RUTH 2
2
Rut ara gi holok ar guva ngi Boˀos
1Dambalaka Noˀemi vuna, muy zil naŋ Emeleke ada. I mbur mugop, misi zlili, a zilaka Boˀos. 2Ti di numuŋ ada na, Rut zuŋ Moˀap tuwa, a ɓa Noˀemi: «I wuɗ i ru nga gi holok ngi daw ar guvahay, ɓaˀ a dirba mbur masa giy mezleŋ.» Noˀemi a mbiɗaŋ di: «Aru zuŋ ɗu.» 3Dar aru so, a gi holok ɓaˀ a dirba munguma dawaya. A bi ti jiŋ le, ara ndil kasl ar guva ngi Boˀos muy ngi Elimelek.
4Neˀ na, Boˀos ara ndilo ti Beteleyeme. A ja haŋ da munguma dawaya, a ɓa taŋ: «Anja Bumbulvuŋ a ndir ati kum!» Taŋ kwana a mbiɗakaŋ: «Anja Bumbulvuŋ a ɗuwuluw mi!» 5Akẽh na, Boˀos a ɓa madiɗa ngi munguma daw naŋhaya: «Ngwas zuŋ aruŋ hana, i ngi waka?» 6Madiɗa ngi munguma daway tuwa, a mbiɗaŋ di: «I ngwas zuŋ Moˀap, a soko ati Noˀemi tir prok ngi Moˀap. 7Zuŋ vuna a cufuɗiy le aka, a ɓi na: I wuɗ i gi holok, i guɗumasasa ra ngi daw mandir a dirba munguma daway na takwa kini. Diga naŋ muso ngi miprike, naŋ deŋ ti deŋ hã wurenna!» 8Dar Boˀos a ɓa Ruto: «Kaˀ da ki cine ya zuŋ ɗu? Ki ra gi holok ar guva mekelem mata, aˀa ki buˀ avu guva hana ta. Yo ma na, njikoko dawa ati ngwas migi slra ɗuwoyo. 9Pura li munguma daway ma ram ara a ra na kuy kuy, yo ki ɓaˀ a dirba ngwasay manjikoko dawa. I ɓa gawla ɗuwoyo le ɗaˀ ɗaˀ le, ɓa a pulukuw, ki gi kaɓa ka mawuɗo. Da yam ara guw na, ara si misi ar kukulum gawla ɗuwoy munuwoko di vuna si.» 10Akẽh na, Rut a huruk huruk a mbuŋ Boˀoso, a ɓaŋ: «Ya ngwas mulak ma na, ki giy mezle haɗa, yo ki ki slimiɗ ar ya vur mike?» 11Boˀos a mbiɗaŋ di: «Gwat ka miga da dideˀ ɗik, a dirba muc ngi zil ɗik na, a slufikiy ɓi nah le pislek pislek, ki pula bunuk ati munuko, hirwuy ɗik muyukuw a ra, joˀ ki so nga wuzla mizli ka misina taŋ zleˀe ta. 12Anja Bumbulvuŋ a wurukuw minjeˀe, anja Bumbulvuŋ Buymisemuŋ, ngi Israyele a wurukuw kuy kuy, asi ka muso nga ɗum na, ava.» 13Rut a mbiɗaŋ di: «Ki ra giy mezle buy ɗu, ka miɓiy ya beke ɗik, ti ˀay mezle na, ki suhĩy tuwuyo le, na ya vuna i ndila ngwas migi slra ɗikey vuna ta mayse!»
14Ler ngi zuma ɗaf migi na, Boˀos a ɓa Ruto: «Sawa i zumam bummoˀ, zuɓ ɗaf, gi lar ava.» Dar Rut a cifi a ciki munguma dawaya. Boˀos a vulaŋ ɗaf mutuso, a zum hã a mbi, is naŋ a ndiraŋ ma. 15A dirba nah, Rut a slikiɗ ngi gi holok tuwa ma. Boˀos a ɓa gawla naŋhaya: «Pulaka mbak a gi holoko, ko a wuzla mizerey kwana zuy, ki ɓakaŋ ta. 16Na zle ngicam avu mizere, pulam ɓaˀɓaˀ a ruwuy, ɓa a guɗumaŋ, ko ki bucakaŋ ta.» 17Rut avu hiipas ar li gi holok ar guva ngi Boˀoso, hã pastaˀ, a ɗugo holok tuwa, a naha sak madiɗa ndeŋ ndeŋ ti daw giziŋ tuwa.
18A zuɓa, a cuh di ng'ar walahaya, ara biga daw tuwa da dideˀ naŋ Noˀemi waɗ is ngi ɗaf naŋ muzum ava hã a mbi tuwa, a bo di, a vulaŋ di. 19Dide naŋ Noˀemi tuwa, a ɓaŋ: «Ki ra gi holoko dana amaka? Ki ra gi slra ar guva ngi waka? Anja Buymisemuŋ a ɗuwula mi da mbur muguw mezle hana!» Dar Rut a slufaŋ di: «I gi slra dana ar guva ngi mbur mazilaka Boˀos.» 20Dar Noˀemi a ɓa dideˀ naŋ Ruto: «Yi pura na, Bumbulvuŋ naŋ anta puyuk hirnga ti ndra misi ti siifahaya ta, a puyuk ti mizli mumucahaya ta.» A dirba nah, Noˀemi a ɓa Ruto: «Boˀos vuna i muy ndra mikasl wãˀ, i muzumahay.» 21Rut a ɓi ma: «Boˀos vuna a ɓiy ma na: «Ka gi holok a dirba gawla ɗuwoyo hã tay mi ngi guva.» 22Akẽh Noˀemi a ɓa Rut ngwas ngi mangal naŋ tuwa: «Naŋ kuy zuŋ ɗu, ka aru asi ngwas migi slra naŋhaya. Da ki ru le ng'ar guva mekelem na, a sa ra gukuw malambaˀa.»
23Dar a ndir ɓaˀ asi ngwas migi slra ngi Boˀosoyo so, hã tay mi ngi guva ngi daw giziŋ ati alkamari. Rut a ndiram ati dideˀeŋ, mumuŋ ngi zil naŋ.
Currently Selected:
RUTH 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.