Luk 17

Mungra ati pula mungra

(Yo pura Mat 18.6-7,21-22; Mark 9.42)

1Yesu a ɓa mizli ngi seˀeheye: «Gwat mahizigiɗa mizli ng'ar mungra na, a tik ta. Amma mbur mahizigiɗ mizli ng'ar mungra na, kay, naŋ ar bonoy! 2Zuwen taŋ majuwakaŋ ngurvuŋ tindriŋ asi ˀaya, a hizigakaŋ ng'ar mubuliy, ɓa anja a hizigiɗ mbur pal a wuzla mizli mizlew tayna ng'ar mungra mata. 3Jiginaka hirnga kumo kuy kuy!

Da sukum ɗik a guw mungra le na, kutaŋ. Da a zil marava le na, pula ɓi nah teˀe. 4«Da a guw mungra le is tarnaˀ angi hin purla, amma da ara mo ng'avi ka, a ɓuw: ‹Wereke, wereke› hã is tarnaˀ aya na, kisa pula ɓi nah teˀ si.›»

Tiɓi

5Misliney a ɓaka Buy Yesu: «Sika ndra tiɓi ndra ava.» 6Buy Yesu a mbiɗa taŋ di: «Da kum ada ti tiɓi ko neˀ, ka zinga ngi lar ada#17.6 Pura Mat 17.20 ati mingiɓi ngi seˀe a ruwuy. kwana, kisa ɓaka bazlawar hana: ‹Muɗ muroh, ara ngi a hur mubuliy› na, a sa cinukum mi.

Slra ngi gawla ngi mbur

7Mburo, da naŋ da ti gawla naŋ mahuvaŋ ar guva malla majiginaŋ ginewey, da naŋ mumo le ti ɓuh na, a ɓaŋ: ‹Aru kutum, ara zum gwat› si na, i wa a wuzla kumo ka? 8Amma a sa ɓaŋ jak na: ‹Diy ɗaf, yo ka zana ngi slra ɓa ki siy ti gwat ngi zum, i sa zum, i sa si. A dirba nah, ka kwana, kisa zum, kisa si aya› takwa? 9A ga sise da gawla nah vur naŋ migaŋ gwat naŋ miɓaŋ di na kwa? 10Naŋ kine ya, kumo kwana, gwat muɓukum di le ɗaˀ le gar, da ki gaka le na, ɓam: ‹Ndr'i mizli migi slrahay si, i gam di i slra ndra magaka cummo.›»

Yesu miɗiya misi kukulahay kuruˀu

11Ti Yesu mazuɓa jiviɗ nga Zeruzalem na, a cuh bal ti Samari ati Galile. 12Naŋ maci ng'ar walahay mekelem ada na, misi kukulahay kuruˀ, ara jam di hirnga. A cicam zar kileŋ neˀ. 13Joˀ a tilakaŋ mi: «Yesu, Kumani, pura ndra ˀircece!» 14Yesu mupura taŋ na, a ɓa taŋ: «A ra bigaka vu kumo da masayay.» Ti taŋ maram ti ru aruŋ si na, a ɗiyam le. 15Mbur pal a wuzla taŋ mupura a ɗiyi le na, a mo ng'ava bal ti hunuma Buymisemuŋ, ˀay paɗ a muŋ. 16A huruk huruk asi sar ngi Yesu, a gaŋ sise. Dambalaka i mbur Samari. 17Dar Yesu a ɓi: «Mizli mukuruˀhoy na gar a ɗiyam le takwa? Na, mungoltir mekelemeye, taŋ amaka? 18Ko mbur pal asi taŋ mumo nga ga sise da Buymisemuŋ anta, sey mbur Samari hana tewle si kwa?»

19Joˀ Yesu a ɓaŋ: «Slikiɗ, a ru, tiɓi ɗik a lihuw le.»

Bumbulvuŋ masa so Zumabuy naŋ

(Yo pura Mat 24.23-28,37-41)

20 Farisahay a cufuɗaka Yesu: «Buymisemuŋ a sa so Zumabuy naŋ ti vunaka?» Yesu a mbiɗa taŋ di: «Buymisemuŋ masa so Zumabuy naŋ na, anta ɓa hã mizli a puraka gu ta. 21Anta sa ɓam: «Nˀanihĩ», malla: «Nˀani a diga» ta. Amma sinaka sin le, Zumabuy ngi Buymisemuŋ, naŋ da a wuzla kumo.»

22Dar a ɓa mizli ngi seˀeheye: «Hin a sa ndilawa, kisa wuɗam pura hin pal a wuzla hin ngi Mangal ngi mburo, amma kum anta sa puraka ta. 23A sa ɓukum: «Puraka, n'ani a diga!» malla: «Nˀanihĩ!» Amma anja ki ram ta, ki kilam nga diga ta. 24Vuŋ mawucuɗ zle asi diˀis, hã asi diˀis vay mekelem na, hin ngi Mangal ngi mbur masa sawa na, a sa gi kanah ya. 25Amma sey a si bonoy seˀ le haɗi ɗagay, mizli migwenehey a sa hizigakaŋ avra. 26Gwat migi zleˀe ti hin ngi Nowe na, a sa gi kanah ti hin ngi Mangal ngi mbur aya. 27Ti hin ngi Nowe, mizli ara zumam, ara sam, ara zuɓam ngwasay, ara vulam ziri ngi hay ziley, hã a ndila hin ngi Nowe mici a hur palalama. Dar mekepel madiɗa a zuɓawa, a ziza mizli leɗeɗ gar. 28Malla ta na, a sa gi kaɓa ti hin ngi Lot. Tapasa, mizli ara zumam, ara sam, ara hiɗikam gwatay, ara hiɗikaka gwat taŋhay avra, ara zligam gwatay, ara ndiram hayay. 29Amma ti Lot mibi tir walahay Sodom na, Buymisemuŋ a po vuŋ ngi vu ati yam ngi baruudu minjulili paɗ ti muŋ, a ziza mizli leɗeɗ gar. 30Tapas Mangal ngi mbur masa bugo vu njah na, a sa gi kanah ya.

31Ti hin nah na, mbur misi a balaka, anja a po sar ngi hila gwat naŋhay a haya mata. Yo mbur misi ar guva kwana, anja a mi ngi hay naŋ mata. 32Wulkaka ɓi ngi ngwas ngi Lot. 33Mbur masa pur jiviɗ ngi laha siifa naŋ na, a sa zizaŋ, amma mbur masa ziza siifa naŋ na, a sa luuma a muŋ. 34Yi ɓukum na: angi duvuɗ nah na, mizli cuw tup tup ar gwat ngi hin purla, a sa zuɓam pal, a pulam pal. 35Ngwasay cuw masa yaˀam ar leˀe, a sa zuɓam pal, a pulam pal. 36Ziley cuw ar guva, a sa zuɓam pal, a pulam pal.» 37Mizli ngi seˀehey a slakaŋ di: «Buy, a sa gi vuna a maka?» A ɓa taŋ: «Ar li misi maara anga na, mogodokoy a sa kusom a diga ya.»

Currently Selected:

Luk 17: BEGDC

Highlight

Copy