Luk 2

Ɓi ngi yi Yesu

(Yo pura Mat 1.18-25)

1Ti di nah na, buy mimadiɗa Oguste a ɗuf ɓi, a ɓi ɓa a tohoko mizli ngi si hirwuyo keɗeɗe gar. 2Toho vu mudumbuŋ nah a gi na, naɓa Kiriniyus i buy miwi li ngi Siri.

3Mizli gar a ram nga toho slimiɗe, mbur gar angi hirwuy naŋ, angi hirwuy naŋ. 4Zozefe kwana, a pula Nazaret, hirwuy Galile, aru ng'ar walahay ngi Davit mazilaka Beteleyem, angi hirwuy Yude. Asi Zozef i muy ngi Davit, yo i dideˀ naŋ.

5Aru ɓa ara tohoko slimiɗ taŋ a diga ati ngwas naŋ Mariya misi ti huro. 6Ti taŋ misi a diga na, hin ngi Mariya ɓa a yi a ndila le. 7A ya mangal naŋ modogomo, a mbiza ti zana, a hina ar li ngi vula gwat ngi zum da ginewey. Asi li ngi hin da taŋ anta ar hay ngi mulakaya ta.

Modro ngi Buymisemuŋ mibiga vu da mijiginey

8Angi hirwuy nah vuna, mijiginey ada, a hinam ti duvuɗ a ɓuh avu ginew taŋhay. 9Modro ngi Bumbulvuŋ a biga taŋ vu deŋ a mbuŋ taŋ, yo dudok ngi Bumbulvuŋ a pusluɗ kpah ng'ar taŋ. Zluwun a ga taŋ haɗa teˀe. 10Dar modro a ɓa taŋ: «Ki zluwunam ta, ani yi so ngi tulukum mi ti ɓimezle. Mizli gar a sa mumulom di haɗi. 11Puraka, a yukum Milahavu le ngadana, angi walahay ngi Daviti. I Buy Kristu. 12Yo gwat masa bugukum di anihĩ: kisa ra lumam zuŋ gaza mimbiza le ti zana, mihina le ar li vula gwat ngi zum da ginewey.»

13Gurjik ar nah vuna si na, modrohoy heɓe heɓe, migi vurum ngi muŋhoy jom ati modro mudumbuŋ tuwa, a zlam dimis ngi hunuma Buymisemuŋ, a ɓam:

14«Dudok da Buymisemuŋ misi sesẽŋ a dadala muŋ!

Zuy a ruwuy, da mizli naŋ mawuɗ taŋ haɗi!»

Mijiginey miram nga Beteleyem

15Akẽh na, modro ngi Buymisemuŋhoy mupulaka taŋ, mimam nga muŋ na, mijiginey a ɓam ar wala taŋ: «Gwat migi, Bumbulvuŋ minjika ndra di na, akum ngbasl a Beteleyeme, i ra puraka.» 16Dar a wusam vu kutum, ara lumaka Mariya ati Zozef waɗ zuŋ gaza tuwa tup ar li ngi vula gwat ngi zum da gineweye. 17A dirba taŋ mupuraka na, a slufaka ɓi modro miɓa taŋ di vur mangal tuwa. 18Mizli micin naŋhay gar na, mingiɓi ngi mijiginey a zuma taŋ hirnga le. 19Mariya kwana, a ja ɓi tayna gar a hirnga, a wulka taŋ a mevele. 20Dar mijiginey a mam bal ti zli dimis waɗ ti ga dudok da Buymisemuŋ, a hunumakaŋ asi ɓi taŋ micinaka ati gwat taŋ mupuraka gar na, a gi le kasl kasl kaɓa modro miɓa taŋ di.

Micaka slimiɗ da Yesu

21Hin dangafaɗ a dirba nah na, hin ngi ca mangal a mizaw a ndila le. A cakaŋ slimiɗe Yesu, kaɓa modro mibiga taŋ di zle dumbuŋ angi gi hur naŋ na.

Musoko bigaka Yesu ar hay ngi Bumbulvuŋ

22Yo hin a ndila le, ɓa a gaka mezegwel ngi bi ti hiryi avra, kaɓa ɓimujuwa ngi Moyis miɓa ɗaˀ le zleˀe tuwa. Dar a ram ti mangala nga Zeruzaleme, ɓa a bigaka da Bumbulvuŋ. 23Naŋ kine, ɓimujuwa ngi Bumbulvuŋ a ɓi na: «Mangal modogom gar na, a sa vulaka da Bumbulvuŋ.» 24Ti Mariya ati Zozefe, a vulam gwat ngi gi mikuli a mbuŋ Buymisemuŋ kaɓa ɓimujuwa miɓa, gonokoy zlaɓ cuw, mizile ati mongoso, malla ziri ɗiyuw dirgwaɗay cuw.»

