1 Piyer 5
5
Mber ma ndaw ma kəlam ka mey ma kominite na hay
1I həladatara bəzay tok na a ndaw ma səka na hay, na da walaŋ a kwar ana hay, yah ana tiyatsa na, ndaw ma səka ha andza taya, arka satsa na, seydewe ma tsetseh ma Kriste, yah ana na, i da ndzefey maram ana ma da ɓadama ana: 2tsukurama welde ana ma Bay ma Bəla ma vəladəmakwar ana, ka key na ma mbarga ma zay zlay, amana ta mevel a kwar adzay, andza ma Bay ma Bəla me wuɗey ana; ka da key na, ma ma ndzafada sulay zlay, amana ta mevel eɗek adzay. 3Ka da səpam ma wumata ndaw ana ma vəladəmakwar ana hay, andza ma bay seweɗ ana hay zlay, ama təram na, tek na me tsey dey kava ha na da welde na. 4Andza aza bay me tsukurey ana ɗuhwa na ka da bawa ba na, ka da ndzafam me vehey 'ar ta maram ma devesey tikay ana.
Me ndzey gədaŋ aha da me pey 'ar
5Andza ha satsa na, kuray gawla hay, tsənəmatar sləmay a ndaw ma səka na hay. Arka kuray tabiyaha da mendzey kwar asləta na, madama vaw kwar andza bəza hiya, hərway Bay ma Bəla na a mbəɗatar dəba a ndaw ma rəsa vaw ana hay, ama a ndaw ma madama vaw ta bəza hiya na hay na, a vəlatar hahaya ŋga. 6Madama vaw kwar bəza hiya, ka slam dey ma har ma Bay ma Bəla gədaŋ ana tok na, ma aza ka da tsakafadəmakwar da har ana ma pa ha na; 7vəladəmara tek a kwar ma sakwar ana tabiyaha ka 'ar aŋga, hərway ma wafakwar vaw na ŋga. 8Ka da sam zom kambəlaɓa zlay, ndzam tsekerkerre, Setene ndaw dugwan a kwar a gwengurey aha na andza mabar, a teveley aha, a səpey aha ndaw ma da pəɗey. 9Dzaŋgəram gədaŋ gədaŋ ka vaw kwar da me pey 'ar hərway ŋga, sərafama tsetseh ana ŋga na na, ma vəla ha ma malam a kwar sa na hay ka bəla tiyatsa. 10Bay ma Bəla ma hahaya tabiyaha na, ma zələkurawa ka maram aŋga me ndəvey kakay ana ta Kriste na na, ŋga na ta 'ar aŋga na, a da padakwar, andza kuray ka kam tsetseh ba da mendzey nekəɗey na; a da səmadakwar, a da vəlakwar gədaŋ, a da təradakwar na ka da taɓam aha sakay. 11Ŋga na Bay ma wata tek hay tabiyaha ka bəla, da mevey temere. Amen!
Me tsey guma madakwaydok ana
12Guma neney hay nekəɗey i ma windadukuraɓa na ta har ma Silveŋ, na i ma nəkafa andza malam me tsəney sləmay aha, ma da həladakwar bəzay, ma da ɓadakwar na, kuray ma tapa hiya na, ka hahaya ma Bay ma Bəla da dərka na. 13Kominite ma ndaw Bay’ərlam ma gəɗəmata da Babiloŋ ana hay, ka tsadəmakwar guma ta Mark bəzey ɗaw. 14Tsam guma a vaw ka 'ar vaw kwar ana hay, surmam vaw andza kuray ta malam ahiya.
Zozoy ka ndzey ta kuray ana da Kriste na hay tabiyaha!
Currently Selected:
1 Piyer 5: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
