RUTH 4
4
Boˀos muzuma hay ngi Elimelek
1Boˀos aru ng'ar li mangilam wuy ngi mizli, a mizlingreŋ ngi walahay, a cifi a diga, keɗ na, mbur muzuma hay ngi Elimelek, Boˀos miɓa ɓi naŋ tuwa, ara cuhu. Boˀos a ɓaŋ: «Sawa cifi aka kwaɗay.» Mbur tuwa, a sawa, dar a cifi joˀ. 2Akẽh na, Boˀos a wuɗ mizli kuruˀ a wuzla mizli micawwa ngir walahaya, a ɓa taŋ: «Inga cifam aka takwa.» Joˀ a cifam so. 3A dirba nah, Boˀos a ɓa mbur mikasl ngi muzuma hay ngi Elimelek tuwa: «Ki si na le, Noˀemi a mo le tir prok ngi Moˀapa. Ani a wuɗ ɓa a hiɗika guva ngi sukum ndra Elimelek na, avra muŋ. 4Na yi wuluk le, ɓa ki hiɗika a mbuŋ mizli micawwahay ati mizli ɗuwoy misi aka gar. Da ki wuɗ hiɗika guva naŋ na, hiɗikaŋ. Amma da ki wuɗ ta na, ɓiy di, ɓa yi sinaŋ. Asi guva nah, mbur ɓa a hiɗika, mbak ka le na, anta, a dirba ɗike kwana, i ya ya.» Mbur tuwa, a ɓaŋ: «i hiɗikaŋ.» 5Dar Boˀos a ɓaŋ: «Tapas ka masa hiɗika guva avu Noˀemi na, kisa ngila Rut zuŋ Moˀap, ngwas ngi vagay sukum ndra na, wãˀ tapasa ya, ɓa guva a ndir asi haŋ ngi muy ngi zil naŋ mumuc na.» 6Akẽh muzuma hay tuwa, a ɓi: «Da kine na, i hiɗika ta, naɓa a sa giy ngaˀ ngi zlili ɗu. I vuluw gi modogom ɗu da ka, ngi mbiɗi hirnga ngi guva ar deɗe ɗu, asi yi mbiɗa gu ta.»
7A ruwuy Israyele zleˀe na, da mbur ara mbiɗi hirnga ngi gwat malla a mbiɗam vu ti mbiɗi kwana, ɓa ngi kiɗa mi naŋ wãˀ na, mbur purla asi taŋ a cuko ta raka, a vula da mbur numuŋ, mbiɗeˀvra angi hirwuy Israyele, ɓi nah a ɗiyi le. 8Vurˀe, mbur muzuma hay ngi Elimelek tuwa, a ɓa Boˀoso: «Hiɗika da ka!» Dar a cuko ta raka, a vulaŋ di. 9Joˀ, Boˀos a ɓa mizli micawwahay ati mizli gar misi akẽh: «Dana, kum i sedewohoy, gwat ngi Elimelek ati ziri naŋhay, Kiliyoŋ ati Maloŋ gar na, yi hiɗika taŋ. 10Yo ma na, i ngila Rut zuŋ Moˀap, ngwas ngi Maloŋ da ya ma, naɓa guva a sa ndir da muy ngi vagay Maloŋhoyo yo i sa yam ziri, ɓa a wuzla sukum naŋhaya, malla ar li ngila wuy ngi mizli a mizlingreŋ ngi walahay kwana, slimiɗ naŋ a kiɗ ta. Kum i sedewo ngi gwat tayna dana.»
11Mizli micawwahay ati mizli micikilam akẽh gar, a mbiɗakaŋ di: «Haˀaw, ndr'i sedewohoy. Anja Bumbulvuŋ a ɗuwula mi da ngwas maci ngi hay ɗik vuna, a tiri kaɓa Rasel ati Leya, ngwas ngi Zakopoy mucuw tayna, miyaka sukwi Israyeley taˀ gar na. Anja zlili ɗik a gi haɗi a wuzla Efrataya, yo ɓa slimiɗ ɗik a zil a Beteleyeme! 12Anja Bumbulvuŋ a ga ɓa ngwas zuŋ zuŋ aruŋ hana, a yuw ziri haɗa, ɓa hay ɗik a tiri ka ngi Peres mangal ngi Zuda miya ti Tamar.
Boˀos mingila Rut, a yi Obet, dideˀ ngi Davit
13Dar Boˀos a ngila Ruto, a tiri ngwas naŋ. Boˀos aru ng'avaŋ, Bumbulvuŋ a ɗuwulaŋ mi, a gi hur, a yi mangal mizile. 14Vurˀe, ngwasay a ɓaka Noˀemi: «Gukum sise da Bumbulvuŋ, asi dana, a vuluw mbur le, masa ki slimiɗ ar ka. Slimiɗ ngi dideˀ ɗik a sa zil asi ruwuy Israyele. 15Mangal nah, a sa vuluw gidaŋ ar siifa ɗike, yo a sa jinuw ar mandangwas ɗike. Asi ngwas ngi mangal ɗik hana, naŋ avu ka fineˀziri mizilehey tarnaˀ, asi ara wuɗuw, yo a yuw dideˀ le ma.» 16Dar Noˀemi a zuɓa mangala, a ja gumbuˀ a didaka, a gilaŋ. 17Ngwas midigwi naŋhay a tilam mi, a ɓam: «A ya ka mangal le da Noˀemi!» Dar a zilaka mangala Obet. Obet a yi Zese, cine ngi Davit.
Slimiɗ ngi dideˀ ngi Davitey
18Slimiɗ ngi dideˀ ngi Davitey ani, zle avu Peres: Peres a yi Hesroŋ, 19Hesroŋ a yi Ram, Ram a yi Aminadap, 20Aminadap a yi Nasoŋ, Nasoŋ a yi Salma, 21Salma a yi Boˀos, Boˀos a yi Obet, 22Obet a yi Zese, yo Zese a yi Davit.
Currently Selected:
RUTH 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.