25Ar hin nah, mbur ada a Zeruzaleme, a zilaka Simeyoŋ. I mbur mijeŋŋe masipa jiviɗ ngi Bumbulvuŋ. A ra kutuko mbur masa laha Israyele, yo ˀUf Mipala, naŋ da angi naŋ. 26ˀUf Mipal a njikaŋ di le zleˀe, naŋ anta sa muc ta, sey da a pura Mesi ngi Bumbulvuŋ na le ɗagay. 27Dar ˀUf Mipal tuwa a hizigiɗo di, a so ng'ar hay ngi Bumbulvuŋ so. Miyi ngi Yesuhoyo, ti taŋ miram ti Yesu nga gi mezegwel kaɓa ɓimujuwa miɓa vurˀe na, 28Simeyoŋ tuwa a zuɓa Yesu gumbuˀ a haŋ, a hunuma Buymisemuŋ, a ɓi:

29«Bumbulvuŋ, wurenna pula gawla ɗik

a muc ti zuy muduba, kaɓa ka miɓa zleˀe.

30Asi hiri ɗu a pura lahavu,

ka mislino di na le,

31lahavu ka miɗiya ɓi nah,

vur sukwi ngi mizli gar.

32I li minjahha masa buguw njah

avu mizli ngi duniyahay keɗeɗe,

yo maga dudok da Israyel, mizli ɗikey.»

Simeyoŋ minjika ɓi ngi Buymisemuŋ

33Ɓi mizli maɓaka vur mangala, a zuma hirnga le da cine ati mumuŋ. 34Simeyoŋ a ɗuwula taŋ mi, a ɓa Mariya, mumuŋ ngi Yesu: «Mangal hana, Buymisemuŋ a winaŋ le ngi hizigiɗa malla ngi slikiɗa Israyeley haɗa, yo ɓa a sa puraka Buymisemuŋ ava, amma mekelemey anta sa tiɓakaŋ ta. 35Ka vuna, bonoy a sa zliguw mevele njoŋ ka gordo. Wuluk ngi mizli haɗi mawulkam a mevel taŋ na, a sa njiki.»

Ana, ngwas mijiviɗi

36Ngwas mijiviɗ ada akẽh ma, a zilaka Ana, i zuŋ ngi Fanuyel, angi sukwi ngi Aser. Angi diili naŋ na, a ɗuvam vu vi tarnaˀ tewle ati zil naŋ. A gi gal le haɗi. 37A cifi wudiga joˀ pal naŋ, hã vi ngi yi naŋ a ndila kukur dangafaɗ nga mufaɗa. N'anta pula hay ngi Bumbulvuŋ ta, ara huruk huruk a mbuŋ Buymisemuŋ duvuɗ ti papas gar ti gi dalyam ati dira dibiɗi. 38A ndilawa kasl ti nah vuna, a zla a ga sise da Buymisemuŋ, a ɓa ɓi ngi mangala da mizli makutukom Bumbulvuŋ masa laha Zeruzaleme.

Mi nga Nazaret

39A dirba taŋ mikiɗaka mi ngi gi mezegwel gar kaɓa ɓimujuwa ngi Buymisemuŋ na, a mam nga Nazaret, hirwuy Galile a muŋ. 40Mangala kwana, ara gil, ara lum gidaŋ, a nih le kɗaf kɗaf ti sinmijileŋ. Gi mezle ngi Buymisemuŋ naŋ da angi naŋ.

Yesu ar hay ngi Bumbulvuŋ a Zeruzalem

41Vur vi gar na, miyi ngi Yesuhoy a ram ndol le a Zeruzaleme nga gi muguzlum Pak. 42Yesu mindila vi kuruˀ nga cuw na, a ram nga diga kaɓa sirik magaka ngi muguzlumo. 43Muguzlum mikiɗ mi na, a dirba nah, ara mam le, amma mangal taŋ Yesu, a ndir le a Zeruzaleme na, miyi naŋhay a si na ka ta 44A waka na, naŋ da a wuzla mizli taŋ maram bumoˀ na. A vam hiipas ar li ru, a sa zlaka pur naŋ a wuzla muy naŋhay ati cil naŋhaya. 45Taŋ mulumaka ta na, a mam nga Zeruzalem a muŋ bal ti pur naŋ. 46A sa lumaka ar hin mimakir naŋ, ar hay ngi Bumbulvuŋ, a wuzla Yude, buy ngi ɓimujuwahay. A ra cine ɓi taŋ, yo ara cufuɗa taŋ ma. 47Mizli macinam mingiɓi naŋ gar na, a ga taŋ ngirkik, asi lesl naŋ ati mingiɓi naŋ mambiɗa taŋ di na. 48Taŋ mupuraka kanah na, a zuma taŋ hirnga teˀe, joˀ mumuŋ a ɓaŋ: «Mangal ɗu, ki ga ndra di kahana vur mike? Pura, ndra ati bunuko, i ra supukuw, didak a muɗa ndra le haɗa.» 49Yesu a ɓa taŋ: «Ki sipikiy zleˀe ngi mike? Sey yi ndir a hay Baha na, ki sinaka zleˀe ta kwa?» 50Amma ko taŋ a slaka wala ngi ɓi naŋ maɓa taŋ di vuna ta.

51Dar Yesu a moko bumoˀ ati taŋ nga Nazarete, ara cine taŋ mi. Mumuŋ a ja ɓi ngi gwat tayna gar a hirnga. 52Yesu ara gil, ara lum sinmijileŋ, yo naŋ mezle avu Buymisemuŋ waɗ avu mizli ma.

Currently Selected:

Luk 2: BEGDC

Highlight

Copy