1 Baami 5
5
Solomoni mbwaakalibambila kuyaka ŋanda yakwe Lesa
(2 Maka 2:1-18)
1Mwaami Ilamu wa kuTaya wakalinga mubye Defedi alimwi ndyaakanyumfwa ayi Solomoni ngowapyana bwaami bwakwe Defedi ishi, wakatuma beshikumwiimikanina kuli nguwe. 2Maswi akaboosha Solomoni kuli Ilamu ngakwaamba ayi, 3“Mulishi kwaamba ayi ceebo ca nkondo shatalinga kumana bata nshebakalinga kulwana ashishi, tabakwe kukonsha kuyaka Ŋanda yakulambililaamo Mwaami Lesa wabo, kushikila Mwaami Lesa ndyaakabalengesha kukoma balwani babo boonse. 4Sombi ono Mwaami Lesa, Lesa wangu wampa luumuno koonse kumanyinsa. Nshicite balwani alimwi taaku babwenekete ayi inga bandwana. 5Mwaami Lesa wakashomesha bata baDefedi ayi, ‘Mwanaako ngweshi akapyane bwaami bwako, ulaakunjakila ŋanda.’ Ono bulya ndayeeya kwiiyaka kwaamba ayi anoolambililwaamo Mwaami Lesa, Lesa wangu.#2 Samwe 7:12-13; 1 Maka 17:11-12 6Ono amutume bantu banu kuLebanoni bakantimbwiteeko shisamu sha sida. Bantu bangu balaakunoosebensa abaanu, alimwi ndaakulipila bantu banu shoonse nsheshi muyeeye. Mbuli mbomwishi, bantu bangu tabacishi kutimbula shisamu mbuli bantu banu bene Sidoni.”
7Ilamu wakakondwa abuumbi ndyaakatambula maswi akaswa kuli Solomoni akwaamba ayi, “Aalumbaishikwe Mwaami Lesa sunu ceebo cakupa Defedi mwaana musongo bobulya kwaamba ayi abe muleli wa mushobo unene uyu!” 8Lyalo Ilamu wakatuma nkombe kuli Solomoni yakwaamba ayi, “Ndatambula maswi anu alimwi nebo ndilibambite kucita boonse mbomwasenga. Ndaakubamba shisamu sha sida alimwi ashisamu sha paini. 9Bantu bangu balaakukusha shisamu kuLebanoni kushileta kulweenge, akushaanga pantu pomwi mumilwimilwi kwaamba ayi shikanooya buseela pamaanshi pafwaafwi aloombe lwa lweenge kushika ampomusuni ayi shishikile. Bantu bangu apo balaakushaangulula, lyalo bantu banu bakashibweese. Ono mwebo lubasu lwanu ndisuni kwaamba ayi mukapebo shakulya shiyandika kubantu bangu.”
10Mpeeke Ilamu wakapa Solomoni shisamu shoonse sha sida alimwi asha paini isho shaakalinga kusuni. 11Solomoni wakalinga kupa Ilamu makilogilamu ali 2,000,000 a witi alimwi amalita ali 400,000 a mafuta a olifi mwaaka uli woonse kwaamba ayi anoolisha bantu bakwe.
12Mwaami Lesa wakacita kweelana ambwaakashomesha Solomoni mukumupa busongo. Pakalinga luumuno pakati kakwe Ilamu aSolomoni, alimwi bakapanga acipangano.
13Mwaami Solomoni wakacata cibalu bantu bali 30,000 kuswa mucishi ca Isilaeli coonse 14akubika Adonilamu kuba shikubeendelesha. Wakabapansaanya mutukoto twa bantu bali 10,000. Bamukakoto komwi komwi bakalinga kwikala mweenshi muLebanoni akwikala myeenshi yobilo mucishi cabo.#1 Baami 12:18 15Solomoni wakalinga kucite abantu bali 80,000 bakalinga kupwaya mabwe alimwi abantu bakalinga 70,000 bakalinga kwaatuta. 16Mpeeke wakabika beshikusebensesha bali 3,300 bakalinga kubona ncito yabo mboitokweenda. 17Kwiinda mumaswi akaamba Solomoni, bantu abo bakakusha mabwe anene alimwi abotu akuyakisha lwiimbi lwa Ŋanda yakwe Lesa. 18Mpomunyaawo bayaki bakwe Solomoni alimwi abakwe Ilamu abasankwa bamundabala inene ya Gebali bakabamba mabwe amapulanga akuyakisha Ŋanda yakwe Lesa.
Currently Selected:
1 Baami 5: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
