2 Makabisi 10
10
Judasi mbwakasalasha Ŋanda yakwe Lesa alimwi
1Makabisi ababye bakeebwesa alimwi Ŋanda yakwe Lesa pantu pomwi andabala yaJelusalemu, Mwaami Lesa kabatanjilila. 2Wakapwayoola shipaililo isho beensu shebakalinga bayaka pasengwe lya ndabala, wakanyonyoola misena yabo imwi njebakalinga kulambilaamo. 3Ndyaakasalasha Ŋanda yakwe Lesa, wakayaka cipaililo cipya cakutulaamo milambu. Lyalo bakakunka mulilo wakupekesa alibwe, bakatula milambu, cintu catakalinga kucitika kwa myaaka miinji. Kumana bakatenta tununkila kabotu banyasha malampi akubika cimaande pameenso akwe Lesa. 4Ndibakamanisha, bakaliwisha paanshi kushishaawo lifumo akusenga Mwaami Lesa ayi atakabaleteli alimwi mapesho amushobo uyu, sombi nabakabishe akababete nkumbu pakubapensha, atakabaabi mumaansa amishobo imwi yabantu basampula Lesa batashomi Lesa babiibi. 5Bushiku ubo mbwakasalasha Ŋanda yakwe Lesa mbobushiku bweenka ubo beensu mbobakeebisha, bwakalinga bushiku bwa 25 mweenshi wa Kisilefu. 6Boonse bakakondwa akusekelela nshiku shili 8, bweenka mbuli mbobasekelela shimpaka. Ciindi ceenka ico bakalinga kwibaluka ayi nshiku tashibete kulaamfu, kunshiku shakusekelela cimpaka sheenka isho, ndibakalinga koona mutulundu amipeeni anga mbanyama bamuluundu. 7Sombi cino ciindi nkoli shicite maluba, misampi ya shisamu yeebeka alimwi amalala shili mumaansaabo kabaya ciimba nyimbo shakulumbaisha Lesa uyo wakabacafwa kusalasha kabotu Ŋanda yakwe. 8Pesule wakapanga mulawo ushibikitwe kubantu boonse, wakwaamba ayi baJuda boonse banookwibaluka nshiku sheenka ishi chaaka cili coonse.
Pitolemi Makiloni mbwaakalicaya
9Sheenka ishi shoshakacitika pa kufwa kwakwe Antyokusi, wakalinga kwiitwa ayi Epifanesi.
10Ono atubandike shakwe Antyokusi Yupata, mwanaakwe muntu uyo utapaili, ono twaambe paniini shibiibi shikonkela nkondo shakwe. 11Lakwe ndyaakaba mwaami wakabika Lisiyasi ayi abe mweendeleshi wamilimo mubwaami bwakwe, alimwi akucishi caSilya aFenisha. 12Pitolemi Makiloni ngowakatalika kucitila baJuda shiluleme pakwiibaluka shoonse shitaluleme isho shebakakumanaasho. Lyalo wakeelesha kubabeteka muluumuno. 13Paceebo ceeci babye bamwi bakaya mukubekesha kuli Yupata. Lyalo Makiloni wakalinga kunyumfwa bantu bakaamba ayi lakwe wakaaba cishi cakwe kubalwani, muceebo wakashiya Kipilo, ndabala iyo Filometa njaakamupa, akuya mukunyumfwana a Antyokusi Epifanesi. Ndyaakabona ayi bulemu bwamumanina kweelana ancito njakalinga kucite, wakalicaya kwiinda mukunwa ncefu.
Judasi Makabisi mbwaakakoma bene Idumeya
14Ciindi Gogiyasi ndyaakaba mweendeleshi wacishi caIdumeya, wakalinga kucite likoto lyabeshilumamba bashikufoola maali, lyalo shiindi shiinji bakalinga kulwana abaJuda. 15Kuteshibo ici ceenka, bene Idumeya bamwi bakalinga kwikala mushaanda shankondo shiyumu, tabakwe kucileka kulwana abaJuda. Bakalinga kubatambula kabotu bantu abo bakalinga kukushikwa kumishobo kuJelusalemu, lyalo bakalinga kukakatila ayi nkondo itamaani kuJelusalemu. 16Sombi Makabisi ababye, bakapaila akusenga ayi Lesa abacafwe, bakacicila kushaanda shankondo shaku Idumeya. 17Bakalwana ncankusu, lyalo bakabakoma abo mbobakalwanaabo pamuumbu, akubanyaya caanda cankondo ico. Bakabacaya boonse bakacanikaamo, aboobo bakacaya bantu bataleeli ku 20,000.
