Luk 1
1
Ɓi ngi ɗerewol Luk mizli virzi
1Gwatay migam ar wala ndra na, mizli haɗi a zlaka a tohoko ɓi nah. 2A tohoko kaɓa mizli mupuraka ti hiri taŋ, muslufam ndra di, zle angi zli virzi naŋ. Mizli tayna a tiram le i gawla ngi tila mi ti ɓi ngi Buymisemuŋ. 3Wurenna so na, Teyofil, ka mbur hirnga, a dirba ya mika virzi naŋ gar, zle angi zli virzi naŋ na, ya kwana, a giy le kuy, ɓa yi tuhuw di ti jiviɗ naŋ ɗalla da ka ya, 4ɓa ki si na gwat taŋ mudubunukuw di na, naŋ jeŋŋe.
Modro ngi Buymisemuŋ miɓa ɓi ngi yi ngi Zaŋ
5Ti hin ngi Herod mazum buy angi hirwuy Yude na, mbur mekelem ada, a zilaka Zakari, i masay, naŋ ar ngay ngi Abiya. Ngwas naŋ a zilaka Elizabete, a bo tir tizer ngi Aroŋ. 6Taŋ cuw taŋ, i mizli mijeŋŋehey a mbuŋ Buymisemuŋ. Ɓimujuwa ati ɓimuɗuva ngi Bumbulvuŋ muvula gar na, a sipaka ti jiviɗ naŋ kasl kasl wãˀ. 7Amma taŋ manja zuŋ, asi Elizabet i dirlay, yo taŋ cuw taŋ, a gam gal le si. 8Hin ɓa Zakari a ga slra nga naŋ masay ar hay ngi Bumbulvuuŋ na, a ndilo le, vur a mbuɗo le ar ngay taŋ.
9A gaka sirik ngi gi mikuli a mbuŋ Buymisemuŋ taŋ, ceregezleŋ a diɗ ar Zakari, ɓa ara zluma mukuturɓuy ar hay ngi Bumbulvuŋ. 10Hirak ti naŋ mira zluma mukuturɓuy tuwa na, naɓa zigiduw gar ara dir dibiɗ avra. 11Dar Modro ngi Bumbulvuŋ a bigaŋ vu deŋ tir vay hazum ngi li zluma mukuturɓuy tuwa. 12Zakari mupura keɗ na, a muɗaŋ didak le, a zluwun kir kir. 13Amma modro tuwa a ɓaŋ: «Ki zluwun ta, Zakari, asi Buymisemuŋ a tiɓa dira dibiɗ ɗike le. Ngwas ɗik Elizabete, a sa yuw mangal mizile, kisa caŋ slimiɗe Zaŋ. 14Ki sa mumul, kisa zluzluɓ vurˀe, yo mizli haɗi a sa mumulom ti yi naŋ. 15Asi mike na, a sa tiri mbur madiɗa a mbuŋ Bumbulvuŋ. N'anta sa si mbaazla ta, anta sa si baraasa ta. A sa nih ti ˀUf Mipal zle a kwacay mumuŋ. 16A sa mo ti Israyeley haɗi ng'avu Bumbulvuŋ Buymisemuŋ taŋ. 17Yo a sa ki ɓaˀ a mbuŋ, a mihiri ngi Buymisemuŋ ti lesl ati gidaŋ ngi Eli, ɓa a jumoˀay ngi cine ngi ziri ati ziri taŋhay, yo ɓa a mo ti mizli macinam mi tahaya, ɓa a wulkam ka mizli mijeŋŋehey, ɓa a ɗiya mizli, a wam vu ngi kutuko Bumbulvuŋ.» 18Zakari a ɓa modro tuwa: «I sa si na avu mike? Asi yi midigila, yo ngwas ɗu a gi gal le.» 19Modro a mbiɗaŋ di: «Yi Gabriyel, yi ro deŋ a mbuŋ Buymisemuŋ. A slinoko ya ngi ɓuw ɓi, yo ɓa i suw ti ɓi mezle hana. 20Pura ɗi, kisa ndir ngbimme, kisa ɓi gu mata, hã tapas gwat hana misa gi le. Asi ɓi ɗu masa gi angi hin naŋ na, ki tiɓa ta.»
21Mizli ara kutukoko Zakari, yo naŋ mizik ar hay ngi Bumbulvuŋ na, a zuma taŋ hirnga le. 22Ti naŋ mubo na, a ɓa taŋ gu ta. Mizli a slaka wala nah le, a ro na, a pur gwat le ti kleŋ ar li mipal wãˀa. Dar a ɓa taŋ ti haŋ, a ndir, a ɓi gu ta.
