10Bakasena kabaya bweendela mumundando wankondo kabacite shikubacafwa uswa kwiculu, ceebo Mwaami Lesa wakababeta nkumbu. 11Bakaliwaala pabalwanibabo anga ninkalamu, akucaya bantu 11,000, balwanina pamaaki 1,600, bamwi bakacica. 12Baanji mulimbabo bakacica kabayasitwe kabasowete shilwanyo shabo. Lisiyasi alakwe wakapulusha buumi bwakwe ndyaakacica cilensha nsoni.
Lisiyasi mbwaapangana shaluumuno abaJuda
13Sombi Lisiyasi uyo taakwe kuba muluya, ndyaakalinga kuyeeya lipesho lyakamuwita, wakanyumfwisha kucana ayi beneJuda cakashupa kukomekwa, ceebo Lesa Shinkusu ngowakabacafwa. Lyalo wakabatumina nkombe, 14kubanyengelela shakunyumfwana muluumuno. Lyalo wakashomesha ayi utoonyengelela mwaami ayi abe cibusa wabo. 15Makabisi ndyaakalangisha isho sheenga shabakalika kabotu bantu bakwe, wakasumina maswi oonse akwe Lisiyasi. Alakwe mwaami wakasumina shoonse isho Makabisi shakalembela Lisiyasi.
Nkalata Lisiyasi njakalembela baJuda
16Nkalata Lisiyasi njakalembela baJuda yakalinga bobulya:
“Ndime Lisiyasi utokwaansha likoto lyabaJuda boonse! 17Joni aAbusalomu abo mbomwakatuma kuno bakampa nkalata yanu, bakasenga ayi tumukumbule. 18Shoonse sheelete kushibisha mwaami ndakamushibisha kale, lyalo wakasumina shoonse isho sheenga shakonsheka. 19Na mwikale cakushomeka ku mfulumende, nebo ntoocita sheelete kumucafwa ayi shintu shimweendele kabotu. 20Lyalo ndatuma beshinkombe bangu pantu pomwi abene mishaanu ayi bese bamulwiite shoonse shotwanyumfwana. 21Kamucaala kabotu. Mwaaka wa 148 bushiku bwa 24 mweenshi wa Diyosikolintiyusi.”
Nkalata mwaami Antyokusi njakalembela Lisiyasi
22Nkalata yamwaami yakalinga bobulya:
“Ndime mwaami Antyokusi ntokwaansha mukwesu Lisiyasi! 23Pakucana kwaamba ayi ono bashalibesu bakakonkela tulesa twabo, swebo tulisuni kwaamba ayi bantu mucishi cesu banoosebensa milimo yabo cakutapenga. 24Twakanyumfwa shakwaamba ayi baJuda tabasuni kukonkela bwikaalo bwaba Giliki, bweenka mbuli beshiwesu mbobakalinga kusuni, sombi balisuni kukonkela bwikaalo bwabo mbuli mbobakashibila. 25Ono pakucana ayi nebo shisuni mushobo wabo kunoopenshekwa, ndapingula ayi ubaboosheshe Ŋanda yakwe Lesa, alimwi ubasuminishe kukonkela bwikaalo bwabashalibabo. 26Ncibotu kwaamba ayi ubashibishe sheenka ishi akubalwiitilisha ayi tupangane ambabo cibusa, kucita ubo ayi beshibe shotusuni batalike kutushoma, lyalo bekale kabeendelesha shintu shabo kabakondetwe.”
Nkalata mwaami Antyokusi njakalembela baJuda
27Nkalata ya mwaami kubene Juda yakalinga bobulya:
“Nebo, ne mwaami Antyokusi, tokwaansha bacinenenene babaJuda alimwi a bamaJuda boonse. 28Na muli kabotu, ubo bweenka mbotusuni swebo. Aswebo tuli kabotu. 29Meneyasi wakatushibisha ayi mulisuni kuboolela kumishaanu akunookonkela milimo yanu. 30Ono woonse usuni kuboolela kumishaabo kabutana kushika bushiku bwa pa 30 mweenshi wa Santikasi, ulakoonsha kuya muluumuno taaku cishupa. 31Twasuminisha ayi nobaJuda munoolya cakulya canu, lyalo munokonkela milawo yanu, bweenka mbomwakalinga kucita kalekale. Teshi pacanikeewo muJuda naabi womwi eshi akapenshekwe ceebo cashibiibi nshakacita mukutashiba. 32Tutootuma Meneyasi ayi ese amuyumye yumye. 33Kamucaala kabotu. Mwaaka wa 148, bushiku bwa 15 mweenshi wa Santikasi.”
Nkalata baLoma njobakalembela baJuda
34Abalo baLoma bakalembela nkalata baJuda bobulya:
“Ndiswe Kwintosi Meniyasi a Taitasi Manyosi, beendeleshi bakuLoma, tutoomwaansha nobaJuda. 35Isho sheenka Lisiyasi, shikamukowa wamwaami, shakamwaambila, aswebo twashisuminisha. 36Sombi isho shimwi shakayeeya ayi shilyeelete kwaambila mwaami, mushibandike nobeene kabotu kabotu, mwamana mutumine nkombe cakufwambaana, ayi tuye tukamwaambilileko ku mwaami, mukwiinga tutooya ku Antyoki. 37Lyalo mufwambaane, mutume bantu calubilo kwaamba ayi twishibe isho shomusuni. 38Amucaale kabotu. Mwaaka wa 150, bushiku bwa pa 15 mweenshi wa Santikasi.”
Currently Selected:
2 Makabisi 11: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.