Matiye 6

Gwat ngi vul da misi murgahay

1«Gwat kum magaka ar sipi jiviɗ kumo, jam lesl, anja ki gaka a mihiri mizli ɓa a purukum ta. Da kanah na, naɓa Cine kum misi a muŋ anta sa wurkukum ta. 2Mizli miɓi mi cuw cuwoyo, a vulaka gwat da misi murgahaya ar hay ngi dira dibiɗey, yo a jiviɗ madiɗahay, a tilam di mi ɓa mizli a gaka taŋ dudoko. Gisiŋ, yi ɓukum na: taŋ a lumaka migir taŋ le si. Amma ka, da ki ra vul gwat da misi murgahay na, anja ki gi ka taŋ na ta. 3Da ka, ki ra vul gwat da misi murgahay na, gwat haŋ vay hazum ɗik maga na, anja haŋ gula ɗik a si na ta. 4Anja gwat ɗik ka mavula a ndir i gwat miyaŋŋa, ɓa Cine ɗik mapur ar li miyaŋŋa na, a sa wurkuw minjeˀe.

Dira dibiɗ

(Yo pura Luk 11.2-4)

5«Mizli miɓi mi cuw cuwoyo, taŋ a wuɗam dira dibiɗ taŋ deŋ ti deŋ ar hay ngi dira dibiɗey malla a mazlaka jiviɗey, ɓa mizli a puraka taŋ. Gisiŋ, yi ɓukum na: taŋ a lumaka migir taŋ le si. Amma kumo, da ki ra diram dibiɗ na, anja ki gam ka taŋ na ta. 6Da ka, ki wuɗ le ɓa ki dir dibiɗ na, ci nga viŋ ɗike, gica miviŋ, tumbulo Cine ɗik misi ar li miyaŋŋa nah na, ɓa Cine ɗik mapur ar li miyaŋŋa tuwa a sa wurkuw minjeˀe. 7«Da ki ra diram dibiɗ na, anja ki ɓam kwiliŋ kwiliŋ ka mizli duniyahay ta, taŋ a waka kaɓa Bumbulvuŋ a sa cine dira dibiɗ taŋ vurˀe. 8Anja kumo, ki sulɓoko mi taŋ ta, asi Cine kum a si na gwat kum misi ti may naŋ le zle ti kum mucufuɗakaŋ t'aruŋ.

Cine ndra misi a muŋ

9«Da ki ra diram dibiɗ na, ɓam ani:

‹Cine ndra misi a muŋ,

Anja mizli a sinukuw ki Buymisemuŋ mipal.

10Anja ki so zum buy a wuzla mizli.

Anja gwat ka mawuɗo, a gi a ruwuy

kaɓa naŋ magi a muŋ.

11Vula ndra ɗaf, ndra misi ti may naŋ dana.

12Pula gwat malambaˀ ndra migaka, kaɓa ndra mupulaka ngi mizli migam ndra di na ya.

13Ki pula ndra i cam ar li ngi tikin ta, amma laha ndra tisi haŋ ngi Satana.

[Asi Zumabuy, gidaŋ ati dudok i ngi ɗik hã ngi sete. Amin#6.13 Mingiɓi misi ar gwat misi kahana anta ar mi mutoho magalahay muwãˀa ta, pura 1 Ɓi Hi 29.11-13.» ] 14«Naŋ kine, da ki ra pulaka gwat malambaˀ ngi mizli magukum di na, naɓa Cine kum misi a muŋ a sa pulukum di ya. 15Amma da kum anta ki pulaka gwat malambaˀ ngi mizli magukum di ta na, naɓa Cine kum anta sa pulukum di ta ya.

Dubun ar ɓi ngi dalyam

16«Da ki ra gam dalyam na, anja ki gam kaɓa ki ra likam ka mizli miɓi mi cuw cuwoy na ta. Taŋ a mbiɗaka midibiɗe, ɓa mizli a puraka taŋ ara gam dalyam. Gisiŋ, yi ɓukum na: taŋ a lumaka migir taŋ le si. 17Amma ka, da ki ra gi dalyam na, njuro hirnga ɗike, buna hiri ɗike, 18ɓa mizli a sinaka ki ra gi dalyam ta. Sey Cine ɗik misi akẽh ar li miyaŋŋa na masina tewle, ɓa Cine ɗik mapur ar li miyaŋŋa na, a sa wurkuw minjeˀe.

