1 Baami 7
7
Ŋanda ya bwaami yakwe Solomoni
1Solomoni wakaliyakila ŋanda ya bwaami iyo yakamutolela myaaka likumi ayotatwe. 2Cipinda cinene cakalinga kwiitwa ayi cipinda ca Musaansa wa Lebanoni. Mubulaamfu cakalinga kulaampa mamita ali 44, mamita ali 22 mubufwaafwi alimwi mamita ali 13.5 kuya mwiculu. Cakalinga kucite mindando yone ya macinko a shisamu sha sida apo pakalinga kushikila mitanti ya shisamu sha sida shibesetwe kabotu. 3Mwiculu lya ciluli mwakabikwa shipulanga shuubu sha sida peculu lya mitanti iyo yakalinga kushiite pamacinko. Yakalinga mitanti ili makumi one amitanti yosanwe. Nkokwaamba ayi mitanti likumi ayosanwe mumundando womwi awomwi. 4Mumbasu shoonse shobilo sha lubumbu mwakalinga mindando yotatwe ya mbwelyo. 5Shicata shisasa ashamweela mbwelyo mwakalinga shamakonko one, alimwi mindando iyo yotatwe ya mbwelyo mumbasu shobilo sha lubumbu yakalinga kulangene.
6Wakayaka Cipinda ca Macinko cakalinga kulaampa mamita ali 22 mubulaamfu alimwi mamita ali 13.5 mubufwaafwi. Cakalinga kucite mwinjililo ufwekeleshetwe uyo wakalinga kushimpila mumacinko.
7Wakayaka Cipinda ca Cuuna ca bwaami ico cakalinga akwiitwa ayi Cipinda Cakoomboloshesha umo Solomoni mwaakalinga koomboloshesha milandu. Cipinda ico cakalinga kulamatikitwe tupulanga twa sida kuswa panshi kushika akwiculu kuciluli. 8Ŋanda yakwe Solomoni iyo yakalinga mulubansa lumwi kwisule lya Cipinda Cakoomboloshesha yakayakwa mbuli maanda amwi oonse. Wakayaka aŋanda imwi ikoshenye aŋanda yakwe kuyakila mukaakwe uyo wakalinga mwanaamwaami wa kuIjipiti.#1 Baami 3:1
9Buyake boonse ubu pantu pomwi alubansa lunene, shakayakwa amabwe eelene kabotu kuswa mulwiimbi kushika akwiculu. Mabwe aya akabambilwa limwi nkwaakalinga kuswa. Akatimbulwa kabotu kabotu uko nkwaakalingila pansengwe amukati, atweela twakutimbwisha. 10Lwiimbi lwakayakwa amabwe anene akabambilwa limwi uko nkwaakalinga kuswa. Mabwe amwi akalinga kulaampa mamita ali 3.5 aamwi mamita ali 4. 11Peculu lya ngawo pakalinga amwi ayo akatimbulwa kweelana acipimo ashisamu shilaamfu sha sida. 12Lubansa lwa ŋanda ya mwaami, lubansa lwa mukati lwa Ŋanda yakwe Lesa, alimwi acipinda ca pamwinjililo wa Ŋanda yakwe Lesa yakalinga kucite lubumbu lwakayakwa ashisamu shilaamfu shoololokete sha sida peculu lya mindando yotatwe yoonse ya mabwe akayakwa.
Milimo yakwe Ulamu
13Mwaami Solomoni wakatuma nkombe yakwiita musankwa wiitwa ayi Ulamu, wakalinga kwishi shakupangapanga uyo wakalinga kwikala mundabala inene ya Taya. Wakalinga kwishi abuumbi kupanga shintu sha bulonse. 14Baishi, abo bakalinga kufwite kale, bakalinga bene Taya. Abalo bakalinga kwishi abuumbi kupanga shintu sha bulonse. Banyina bakaswa kumukowa wakwe Nafutali. Ulamu wakalinga kucenjete alimwi wakalinga shikupanga shintu sha bulonse ucishi abuumbi. Wakasumina kwiita kwakwe Solomoni ayi abe mweendeleshi wa beshikupanga shintu sha bulonse.
