RUTH 3
3
Rut muwun li a dasar Boˀos
1Ti di numuŋ ada na, Noˀemi a ɓa dideˀe: «Zuŋ ɗu, sey i lum jiviɗ, ɓa tumbuŋ ki ndir ar wuya. 2Boˀos mupuluw ki gi slra ati ngwas migi slra naŋhay na, i muy ndra mikasl wãˀ. A ra ru nga ɗugo daw naŋ a məlaŋ ti hiikuɗ dana. 3Bun, gi urdi, ka zana ɗik mezleheye, aru nga məlaŋ. Amma ki bigaŋ vu daf ta, sey a zum, yo a si gwat kpeˀ ɗagay. 4Naŋ masa ru nga hin so na, pura li naŋ masa ra hin ara kuy kuy, kirih ng'avaŋ, ngwaˀa borgo ti dasar naŋ ngwaˀa, hin tup avu sar naŋ. Naɓa a sa ɓuw ɓi ngi gwat ka masa ga vuna si.» 5Rut a mbiɗaŋ di: «I sa ga gwat ka miɓi di na cek.»
6Rut aru nga məlaŋ tuwa, a ga kaɓa dideˀ naŋ miɓaŋ di tuwa gar. 7Boˀos a zum, a si gwata, mevele a hin le, a so hin tup a ciki daw mukos kos tuwa. Dar Rut tuwa, a so yaŋ yaŋ, a ngwaˀa borgo ti dasar naŋ ngwaˀ, a hin tup.
8Yo ngi wuzla duvuɗo, Boˀos tuwa, himiɗ a gaŋ, a puɗuk puɗuk. A mbiɗi pulaˀ ngir ti mbuŋ na, keɗ na, ngwas tup a dasara. 9Boˀos a cufuɗaŋ: «I ka waka?» Rut a mbiɗaŋ di: «I ya Rut beke ɗiki, ɓul jijiwiɗ ar ya takwa, asi ki muzuma hay.» 10Akẽh Boˀos a ɓaŋ: «Anja Bumbulvuŋ a ɗuwuluw mi zuŋ ɗu! gi teŋteŋ ka mibiga hana, i gwat madiɗa haɗa, fineˀ ka mibiga mudumbuŋ na ma. Asi ki sipi di gawla misi zlili malla misi murgahay ta. 11Wurenna so na zuŋ ɗu, ki zluwun ta. Gwat ka mucufuɗ le gar na, i sa guw di. Asi mbur ngi hay ndra aka gar na, a si na le ki ngwas mupuɗaw. 12Naŋ kanah gisiŋ, yi muzuma hay gwaɗ naŋ, na mbur migweˀ ngi zuma hay mifineˀ ya ada. 13Wun li aka kwaɗay. Ti miprike, i sa puraka ɓi nah, da a ngiluw na kuy, amma da a wuɗ ngiluw ta na, hadam ti Bumbulvuŋ misi ti siifa, naɓa yi sa ngiluw! Wun li aka ɗagay.»
14Rut a wun li a dasar Boˀoso. Amma a slikiɗ ngi li guv guv vur taŋ masinakaŋ. Naŋ kine, ngwas hana aru le a məlaŋ na, Boˀos anta wuɗ ɓa a sinaka ta! 15Boˀos a ɓaŋ: «Njira zana ngi hirnga ɗike, jakaw.» Rut tuwa, a jakaw, dar Boˀos a waŋ daw giziŋ kilo kuruˀ nga zlum, a zuɓaŋ nga hirnga. Dar Rut a mi ng'ar walahay. 16A ci ng'avi dideˀe, a ɓaŋ: «Ki gi na mbri ska zuŋ ɗu?» Joˀ Rut a slufaŋ gwat Boˀos migaŋ taŋ na cek. 17Rut tuwa, a ɓaŋ ma: «A vuliy daw giziŋ ani kilo kuruˀ nga zlum, asi a ɓiy na: anja ki mi kavbar kine ng'avi dunuko ta.» 18Noˀemi a ɓaŋ: «Ka cifi joˀ, kutuko zuŋ ɗu, ɓa ki pura, da ɓi nah ara kiɗ mi mbrike na. Da Boˀos a ɗiya ɓi naŋ dana dana vuna ta na, mevele anta sa hin ta.»
Currently Selected:
RUTH 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.