Matiye 7

Giziŋ meciɗek ati mbal

(Yo pura Luk 6.37-38,41-42)

1«Ki gam ka kum i migi kiitahay ta, naɓa a sa gukum kiita ta ya. 2Asi a sa gukum kiita kaɓa kum magam da mizli na ya, yo a sa wukum gwat ti daram kum mawam di gwat da mizli vuna ya. 3Ki pura giziŋ meciɗek misi a hiri sukum ɗike ɓula, amma k'anta ki pura mbal misi a hiri ɗike ta na vur mike? 4Na ka, mbal ada a hiri ɗike jaka, amma kisa ɓa sukum ɗike: ‹Kwaɗay, i zuɓuw giziŋ meciɗek misi a hiri ɗike na, mbri mbrike?› 5Mbur miɓi mi cuw cuw, zuɓa mbal misi a hiri ɗik na ɗagay, ɓa kisa pur kweŋ kweŋ ngi zuɓa giziŋ meciɗek misi a hiri sukum ɗik na ya.

6«Ki vulaka gwat ngi Buymisemuŋ da kirihey ta, virzle hirnga kumoyo, ki hizigaka taŋ da fedemey ta, vur taŋ makirpaka taŋ asi sar, a mbuɗoko hiri, a nguwukum.

Cufuɗam, sipam, tilam mi ngi hay

(Yo pura Luk 11.9-13)

7«Cufuɗam gwat, a sa vulukum. Sipam gwat, kisa lumam. Tilam mi ngi hay, a sa wunukum mizlingre. 8Asi mike na, mbur gar macufuɗ gwata, a vulakaŋ, mbur masipi gwata, a lum, mbur matil mi ngi haya, a wunakaŋ mizlingre. 9Mbur a wuzla kumo, da mangal naŋ a cufuɗ ɗaf le ava na, a sa vulaŋ ɗugur na, i waka? 10Malla da a cufuɗ kilif na, a sa vulaŋ kaw kwa? 11Da kum mizli malambaˀhay, ki sinaka vula gwat mezlehey le da ziri kumoyo na, Cine kum misi a muŋ a sa vula gwat mezle da mizli macufuɗakaŋ na fineˀ kum ta jak kwa? 12«Naŋ kine, gwat gar kum mawuɗam ɓa mizli a gukum di na, kumo kwana, gaka taŋ di kanah ya. Ɓimujuwa ati ɓi ngi mijiviɗey i nah.

Mizlingre Muɓucco

(Yo pura Luk 13.24)

13«Cam tir mizlingre muɓucco! Asi mizlingre mifiw ati jiviɗ misliprike, aru ti mburo nga zizi. Mizli haɗa a zuɓam di i nah. 14Amma maru ti mburo ng'ar li ngi siifa na, i mizlingre muɓuc haɗa, i jiviɗ misler sler haɗa, mizli maram ti raˀa na, taŋ haɗa ta.

Mijiviɗ misi slirey

(Yo pura Luk 6.43-44)

15«Wam vu avu mijiviɗ misi slireye. A soko avu kumo ka tumuŋhoy, amma hur kwacay taŋ i kiriɓuh miji vuhoy. 16Ki sa sinaka taŋ avu gwat ngi gi taŋ. Ada ngilam yi ngi gudubun avu sisime kwa? Malla ada ngilam yi ngi uruf avu titife kwa? 17Naŋ kine, widis mukuy kuy gar a yi mezle, widis mukuy kuy ta kwana, a yi malambaˀ aya. 18Widis mukuy kuy a yi malambaˀ gu ta, widis mkukuy ta kwana, a yi mezle gu ta ya. 19Widis mayi mezle ta gar na, a sa ngumakaŋ, a sa hizigaka ng'ar vu. 20Naŋ kine, kisa sinaka mijiviɗ misi slireye avu gwat ngi gi taŋ.

Gwat miɓa le na, sey ki ga

(Yo pura Luk 13.25-27)

21«Mizli gar maɓikiy: ‹Buy, Buy› tewle na, masa cam ar Zumabuy misi a muŋ, i taŋ ta, amma sey mizli magam gwat Baha misi a muŋ mawuɗo. 22Tapasa, mizli haɗi a sa ɓikiy: ‹Buy, Buy! I njikaka ɓi ɗike le ti slimiɗ ɗik kaɓa mijiviɗey ta kwa? I ɓulam setenehey le ti slimiɗ ɗik ta kwa? I gam cekenehey le haɗi ti slimiɗ ɗik ta kwa?› 23Dar yi sa ɓa taŋ: ‹Ko yi sinukum ɗaˀ ta wãˀ. Kiraham kileŋ avu ya, kum migi gwat malambaˀhay.›»

Hayay cuw

(Yo pura Luk 6.47-49)

24«Naŋ kine, mbur gar macin mingiɓi ɗu, yo maga gwat ya maɓa hana na, a bam vu ati mbur misi lesl mindira hay naŋ ar mandazlay muwã. 25Vuŋ a gi, mekepel a zuɓ, burkataŋ a gi ti gidaŋ, a so luuma hay tuwa. Amma ko a mbizli ta wãˀ, asi a ɗuvaka virzi naŋ ar mandazlay muwã. 26Amma mbur gar macin mingiɓi ɗu, yo maga gwat ya maɓa hana ta na, a bam vu ati mbur gilaw mindira hay naŋ ar muyuŋ. 27Vuŋ a gi, mekepel a zuɓ, burkataŋ a gi ti gidaŋ, a so luuma haya, hay a mbizli grip, mbak diŋ cay!»

Yesu a ɓi ɓi ti gidaŋ ngi wi mizli

28A dirba Yesu mikiɗa mi ngi mingiɓi naŋ hana na, mizli gar, gwat naŋ mudubuna taŋ di, a zuma taŋ hirnga teˀe. 29Asi a dubuna taŋ di kaɓa ngi mbur misi ti dudok, ɓi naŋ a zliram ati ngi buy ngi ɓimujuwahaya ta.

Currently Selected:

Matiye 7: BEGDC

Highlight

Copy