1 Baami 6

Solomoni mbwaakayaka ŋanda yakwe Lesa

1Ndipakeenda myaaka ili 480, bene Isilaeli ndibakaswa kuIjipiti, mumwaaka wane Solomoni kaalela cishi ca Isilaeli mumweenshi wabili wiitwa ayi Sifu, Solomoni wakatalika kuyaka Ŋanda yakwe Lesa. 2Mukati yakalinga kulaampa mamita ali 27, mamita ali 9 mubufwaafwi alimwi mamita ali 13.5 kuya mwiculu. 3Ŋanda yakwinjililaako yakalinga mamita ali 4.5 mubufwaafwi alimwi mamita ali 9 mubulaamfu. Mubulaamfu yakalinga kweelene amusena Usalalite wiine. 4Lubumbu lwa Ŋanda yakwe Lesa lwakalinga kucite malyangolyango, aniini pansengwe kwiinda mukati. 5Kulubumbu lomwi alomwi nkolwakalingila pansengwe, nkokwaamba ayi kumbasu shobilo akumafutila aŊanda yakwe Lesa, kwakayakwa ŋanda ya maanda otatwe kuya mwiculu. 6Cipinda comwi acomwi ca ŋanda ya panshi cakalinga mamita ali 2.2 mubufwaafwi. Cipinda ca peculu cabili cakalinga mamita ali 2.7 mubufwaafwi alimwi cipinda ca peculu catatu cakalinga mamita ali 3.1 mubufwaafwi. Lubumbu lwa Ŋanda yakwe Lesa lwakalinga luniini kwiinda lwacipinda ca panshi, nkokwaamba ayi lubumbu lwakalinga kushimpila mulubye kutabika mitanti pakuyaka.

7Mabwe ayo ngobakalinga kuyakisha taakalinga kubeselwa mpobakalinga kuyakila Ŋanda yakwe Lesa, sombi bakalinga kwaabesela kooko nkwaakalinga kuswa. Aboobo uko kwakalinga kuyakilwa Ŋanda yakwe Lesa tekwakalinga kubaawo coongo ca nsando, tweembe nabi cisebensesho cimwi, sobwe. 8Mulyango wa ŋanda ya panshi wakalinga kumalenge a Ŋanda yakwe Lesa. Kwakalinga citantilo cakuya kucipinda ca peculu cabili alimwi acatatu. 9Mpeeke mwaami Solomoni wakamanisha kuyaka Ŋanda yakwe Lesa. Wakabikaamo shipulanga shuubu sha cisamu ca sida shakushisisha ciluli mwiculu. 10Ŋanda ya maanda otatwe kuya mwiculu, yomwi ayomwi yakalinga kulaampa mamita ali 2.2 kuya mwiculu. Ŋanda iyo yakayakilwa kulubumbu lwa Ŋanda yakwe Lesa nkolubetele pansengwe alimwi yakanunganishikwa ashisamu sha sida.

11Mwaami Lesa wakaambila Solomoni ayi, 12“Ono Ŋanda yangu iyi njootooyaka, na unookonkela milawo, milasho ansheŋamba, ndaakukucitila isho nshendakashomesha iso Defedi. 13Ndanookala pakati ka bantu bangu beene Isilaeli muŊanda yangu iyi njewanjakila, alimwi teshi nkabasuuleewo.”

14Ubo Solomoni mbwaakamanisha kuyaka Ŋanda yakwe Lesa.

Kubotesha mukati ka ŋanda yakwe Lesa

(2 Maka 3:8-14)

15Mumbu shamukati shakafwekeleshekwa tupulanga twa shisamu sha sida kuswa panshi kushika akwiculu, apalo panshi pakabikwa mapulanga abotu apaini. 16Cipinda ca mukati mwiine ico cakalinga kwiitwa ayi Musena Usalalite Wiindaawo cakalinga kwisule lya Ŋanda yakwe Lesa. Mubulaamfu cakalinga kulaampa mamita ali 9 alimwi cakapansaanishikwa ashipulanga sha sida kuswa panshi kushika peculu.#Kulo 26:33-34 17Cipinda cakalinga kunembo lya Musena Usalalite Wiindaawo cakalinga mamita ali 18 mubulaamfu. 18Nshebakamatika kulubumbu sha sida shakaboteshekwa atunkuli alimwi amaluba. Lubumbu loonse mukati lwakalamatikwa tupulanga twa sida cakwaamba ayi mabwe akayakishikwa taakalinga kuboneka.

