Luk 19

Yesu ati Zake

1Yesu mindil a Zeriko na, ara ngira walahaya. 2Mbur ada, a zilaka Zake, i madiɗa ngi micikila buutuhoy, i mbur misi zlili. 3A wuɗ ɓa a pura Yesu, da i waka na. Na, Zake i mbur midegweleˀ haɗi, a puraŋ gu ta, asi zigiduw mihaɗi na. 4A kil nga mbuŋ, a jiɗ ar widis ɓa a sa pura Yesu masa cuh ti kẽh na. 5Yesu mindil ar li nah tuwa na, a zuɓa hiri, a ɓaŋ: «Zake, po sar kutum, anja yi hin dana a hay ɗiki.» 6Zake tuwa a po sar kutum, a tiɓa Yesu ngi hay naŋ ti mumul haɗi. 7Mizli gar mupuraka kanah na, a dirɗakaŋ, a ɓam: «A ra hin a hay mbur migi mungra ma sukwa?» 8Amma Zake a slikiɗ, a ɓa Buy Yesu: «Cin ɗi Buy, yi sa vula zlili ɗu cah da misi murgahay. Da yi tiɓi gwat le avu mbur zleˀe ti wer na, yi sa wurkaŋ di is mufaɗa.» 9Dar Yesu a ɓi: «Lih a so le dana ar hay hana. Asi naŋ kwana, i dideˀ ngi Abraham aya. 10Asi mike na, Mangal ngi mbur a so ngi sipa mizli mizizahay, ɓa a laha taŋ.»

Ɓi ngi suloy ngi ɓiri tapasl tapasl

(Yo pura Mat 25.14-30)

11Mizli muroko cinam mingiɓi hana na, a wulkam kaɓa Zumabuy ngi Buymisemuŋ a wuɗ a njiko vu gweˀ si, asi tapasa, Yesu, naŋ gweˀ avu Zeruzaleme. Vurˀe, Yesu a wa taŋ ɓi ani. 12A ