Luk 3

Zaŋ mici mizli ar yam mitil mi

(Yo pura Mat 3.1-12; Mark 1.1-8; Zaŋ 1.19-28)

1Tiber buy mimadiɗa, a gi le vi kuruˀ nga zlum ar li Zumabuyo, Poŋs Pilata, a wi hirwuy Yude, Herod, i buy ngi Galile, Filip sukum naŋ, i buy ngi hirwuy Iture ati ngi Trakoniti, yo Lisaniyas kwana, i buy a Abilen. 2Han ati Kayife, i masay madiɗahay. Ti di nah, Buymisemuŋ a ɓa mingiɓi naŋ a wuzlaɓuh da Zaŋ, mangal ngi Zakari. 3Dar Zaŋ a liˀi ar li migweˀ gweˀ ngi ciki mizaw Zurdeŋ gar ti tila mi ngi ci mizli ar yam, ɓa mizli mimbiɗaka mevel taŋ le na, mungra taŋhay a puyam avra. 4Naŋ kine, a tohoko ar ɗerewol ngi mijiviɗ Ezayi na:

«Mbur ara til mi a wuzlaɓuh, a ɓi:

Ɗiyaka jiviɗ da Bumbulvuŋ,

cicakaŋ jiviɗ naŋhaya cir cir!

5Li mikwitikey gar, a sa dikam,

muwãhay gar ati li miɗigaray gar, a sa dirzaham,

jiviɗ muguduɗoŋhoy gar, a sa cicam cir cir,

jiviɗ ngir ɗuguroy a sa ndiram sinarra.

6Mizli gar a sa puraka

lahavu Buymisemuŋ malaha taŋ.»

7Zigiduw maso ng'avu Zaŋ ɓa a ca taŋ ar yam tuwa na, dar aɓa taŋ: «Kum sukwi ngi kwecesley! Bumbulvuŋ masa zuɓ himaˀ na, muɓukum di i wa, kisa laham ava gu ka? 8Gam gwat mezle mabiga ki mbiɗaka mevel kumoyo le ayɗi! Yo ki ɓam ti kwacay kumo: «Abraham i dideˀ ndra» na, ki ɓam ta. Yi ɓukum na: Ko ɗugur hanayna, Buymisemuŋ a tiri ti taŋ ziri ngi Abrahamaya gu. 9Zlimbe a ro taˀ avu slaslalak ngi widiseye si. Widis mayi mezle ta gar na, a sa bukokoŋ, a hizigaka ng'ar vu.» 10Joˀ zigiduw haɗi a cufuɗaka Zaŋ: «Ani ndra, i gam mbri ska?» 11A mbiɗa taŋ di: «Mbur misi ti zana cuw na, a vul pal da mbur manja zana. Mbur misi ti gwat ngi zum kwana, anja a ga kanah ya.» 12Micikila buutuhoy a soko ɓa a caka taŋ ar yam aya, a ɓakaŋ: «Kumani, ani ndra, i gam mbri ska?» 13A ɓa taŋ: «Ki tiɓaka buutu fineˀ muɗuvaka na ta.» 14Sojehey a cufuɗakaŋ: «Na, ndra, i gam mbrike?» A ɓa taŋ: «Ki tiɓam dala ti gidaŋ avu mbur ta, ko ki jam ɓi lambaˀ da mbur ta. Yo kutukom wuruk kum ngi kiya si.»

15Mizli ara kutukom, yo ara wulkam a kwacay taŋ vur Zaŋ, a ɓam: «Ani na, i Mesi kwa?» 16Dar Zaŋ a mbiɗa da mizli gar: «Ya, i cukum ar yam, amma mbur migidaŋ fineˀ ya, ara sawa a dirba ɗu, yi ndila ter ngi puska zeweɗ ngi tarak naŋ ta. Naŋ, a sa cukum ar ˀUf Mipal waɗ ar vu. 17Naŋ kaw ti gungwa ngi kufa daw a haŋ ɓa ngi wunka mayam ati cekwesl naŋ. A sa hila mayam ngi dawa nga dirgwaɗ, amma cekwesl naŋ na, a sa wura ar vu mamuc ta.»

