1 Piyer 4
4
Me wenəkey ka vaw ta meŋgəsey
1Kəɗey tok na, andza na Kriste me key tsetseh ba da slaw vaw ana na, kuray ana tiyatsa na, səmadama vaw da me dzeley 'ar ana asləta: ndaw ma kawa tsetseh da slaw vaw ana ŋga na na, ka wanəkam ba ka vaw ta meŋgəsey, 2ma da ndza sa me mendzey ana ma zarawa da slaw vaw ana na, andza ma tek me sey ma ndaw ana sakay, amana andza ma Bay ma Bəla me wuɗey ana. 3Akwa na ɗa ka dəba, ma kawa tek a kwar ana andza ma ndaw Zuif ahiya kakay ana hay ma wuɗam ana. Da ma ndzawa kwar da me tsəley so ha, da tek me sey, da mewey kwar, da ma zəmam tek a kwar kambəlaɓa, da me sey zom lamba ha, da ma nəmatar dəba kwar a ’ərlam so na hay me key hwaray ana. 4Ka guma neney na a rəzlata zləna, a nəkadama na, ka hwam aha andza taya kamasləta ha 'ar a tsəveɗ ma tsəley so mandzara me wey daw ka vaw ana sakay na, arka na, a tsaɗəmakwar. 5Amana, ana aza taya na a da ɓadəməra tek ata na ma kəmawa na a ndaw ana ma həla vaw aha tsoy, ma da kadatara sariya ma ndaw ta dey ana hay, ta ndaw ma mətsa na hay. 6Kavədiya na, kwa a ndaw ma mətsa na hay tekeɗe na, ka tələkadəmatara mey ba ta Mey Hayna Wayna, ma aza, kwa sariya ta na, ma ka hiya ba andza ma ndaw hay da slaw vaw na, ma ndzaya na andza na ma Bay ma Bəla ta har ma Mesəfrey.
Bəzey me slərey hayna hay da kominite
7Me ndəvey ma tek hay tabiyaha ka gurawa ba, ɓadəmatara ma səra 'ar a kwar, ka da sam zom kambəlaɓa zlay, ma aza ha slafama me ɗuley mey. 8Tsufəmey aha ɗagay na, ndzafam ma wuɗa vaw ka 'ar vaw kwar ana hay zarra, hərway ma wuɗa vaw na a sehətey meŋgəsey hay haɗadzidzay. 9Ŋgəlam vaw ka 'ar vaw kwar ana hay mandzara ma gwaŋguɗey mey. 10Kam meslərey a vaw ka 'ar vaw kwar ana hay, kwa way way andza ma tek ma hayaha me ndzefey ana na, andza bəzey me slərey hayna hay, ma slafama ma war 'ar a hahaya ma Bay ma Bəla da tek hay gəle gəle na. 11Haɗaw kendzey andza ndaw a tsey guma na, ka key na ma zawadatara ta mey ma Bay ma Bəla; kendzey ndaw a key meslərey na, ka key na ta gədaŋ ma Bay ma Bəla me vəley ana, ma aza ta Yezu Kriste na, ka səmbərama Bay ma Bəla kərem tabiyaha, ŋga ndaw ma wata maram ta bay hay ka bəla tabiyaha, ka mevey temere! Ka mevey temere ka ka mevey temere! Amen!
Wuiya ma ndaw ma kam tsetseh hərway ma Kriste na hay
12Dzam a ɗaw hay, ka da rəzlakwar zlay, kendzey andza ka da sərafama ka ndalamam aha da waw ma laɓa na ma me həley suwet na, kal kal andza ma safəkurawa na tek andza me tsey metsembeɗ aha na. 13Amana, da har ka safəkurawa me key tsetseh ma Kriste tey na, kam wuiya, ma za da har ma da ɓada maram aŋga na, kuray ka da ndzam da wuiya ɗuhwaha tiyatsa. 14Haɗaw a tsaɗəmakwar hərway ma mezəley ma Kriste na, ndzam da wuiya, hərway ma Mesəfrey ma maram, Mesəfrey ma Bay ma Bəla ŋga da vaw kwar. 15Hayna kwa ndaw asləta da walaŋ a kwar ka da sey banay ma vəday a kəɗey ndaw vagay aha, mahal aha, dakay na a kawa tek haya kakay aha, dakay na me tələkey a tek ma ndaw ma nəkafaka dey kakay ana zlay. 16Ama kendzey a sey banay hərway ŋga ndaw ma Kriste aha na, ka da kar hwaray zlay, dzadzak na ka səmbəra Bay ma Bəla, kavəday ma Mezəley ana ŋga na na. 17Akwa ekəɗey na, har ana ka slawa ba, sariya a da zlawa na ta 'ay ma Bay ma Bəla; azlakwa, haɗaw a zlar na ta lakwa na, ma da ndəvey ma ndaw ma pam 'ar ka Mey Wayna ma Bay ma Bəla kakay ana hay na teŋgey? 18Arka haɗaw azlakwa ndaw dzerey ana a ləhəmawa mesueh mesueh na, ndaw ma zləɓa na hay ta ndaw ma ŋgəsa na hay a da kam na teŋgey? 19Kəɗey na, ndaw me key tsetseh andza ma Bay ma Bəla me wuɗey ana hay na, a madəmara mezek ata da me key tek hayna a huɗa har ma Ndaw ma katərawa tek hay, ma mbəɗar sler a guma ŋga tikay ana.
Currently Selected:
1 Piyer 4: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