Macinko obilo a bulonse
(2 Maka 3:15-17)
15Ulamu wakapanga macinko obilo a bulonse. Lyomwi lyakalinga kulaampa mamita ali 8 kuya mwiculu amamita ali 5.3 mweela citako. Macinko ayo wakaabika kunembo lya mwinjililo wa Ŋanda yakwe Lesa. 16Kwiculu lya ngawo wakapangilaako shitwi shobilo sha bulonse. Comwi cakalinga kulaampa mamita ali 2.2 kuya mwiculu. 17Peculu lya licinko lyomwi alyomwi pakashingulushikwa ncetani shili shosanwe ashobilo shakoosekwa caandaŋombe mukushibotesha. 18Lyalo wakabumba mindando yobilo ya shisepo shiitwa ayi mapomegilaneti shakabumbwa kubulonse akushishingulusha ncetani isho.
19Shitwi isho shakapangwa anga ngamaluba a shinkwewa. Shakalinga kulaampa mamita ali 1.8 kuya mwiculu. 20Pashitwi sha macinko obilo ayo, peculu lya ceeco cakalinga anga nimbale, pafwaafwi ancetani isho shakooswa caandaŋombe, pakalinga myaanda yobilo ya mapomegilaneti mumindando yobilo.
21Ulamu wakabika macinko obilo ayo a bulonse kunembo lya mwinjililo wa Ŋanda yakwe Lesa. Ilyo lyakalinga kumalenge wakalitumba ayi Jakini, lyakalinga kumatwa wakalitumba ayi Bowasi. 22Shitwi sha bulonse isho shakalinga anga ngamaluba a cinkwewa shakalinga peculu lya macinko.
Ono mboobulya mulimo wakuyaka macinko ayo mbowakamana.
Cingomo ca bulonse
(2 Maka 4:2-5)
23Ulamu wakapanga cingomo ico cakalinga kulaampa mamita ali 2.2 kuswa panshi kushika peculu, mamita ali 4.4 kucilinganya pakati napakati, alimwi amamita ali 13.2 kucishinguluka. 24Pafwaafwi apeculu lya cingomo ico, mweela cakalinga kushingulukitwe mindando yobilo ya tunkuli twa bulonse uto twakapangilwa pomwi acingomo. Mumusa wa mita twakalinga kubaamo likumi. 25Cingomo ico cakatulwa pamisana ya bacende ba bulonse bali likumi abobilo abo bakalinga kwiimfwi cakupaana shitako. Nkokwaamba ayi bacende botatwe bakalinga kulangite kumatwa, botatwe kumbo, botatwe kumalenge abotatwe kwicwe. 26Cingomo ici cakalinga kucite mutika wa mamilimita ali 75. Pamulomo pancico pakalinga anga ngumulomo wa nkomeshi wakabumbwa anga ngamatewu a liluba lya cinkwewa. Cingomo ico cakalinga kwisula malita a maanshi ali 40,000.
Shikoci sha bulonse
27Ulamu wakapanga ashikoci sha bulonse shili likumi. Comwi acomwi cakalinga kulaampa mamita ali 1.8 mubulaamfu alimwi amubufwaafwi bweenka ubo. Shakalinga kulaampa mamita ali 1.3 kuya mwiculu. 28Ishi shikoci shakapangwa atusenke twa bulonse tweelene mubulaamfu amubufwaafwi uto ntobakalinga kupatika moomo mushintu sha makonko one. 29Patusenke twa bulonse uto apashintu sha makonko one pakalinga kutalitwe nkalamu, bacende ashintu shicite mapapaminwa shiitwa ayi bakelebu. Peculu apanshi lya nkalamu alimwi abacende, mwakalinga kutalitwe nkata sha maluba. 30Cikoci comwi acomwi cakalinga kucite mawilo one a bulonse alimwi ashicata mawilo sha bulonse. Kumakonko ali one kwakalinga shakucatisha mbale sha bulonse isho shakaboteshekwa ankaata sha maluba. 31Peculu pakalinga citacite makonko cakubikaawo mbale yakusambilaamo. Cakalinga masentimita ali 45 kuya mwiculu kuswa peculu lya cikoci alimwi mucikoci cakalinga kunjilite masentimita ali 18. Cakalinga kucite shakubesa kushinguluka ncico. Tupulanga twa cikoci twakalinga kweelene koonse koonse. 32Mawilo akalinga kulaampa masentimita ali 66 kuya mwiculu, kaali muunshi lya cikoci. Mungwala ucata mawilo wakalinga kukuminkenebo acikoci coonse. 33Mawilo akalinga anga nga cikoci ca maaki. Mingwala icata mawilo, shingelengele, masipoko, maabu shoonse shakapangwa abulonse. 34Cikoci comwi comwi cakalinga kucite mitabi yone, mumakonko a ncico nkocibetele muunshi. Yakalinga kukuminkenebo acikoci coonse. 35Kwakalinga cintu cili anga nintambo cakalinga kushingulukite mweela cikoci peculu cakalinga kulaampa masentimita ali 22. Mitabi ya ncico atusenke twa bulonse shakalinga kukuminkenebo acikoci coonse. 36Mitabi iyo atusenke twa bulonse uto twakabambanishikwa kabotu shakatalwa bakelebu, nkalamu atupukupuku kulilabo poonse pakalinga musena. Bakatalaawo ankaata sha maluba. 37Ubo anu shikoci mboshakapangwa. Shakalinga kukoshenye alimwi shakalinga kweleenebo kukomena ashimwi shoonse.