19Mumusena Usalalite Wiindaawo momwakabikwa Libokoshi lya Cipangano lya Mwaami Lesa. 20Ici cipinda ca Musena Usalalite Wiindaawo cakalinga kulaampa mamita ali 9 mubulaamfu, mubufwaafwi alimwi akuya mwiculu. Lubumbu loonse bakalushingula golodi wiine wiine. Calo cipaililo cakabikwa tupulanga twa sida. 21Mukati muŊanda yakwe Lesa mwakashingulwa golodi alimwi ancetani sha golodi bakashicilinganya pamwinjililo wa cipinda ca mukati mwiine umo amwalo mwakashingulwa golodi. 22Mukati moonse lya Ŋanda yakwe Lesa mwakashingulwa golodi pantu pomwi acipaililo ca muMusena Usalalite Wiindaawo.#Kulo 30:1-3

23Bakelebu bobilo bakabeswa kuswa kucisamu ca olifi akubikwa muMusena Usalalite Wiindaawo. Comwi acomwi cakalinga kulaampa mamita ali 4.4. 24Lipapaminwa lyomwi lyomwi lya shintu isho lyakalinga kulaampa mamita ali 2.2. Nkokwaamba ayi kuswa kweela kwa lipapaminwa lyomwi kushika kweela kwa limwi ngamamita ali 4.4. 25Shoonse shobilo shakalinga kweelene mubupange amumbonekelo. 26Kelebu womwi awomwi wakalinga kulaampa mamita ali 4.4. 27Shintu ishi shakabikwa lubamba muMusena Usalalite Wiindaawo, cakwaamba ayi mapapaminwa a nshisho obilo kaakumyana pakati ka cipinda ico. Amwi kaakumya kulubumbu lwakalinga kulubasu kwakalingila comwi acomwi. 28Bakelebu abo bakalinga kunanikitwe golodi.#Kulo 25:18-20

29Lubumbu lwa Musena Usalalite alwa Musena Usalalite Wiindaawo bakalubotesha mukubesaamo bakelebu, tupukupuku alimwi amaluba asapukite. 30Apanshi poonse bakashingulaawo golodi.

31Shisasa shobilo shakapangwa amapulanga acisamu ca olifi akushibika pamulyango wa Musena Usalalite Wiindaawo. Shisamu shicata shisasa pamulyango uyo shakapangwa cakuba ansonga peculu, nkokwaamba ayi shakaba amakonko osanwe. 32Shisasa shakaboteshekwa mukubesaamo bakelebu, tupukupuku amaluba asapukite. Shisasa, bakelebu alimwi atupukupuku, shoonse bakashinanika golodi. 33Pamulyango wa Musena Usalalite pakapangilwa cicata shisasa cicite makonko one cakabeswa kuswa kucisamu ca olifi. 34Kwakalinga ashisasa shobilo sha cisamu ca paini. Comwi acomwi cakalinga kufungwaamo lyomwi. 35Acalo bakacibotesha mukubesaamo bakelebu, tupukupuku alimwi amaluba asapukite. Isho shoonse shakabikwa golodi upampamene.

36Lubansa lwa mukati lwa Ŋanda yakwe Lesa lwakalinga kushingulushitwe lubumbu lwakalinga kucite shisamu shilaamfu sha sida peculu lya mindando yotatwe yoonse ya mabwe abesetwe ayo akayakwa.

37Lwiimbi lwa Ŋanda yakwe Lesa lwakatalikwa mumweenshi wa bili wiitwa ayi Sifu, mumwaaka wane Solomoni kaalela. 38Mumweenshi wasanu ayotatwe, wiitwa ayi Bulu, mumwaaka walikumi awomwi wa bwaami bwakwe Solomoni, Ŋanda yakwe Lesa yakamana kuyakwa mbweeke mbobakalinga bayeeya. Yakatola myaaka ili yosanwe ayobilo kumana.

Currently Selected:

1 Baami 6: BBBLI

Highlight

Copy