Zlili ngi muŋ

(Yo pura Luk 12.33-34)

19«Anja ki cikilam zlili a ruwuy misenna ta, vur a ruwuyo, tiler a zumaŋ, li mileleŋ a nduvaŋ, muhuloy kwana, a slinaka haya, a hulokoŋ. 20Amma zuwen wam vu ti zlili ar li ngi muŋ. A diga ko tiler anta sa zuma ta, li mileleŋ anta sa nduva ta, muhuloy kwana, anta sa slinaka haya, ɓa a huloko ta ma. 21Asi angi li zlili ɗik misi anga na, mevel ɗike, naŋ anga ya.

Li minjahha ngi dumvu

(Yo pura Luk 11.34-36)

22«Hiri i lampe ngi dumvu. Da hiri ɗike naŋ kuy kuy na, naɓa dumvu ɗik gar na, naŋ ar li minjahha. 23Amma da hiri ɗike naŋ kuy kuy ta na, naɓa dumvu ɗik gar kwana, naŋ ar luvuŋ. Da li minjahha misi avu dumvu ɗik i luvuŋ na, kay i luvuŋ mitimbiɗim wãˀ.»

Buymisemuŋ malla zlili

(Yo pura Luk 16.13)

24«Ko mbur purla magi gawla ngi buyoy cuw gu anta. Malla a sa hirsa numuŋ, a sa wuɗ mekeleme, malla ta na, a sa gumbuˀ ng'avi pal numuŋ, a sa zirɗa mi ngi mekeleme. Bumbulvuŋ ati zlili, ki cifam gawla taŋ cuw taŋ gu ta.

Pula vu mbak da Bumbulvuŋ

(Yo pura Luk 12.22-31)

25«Vurˀe, yi ɓukum na: ɓi ngi gwat ngi zum, malla gwat ngi si, ko zana kum masa kama, ki likaka ta. Siifa kum a funa gwat ngi zumo le, dumvu kumo kwana, a funa zana ngi ki le ya ta kwa? 26Puraka ɗiyuw ngi ɓuhoy ɗagay: anta zligam gwat ta, anta gam sifi ta, anta pam gwat nga dirgwaɗ ta ma. Amma Cine kum misi a muŋ ara vula taŋ gwat ngi zumo! 27Mbur a wuzla kumo, mamurɗo hin ngi siifa naŋ ko neˀ gu ti lik naŋ na, ada kwa? 28Ki likaka zana ngi ki vur mike? Puraka matayay mafuyukom na, anta gam slra ta, anta siram gugumay ta ma. 29Yo yi ɓukum na: ko Salomoŋ ti dudok naŋ kwana, a ki zana mezle ka taŋ na ɗaˀ ta. 30Giziŋ misi a ɓuh dana, tiprik a sa hizigakaŋ ar vu, da Buymisemuŋ ara kaŋ zana kahana na, a sa kukum di da kumo fineˀ giziŋ vuna ta jak kwa? Kum misi tiɓi keɗeccehey! 31«Ki ɓam: ‹I sa zumam mike? I sa sam mike? Malla ‹I sa kam mike?› na, anja ki likam kanah ta. 32Mizli duniyahaya, ara sipam gwat tayna ndrehhe. Amma Cine kum misi a muŋ, a si na gwat kum misi ti may naŋ na le gar. 33Zuwen kam slimiɗ ar Zumabuy ngi muŋ ati gwat mijeŋŋe Buymisemuŋ mawuɗo ɗagay. Gwat tayna gar, Buymisemuŋ a sa pukum di ameˀe ma. 34Ki likaka hin misi tiprike ta, hin misi tiprike, a sa lik hirnga naŋ vuna si. Hin gar na, naŋ ti gir nga naŋ, muk ti naŋ si.

Currently Selected:

Matiye 6: BEGDC

Highlight

Copy