23Pas ngi slra naŋ mikiɗ mi na, Zakari a mi ngi hay naŋ. 24A dirba nah, ngwas naŋ Elizabet a gi hur, a ɗumo ɓi nah hã kiya zlum. Joˀ a ɓi ti kwacay naŋ: 25«Hana i gwat Bumbulvuŋ migiy di angi pas naŋ muɗuva hiri angi ya, ɓa ngi kiɗa mi ngi gwat mapiy mesem a mbuŋ mizli.»
Modro ngi Buymisemuŋ miɓa ɓi ngi yi Yesu
26Angi kiya mimerkeɗ ngi hur ngi Elizabet na, Buymisemuŋ a slino modro naŋ Gabriyel ng'ar walahay mazilaka Nazaret, hirwuy Galile, 27ng'avu zuŋ diili, meketeŋ ngi mbur mazilaka Zozef, muy ngi Daviti. A zilaka zuŋ diili vuna Mariya. 28Modro ngi Buymisemuŋ a ci ng'avaŋ, a ɓaŋ: «Ka, Buymisemuŋ a guw mezle le, mumul! Bumbulvuŋ naŋ da ati ka.» 29Mingiɓi nah a muɗa didak da Mariya teˀe. Joˀ a wuluk ar mbiɗeˀvra ngi ji haŋ nah vuna. 30Modro tuwa a ɓaŋ: «Ki zluwun ta Mariya, asi Buymisemuŋ a guw mezle le. 31Ani, kisa gi hur, kisa yi mangal mizile, kisa caŋ slimiɗe Yesu. 32A sa tiri mbur madiɗa, a sa zilaka Mangal ngi Buymisemuŋ Mimadiɗa. Bumbulvuŋ Buymisemuŋ a sa caŋ ar buy ngi dideˀ naŋ Daviti. 33A sa zum buy ar sukwi ngi Zakop hã ngi sete. Zumabuy naŋ anta sa kiɗ mi ta wãˀ.» 34Dar Mariya a ɓa modro tuwa: «Ani yi zuŋ diili mungbuˀo aruŋ, ɓi hana a sa gi mbri mbri ska?» 35Modro a mbiɗaŋ di: «ˀUf Mipal a sa so ar ka, gidaŋ ngi Buymisemuŋ Mimadiɗa a sa sirtuw ti susuɗuk naŋ. Vurˀe, mangal masa ya ka na, naŋ pal, yo a sa zilaka Mangal ngi Buymisemuŋ. 36Pura ɗi, muy ɗik Elizabete, ko ti naŋ migi gal na kwana, a gi hur le ya, i mangal mizile. Mizli a zilaka zleˀe dirlay, amma wurenna, naŋ ti hur kiya merkeɗe. 37Asi gwat mafucuka Buymisemuŋ anta.» 38Dar Mariya a ɓi: «Yi diili migi slra ngi Bumbulvuŋ. Anja a gi angi ya kaɓa ka miɓa.» Joˀ modro tuwa a pulaŋ.
Mariya muru nga pura Elizabete
39Hin neˀ a dirba nah na, Mariya a bi, aru kutum nga hirwuy muwã, angi walahay mekelem ada a Yude. 40A ci ngi hay Zakari, a ja haŋ da Elizabete. 41Ti Elizabet micina Mariya mijaŋ haŋ na, mangal a wus a kwacaya, joˀ Elizabet a nih ti ˀUf Mipal. 42A zla a til mi, a ɓa Mariya: «Buymisemuŋ a ɗuwuluw mi le fineˀ ngwasay gar! Mangal ka masa ya na kwana, Buymisemuŋ a ɗuwulaŋ mi le ma! 43I ya wa, ɓa hã mumuŋ ngi Buy ɗu a so ngi hay ɗu ya na ka? 44Asi hirak ti ya micina ji haŋ ɗik na, mangal a wus, a mumul a kwacay ɗu. 45Ɓi ngi Bumbulvuŋ muɓuw di na, ki tiɓa le, a sa gi gisiŋ. Ka mumul!»
Dimis ngi Mariya
46Dar Mariya a ɓi:
«Membezleŋ ngi vu ɗu ara ga ɗongor da Bumbulvuŋ.
47Yo mevel ɗu a mumul le haɗi,
asi Buymisemuŋ, Milih ɗu.
48Asi a ɗuv hiri le
ar ya diili migi slra naŋ, mihina hirnga.
Haˀaw, zle wurenna, mizli gar
a sa jikiy salalay, a sa ɓikiy: «Ki ra mumul.»
49Vur Misi gidaŋ wãˀa,
a giy gwat madiɗahay le da ya.
Slimiɗ naŋ, i Bumbulvuŋ.
50Gi mezle naŋ a njih
ar mizli masa ɗuvakaŋ hirnga,
masa ya ka taŋ nga mbuŋ nga mbuŋ.