18Sombi bantu bali 9,000 bakacicila kushaanda shimwi, shankondo shobilo shiyumu abuumbi, kwalo uko bakalinga kucite shaanda shilaamfu shankondo abeshilumamba bakabashinguluka. 19Makabisi wakashiya Simoni, Josefe aSakeyo kweeka uko, pantu pomwi abantubabo, bakwanite kushinguluka shaanda isho. Lakwe wakaya kumwi nkobakalinga kumusuni calubilo. 20Sombi bantu bakwe Simoni bakalinga kusuni maali abuumbi, aboobo bakapekwa maali kubantu bakalinga mushaanda shilya. Ndibakatambula makilogilamu 64 asilifa, bakabasuminisha bamwi kuloboka. 21Lyalo Judasi ndyaakanyumfwa sheenka ishi, wakabunganya bacinenenene boonse babantu, wakabapa mulandu wakwaamba ayi bantu balya bakoolisha bamakwabo amaali, pakusuminisha balwani kuloboka akwisa mukulwanaabo alimwi. 22Lyalo bakabacaya bantu abo batashomeki, bamane kutasowa ciindi bakabwesa shaanda shobilo shankondo shilya. 23Ciindi coonse Judasi wakalinga kulwana nkondo, wakalinga kukoma, aboobo wakacaya bantu beendilila pa 20,000 mushaanda shankondo shobilo isho.
Judasi mbwaakakoma Timoti
24Sombi Timoti, ulya bene Juda ngobakalinga bakoma kale, wakabunganya likoto lyabeshilumamba beensu akuyaabo kuEsha mukubwesa bantu baanji batanta maaki. Bakesa ayi balwane baJuda akubanyonyoola. 25Lakwe ndyaakashika pafwaafwi, bantu bakwe Makabisi bakatalika kupaila kuli Lesa, bakalinanika milota kumitwi, akufwala masaka mucibuno. 26Bakakotamika mitwi paanshi pacitantilo cacipaililo, akupaila kuli Lesa ayi abacitile nkumbu, ayi abe mulwani wabalwanibabo, alimwi ayi banyonyoole balwani batoobalwana, bweenka mbuli mbwaakashomesha mumilawo yakwe.
27Ndibakamana kupaila, bakabwesa shilwanyo shabo akuswaamo mundabala. Ndibakashika pafwaafwi a balwanibabo, bakeemikana. 28Kumuyamaca bakatalika kulwana abalwanibabo. Balo bakalinga kushoma ayi batookoma kuteeshi kucishiba kulwana kwabo, sombi ceebo calucafwo lwa Mwaami Lesa, sombi bamwi balya bakalinga kushoma ayi bukali bwabo akucishiba kulwana sheeshi shibalengeshe kukoma. 29Nkondo iyo yakakomena abuumbi, balwani babaJuda bakabona kwiculu bantu bosanwe bakalinga kubala abuumbi, kabatantite pamaaki, acite sheela shagolodi kumulomo, kabatanjilila bene Juda. 30Bantu abo bakabika Makabisi pakati kabo, lyalo bakalinga kumucinjilisha ashisani shabo shasheela ashilwanyo shabo ayi atacisikwi. Bakalinga kuwaala mifwi ashimwi shibeka kubalwani babene Juda. Penkaapo balwani bakafulungana akutashiba cakalinga kucitika. Bakapalangana akukomenwa limwi. 31Bashikulwanina paanshi bali 20,500 bakacaikwa pantu pomwi abeshikutanta maaki bali 600.
32Timoti mutanjilili wabo wakacicila kundabala yankondo iyumu abuumbi yakuGesa, iyo Kayeleyasi ngowakalinga kulela. 33Bantu bakwe Makabisi bakakondwa ndibakabona sheenka ishi, bakaishinguluka ndabala iyo nshiku shone. 34Bantu bakalinga mundabala iyo bakalinga kushoma buyumu bwa ndabala, bakalinga kutukana abuumbi akunokwaamba maswi amusampu. 35Sombi macuunsa cuunsa bushiku bwasanu, bacikula bwangu makani obilo mulikoto lyakwe Makabisi, kabakalalite abuumbi ceebo cakutukana, bakayuma myooyo akutanta peculu lya muumbu. Lyalo mubukali bwabo bakalinga kuyasa uli woonse ngobakakumanaakwe. 36Babyaabo bamwi bakabakonkela akulwana abalwanibabo kulubasu lumwi. Bakashitenta shaanda shilaamfu shankondo, bakanyansha mulilo wankuni akubatenta abo bashikutukana kabali boomi. Bamwi batyola shisasa shandabala, akucalwita nshila beshilumamba babyaabo bakacaala pansengwe, lyalo ndabala yakaba mumansaabo. 37Bakamucana Timoti kayubite mumukalo utacite maanshi. Bakamucaya pantu pomwi a Kayeleyasi mukwabo, alimwi aApolofanesi. 38Ndibakamanisha shoonse ishi, bakeemba nyimbo shakusekelela akulumbaisha Mwaami Lesa uyo wakabacitila shibotu bene Isilaeli, akubalengesha ayi bakome boobo.
Currently Selected:
2 Makabisi 10: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.