38Ulamu wapanga ambale likumi, mbale yomwi keeli ya cikoci cimwi. Mbale yomwi yakalinga kulaampa mamita ali 1.8 kwiinda pakati alimwi yakalinga kwisula malita ali 800.#Kulo 20:17-21 39Wakabika shikoci shosanwe kumalenge a Ŋanda yakwe Lesa alimwi ashimwi shosanwe kumatwa. Cingomo cinene cilya wakacibika palikonko lya pakati ka kwicwe akumalenge.
Mundando wa shintu shakabotesha muŋanda yakwe Lesa
(2 Maka 4:11—5:1)
40-45Ulamu wakapanga amipika, mafosholo alimwi ambale shifongomene. Wakamanisha mulimo wakwe kuli Solomoni wa kuŊanda yakwe Lesa. Nshaakapanga nsheeshi.
Macinko obilo
Shitwi shobilo sha peculu lya macinko shili anga nimbale
Ncetani shakooswa caandaŋombe pacitwi comwi comwi
Mapomegilaneti abulonse ali 400
akalinga mumindando yobilo, womwi kaucite ali mwaanda
kushingulusha ncetani pashitwi isho shakalinga peculu lya macinko
Shikoci likumi
Mbale shili likumi
Cingomo cinene
Bacende bali likumi abobilo bakubumba apo pakekala cingomo ico
Mipika, mafosholo ambale shifongomene
Shintu isho shoonse Ulamu nshaakapangila mwaami Solomoni ayi shisebenseshekwe muŊanda yakwe Lesa, wakashipangisha bulonse ubekabeka. 46Shintu shoonse ishi mwaami Solomoni wakashipangishisha pamusena wakubumbilaawo wakalinga pakati ka ndabala ya Sakoti aSaletani muCinyika ca Joodani. 47Solomoni taakwe kushipimisha shintu ishi mboshilema mukwiinga shakalinga shiinji. Awalo mweelo wakulema kwa bulonse taukwe kwishibwaawo.
48Solomoni wakapanga ashakubotesha shimwi sha golodi muŊanda yakwe Lesa. Wakapanga cipaililo, tebulu apo pakalinga kubikwa shimaande shipekwa kuMwaami Lesa,#Kulo 30:1-3; Kulo 25:23-30 49shakubikaawo malampi shili likumi isho shakalinga kwiimfwi kunembo lya Musena Usalalite Wiindaawo. Shosanwe shakalinga kulubasu lwa kumalenge, shimwi kashili kulubasu lwa kumatwa. Wakapanga amaluba, malampi, mano#Kulo 25:31-40 50nkomeshi, shakushimisha malampi, mbale shifongomene, mbale shinene shakubikaamo tununkila kabotu ashikaye shakubikaamo mulilo wa makalangasha alimwi ashakucatisha shisasa sha Musena Usalalite Wiindaawo alimwi ashisasa sha kuŊanda yakwe Lesa shapansengwe. Shakubotesha shoonse ishi shakapangishikwa golodi.
51Mpeeke mwaami Solomoni ndyaakamanisha ncito yakuyaka Ŋanda yakwe Lesa yoonse, wakaleta shintu shoonse isho Defedi ishi nshaakabenga kuli Lesa. Wakashibika mucipinda cakusungilaamo shintu. Pakalinga golodi, silifa ashimwi shiinji.#2 Samwe 8:11; 1 Maka 18:11
Currently Selected:
1 Baami 7: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