51A gi gwat madiɗa le
ti haŋ naŋ migidaŋ:
Mizli mahuhumom vu na,
a zliɗa taŋ hirnga le.
52Buy madiɗahay na,
a putukuso taŋ le tir janga taŋhaya,
a ga ɗongor le
da mizli mahinam hirngahaya.
53Mizli muroko ti may na,
a mba taŋ le ti zlili.
Yo misi zliliheye,
a ɓula taŋ le haŋ njoŋ njoŋ ngataraŋ.
54A so le jina gawla naŋ Israyele.
A wuluk di i mezle, naŋ miga zleˀe
55ka naŋ miɓa ɗaˀ le zleˀe da dideˀ ndrahay,
da Abraham ati dideˀ naŋhay hã ngi sete.»
56Mariya a cifam ati Elizabete, a gi gwat ngi kiya makir. A dirba nah, a mi ngi hay naŋ a muŋ.
Yi ngi Zaŋ mici mizli ar yam
57Hin ngi Elizabet a ndila le ɓa a yi, a yi mangal mizile. 58Midigwi naŋhay ati muy naŋhay a cinaka na, Bumbulvuŋ a gaŋ mezle le haɗa. Joˀ a mumulom bumoˀ.
59Angi hin midangafaɗ naŋ na, a soko ɓa a caka mangal a mizaw. A wuɗam ɓa a cakaŋ slimiɗe Zakari ka ngi cine. 60Amma mumuŋ naŋ a sla taŋ di: «Kanah ta, a sa zilaka Zaŋ.» 61Mizli a ɓakaŋ: «Na, ko mbur mazilaka kahana, anta asi muy ɗikeye ta mayse.» 62Dar a ɓaka cine ti haŋ, ɓa a sinaka, da a wuɗ ɓa a zilaka mbrike na. 63Zakari a cufuɗ dum misliprakka, a toho anga: «Slimiɗ naŋ Zaŋ.» Ɓi nah a zuma taŋ hirnga le gar. 64A haŋhaŋ si na, mi ngi Zakari tuwa a wun, irne a pusuku, dar a ɓi, a hunuma Buymisemuŋ. 65Akẽh na, zluwun a ga midigwi naŋhaya, yo a ɓaka ɓi ngi gwat tayna gar angi hirwuy muwã Yude keɗeɗe. 66Mizli micinam gar na, a jaka ɓi nah a hirnga, a ɓam: «Mangal hana a sa tiri mikpak ka?» Haŋ ngi Bumbulvuŋ a ro bac ava gisiŋ.
Zakari muhunuma Buymisemuŋ ti dimis
67Zakari, cine ngi Zaŋ, a nih le ti ˀUf Mipal. Joˀ a njiko ɓi ngi mijiviɗey ani da mizli:
68«Anja mizli a hunumaka Buymisemuŋ,
Bumbulvuŋ ngi Israyele.
Asi ara ki slimiɗ ar mizli naŋhaya,
yo a mbiɗa hirnga taŋ le.
69A bo ti ndra Milahavu migidaŋ le,
a hay gawla naŋ Davite.
70A gi le ka naŋ mubo di
ti balam mijiviɗ naŋhay zleˀe. A ɓam na:
71«Milahavu a sa tiɓa ndra avu mesene ndraˀahaya,
waɗ tisi haŋ ngi mihiris ndrahay gar.»
72A biga gimezle naŋ le da dideˀ ndraˀahaya,
a wulka jumoˀay naŋ le.
73A hudum le, a ɓa dideˀ ndra Abrahama:
74a dirba naŋ mitiɓa ndra le
tisi haŋ ngi mesene ndrahay na,
a sa pula ndra jiviɗ,
ɓa i dilkam a mbuŋ naŋ manja zluwun,
75ti sipa jiviɗ naŋ,
ti gi jeŋŋe a mihiri naŋ
ar hin ngi siifa ndra gar.
76Na ka, mangala, a sa zulukuw
mijiviɗ ngi Buymisemuŋ Mimadiɗa,
asi kisa ki ɓaˀ a mbuŋ, a mihiri
ngi Bumbulvuŋ, ɓa ngi ɗiyaŋ jiviɗi,
77ɓa mizli naŋhay a sinaka Milahavu,
asi naŋ mapuya mungra taŋhay avra.
78Hana i gimezle mihaɗa,
Buymisemuŋ ndra miga ndra di.
Bangay ngi wuna li muso paɗ ti muŋ
nga pura ndra na, mbele gimezle nah.
79A pusluɗa li da mizli misi ar luvuŋ,
yo mazluwunam ti muco,
ɓa aru ti ndra, i sipam jiviɗ muzuy.»
80Mangala kwana, ara gil, ara sin ɓi. A cifi a wuzlaɓuh, hã tapas naŋ misa bugo vu da Israyeley.
Currently Selected:
Luk 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