18Naŋ kine, Zaŋ a til mi ti Ɓimezle da mizli ɓa ngi vula taŋ gidaŋ ti ɓi wal wal. 19Zaŋ a mbiɗa hirnga da Herod, buy miwi li ngi Galile, vur naŋ muzuɓa Herodiyad, ngwas ngi sukum naŋ Filip, yo asi gwat malambaˀ mekelemey, naŋ miga taŋ gara ma. 20Herod a gi gwat malambaˀ mekelem ava mani, a ca Zaŋ ar dangay.

Zaŋ mica Yesu ar yam

(Yo pura Mat 3.13-17; Mark 1.9-11)

21Taŋ micaka mizli gar ar yam a kiɗ mi na, a caka Yesu ya. Ti naŋ madir dibiɗ na, birngiŋ ngi muŋ a wucuh wucah. 22ˀUf Mipal a po sar ar Yesu ti dumvu ka gonok. Yo ˀay a cino paɗ a muŋ, a ɓi: «Ki Mangal ɗu ya mawuɗow haɗa, i ra mumul vur ka haɗi.»

Dideˀ ngi Yesuhoy

(Yo pura Mat 1.1-17)

23Ti Yesu mizla gi slra naŋ na, naɓa vi naŋ a gi gwat ngi kukur makir. Mizli a waka zleˀe na, Yesu i mangal ngi Zozef, Zozef mangal ngi Eli, 24Eli i mangal ngi Matta, mangal ngi Levi, Levi i mangal ngi Melki, Melki i mangal ngi Zanay, Zanay i mangal ngi Zozef, 25Zozef i mangal ngi Matatiyas, Matatiyas i mangal ngi Amos, Amos i mangal ngi Nahum, Nahum i mangal ngi Hesili, Hesili i mangal ngi Nagay, 26Nagay i mangal ngi Maˀata, Maˀata i mangal ngi Matatiyas, Matatiyas i mangal ngi Semeyin, Semeyin i mangal ngi Zozek, Zozek i mangal ngi Yoda, 27Yoda i mangal ngi Yoˀanaŋ, Yoˀanaŋ i mangal ngi Resa, Resa i mangal ngi Zorobabel, Zorobabel i mangal ngi Salatiyel, Salatiyel i mangal ngi Neri, 28Neri i mangal ngi Melki, Melki i mangal ngi Addi, Addi i mangal ngi Kosam, Kosam i mangal ngi Elmadam, Elmadam i mangal ngi Eri, 29Eri i mangal ngi Yesu, Yesu i mangal ngi Eliˀezer, Eliˀezer i mangal ngi Zorim, Zorim i mangal ngi Matata, Matata i mangal ngi Levi, 30Levi i mangal ngi Simeyoŋ, Simeyoŋ i mangal ngi Yuda, Yuda i mangal ngi Zozef, Zozef i mangal ngi Zonam, Zonam i mangal ngi Eliyakim, 31Eliyakim i mangal ngi Meleya, Meleya i mangal ngi Menna, Menna i mangal ngi Matata, Matata i mangal ngi Nataŋ, Nataŋ mangal ngi Davit, 32Davit i mangal ngi Zese, Zese i mangal ngi Zobet, Zobet i mangal ngi Boˀos, Boˀoz i mangal ngi Sala, Sala i mangal ngi Naˀasoŋ, 33Naˀasoŋ i mangal ngi Aminadap, Aminadap i mangal ngi Adamin, Adamin i mangal ngi Arni, Arni i mangal ngi Hesroŋ, Hesroŋ i mangal ngi Fares, Fares i mangal ngi Yuda, 34Yuda i mangal ngi Zakop, Zakop i mangal ngi Izak, Izak i mangal ngi Abraham, Abraham i mangal ngi Tara, Tara i mangal ngi Nakor, 35Nakor i mangal ngi Seruk, Seruk i mangal ngi Ragaw, Ragaw i mangal ngi Falek, Falek i mangal ngi Eber, Eber i mangal ngi Sela, 36Sela i mangal ngi Kenaŋ, Kenaŋ i mangal ngi Arpakzat, Arpakzat i mangal ngi Sem, Sem i mangal ngi Nowe, Nowe i mangal ngi Lamek, 37Lamek i mangal ngi Matusalem, Matusalem i mangal ngi Henok, Henok i mangal ngi Zaret, Zaret i mangal ngi Maleleˀel, Maleleˀel i mangal ngi Kenaŋ, 38Kenaŋ i mangal ngi Enos, Enos i mangal ngi Set, mangal ngi Adamu, Adamu i mangal ngi Buymisemuŋ.

Currently Selected:

Luk 3: BEGDC

Highlight

Copy