Luk 18

Ɓi ngi ngwas wudiga ati mbur migi kiita

1Yesu a wa taŋ ɓi miweˀ ti wi ɓa a biga taŋ di na, anja sey a diram dibiɗ ndrehhe, a giram ta wãˀ. 2A ɓa taŋ: «Ar walahay mekelem ada na, migi kiita ada zleˀe. N'anta cika hirnga da Buymisemuŋ ta, ɓi ngi mizli a caŋ ta. 3Angi walahay nah vuna, ngwas wudiga ada, a so ndrehhe a luuma mbur migi kiita tuwa, a ɓaŋ: «Sla ndra kiita ani ar wala ndra ati mesene ɗu.» 4Migi kiita nah tuwa a ngum ta, a ngum ta, hã a zik le. A dirba nah, a ɓi ti kwacay naŋ: «Ko ti ya mazluwun ti Buymisemuŋ ta, yo ɓi ngi mizli miciy ta na tekeɗe kwana, 5ngwas hana ara giriy, yi sa slaŋ kiita naŋ na, ɓa a so ndrehhe ngi giriy mata.›»

6Buy Yesu a ɓi ma: «Cinaka mbur migi kiita mijjeŋ ta hana maɓi. 7Na, mizli Buymisemuŋ muwuna taŋ, matuwam ng'ava papas ti duvuɗ na, a ɗiya taŋ ɓi taŋ takwa? A jina taŋ kutum takwa? 8Yi ɓukum na: A sa sla taŋ ɓi taŋ kutum jaka. Na, da Mangal ngi mbur misa so le na, a sa lum tiɓi a ruwuy aka aruŋ kwa?»

Ɓi ngi mbur Farisa ati micikila buutu

9Yesu a wa ɓi ani weˀ ti wi, vur mizli mekelemey mawaka kaɓa taŋ jeŋŋe, amma mapuraka mizli numuŋhoy gar hiris le na: 10«Mizli cuw a ram nga dira dibiɗ ar hay ngi Bumbulvuŋ. Pal numuŋ i mbur Farisa, mipal mekeleme, i micikila buutu. 11Mbur Farisa a cici, a dir dibiɗ a mevele, a ɓi: ‹Aw Buymisemuŋ ɗu, yi guw sise, asi y'anta kaɓa mizli mekelemey ta, taŋ i muhuloy, i malambaˀhay, i migi madamahay, yo y'anta ka mbur micikila buutu hana ta ma. 12Angi hin tarnaˀ gar na, yi gi dalyama hin cuw. Mukuruˀngi gwat ɗu, ya muluma le gar na, i ra vuluw di.› 13Amma mbur micikila buutu, naŋ a cici zar neˀ, ko a wuɗ zuɓa hiri nga muŋ ta, a buca haŋ a didak, dar a ɓi: ‹Aw Buymisemuŋ ɗu, yi mbur migi mungra, puriy ˀircece.› 14Yi ɓukum na: Mbur nah mimi ngi hay naŋ na, naŋ jeŋŋe, amma mbur Farisa, kanah ta. Mbur gar maɗuva hirnga da vu naŋ na, a sa mam di nga ruwuy. Mbur gar mama vu naŋ nga ruwuy na, a sa gilakaŋ nga mbuŋ.»

Yesu muɗuwula mi da ziri memeɗehey

(Yo pura Mat 19.13-15; Mark 10.13-16)

15Mizli a soko hã ti ziri ngi dubahay ng'avu Yesu, ɓa a buca haŋ avu taŋ, amma mizli ngi seˀehey mupuraka taŋ kanah na, a bucaka taŋ. 16Amma Yesu a zilo ziri tuwa ng'avaŋ, a ɓi: «Pulaka ziri a soko ng'avi ya. Ki tikaka taŋ ta, asi Zumabuy ngi Buymisemuŋ, i ngi mizli misi ka taŋ na. 17Gisiŋ, yi ɓukum na: Mbur matiɓa Zumabuy ngi Buymisemuŋ kaɓa zuŋ meciɗek ta na, anta sa ci anga ta wãˀ.»

Mbur misi zlili

(Yo pura Mat 19.16-30; Mark 10.17-31)

18Mbur madiɗa ngi Yudehey ada, a cufuɗa Yesu: «Kumani mezle, sey yi gi mi ɓa yi lum siifa ngi sete ka?» 19Yesu a ɓaŋ: «Ki ziliy mbur mezle vur mike? Mbur mezle anta, sey i Buymisemuŋ pal naŋ. 20Ki si na ɓimuɗuvahaya le: «Ki gi madama ta, ki kiɗ hirnga ta, ki hul ta, ki gi sedewo ti slir ta, ɗuva hirnga da bunuk ati munuko.›» 21Mbur madiɗa tuwa a ɓaŋ: «Ɓi tayna, yi ja taŋ le gar a hirnga, zle ti gawla ɗu si.» 22Yesu micina kanah na, a ɓaŋ: «A ndiruw le gwat purla: hiɗika gwat ɗikeye gar avra, yo wuɗka dala nah da misi murgahay, ɓa kisa lum zlili ngi muŋ. A dirba nah, so sipiy.» 23Amma mbur tuwa micina na, a nduruɓ hiri haɗa, asi i mbur misi zlili haɗi. 24Yesu a puraŋ cum cum na, a ɓi: «Kay, naŋ tuwaˀ ɓa misi zlilihey a cam ng'ar Zumabuy ngi Buymisemuŋ! 25Gisiŋ, zlogomo a ci kutum tir vigiɗ ngi batala, fineˀ mbur misi zlili maci ng'ar Zumabuy ngi Buymisemuŋ.» 26Mizli micinama a ɓam: «Da kine na, masa lih gu, i waka?» 27Yesu a mbiɗa taŋ di: «Gwat mizli magaka gu ta na, Buymisemuŋ a ga gu.»

28Dar Piyer a ɓaŋ: «Ani ndra, i puloko gwat ndraˀahaya le gar, i ra supukuw.» 29Yesu a ɓa taŋ: «Gisiŋ, yi ɓukum na: Da mbur a pulo hay naŋ le, malla ngwas naŋ, sukum naŋhay, miyi naŋhay, malla ziri naŋhaya le asi Zumabuy ngi Buymisemuŋ na, 30a sa lum gwatay haɗi, fineˀ gidaŋ angi hin misi wurenna. Yo angi hin masa sawa na, a sa lum siifa ngi sete.»

Yesu miɓa ɓi ngi muc naŋ waɗ ngi slikiɗ naŋ sar mimakir naŋ

(Yo pura Mat 20.17-19; Mark 10.32-34)

31Yesu a zila mizli ngi seˀe mukuruˀ nga cuwoyo ng'avaŋ, a ɓa taŋ: «Puraka, ani i ra ram nga Zeruzalem. Ɓi mijiviɗey mutohoko gar vur Mangal ngi mbur tuwa, a sa gi gisiŋ muduba. 32Asi a sa vulakaŋ asi haŋ ngi mizli duniyahay, a sa singiram angaŋ, a sa zakaŋ, a sa tufakaŋ tazlay, 33a sa sliɗakaŋ, waɗ a sa kiɗaka vagay. Amma angi hin mimakir naŋ na, a sa slikiɗ a muŋ.» 34Amma mizli ngi seˀehey a slaka wala ngi ɓi hana ko neˀ ta. Mingiɓi nah a ndir i ɓi muɗumo avu taŋ. Yesu a wuɗ a ɓi kahana na, a si na ka ta

Yesu muwuna hiri ngi mbur dangar

(Yo pura Mat 20.29-34; Mark 10.46-52)

35Ti Yesu mindil gweˀ nga Zeriko na, mbur dangar ada, a cifi le aciki jiviɗi, ara suk gwat avu mizli. 36Naŋ micina zigiduw macuh na, a cufuɗ vu: «I mi migi ka?» 37Mizli a ɓakaŋ: «I Yesu mbur Nazaret macuhu.» 38Dar a tilaŋ mi: «Yesu, Mangal ngi Daviti, puriy ˀircece takwa!» 39Mizli maram a mbuŋ, a bucakaŋ ɓa a taˀa mi, amma naŋ, a til mi ti gidaŋ ava ma jak: «Mangal ngi Daviti, puriy ˀircece takwa!» 40Yesu a cici, a ɓi ɓa a sakaŋ di. Ti naŋ mupuyaha na, Yesu a cufuɗaŋ: 41«Ki wuɗ ɓa yi guw mike?» A mbiɗaŋ di: «Yi wuɗ ɓa yi pur takwa Buy!» 42Yesu a ɓaŋ: «Pur, tiɓi ɗik a lihuw le.» 43Ar nah si na, ara pur, a sipa Yesu ti ga sise da Buymisemuŋ. Mizli mupur naŋhay gar na, a zlaka a hunumaka Buymisemuŋ ya.

Currently Selected:

Luk 18: BEGDC

Highlight

Copy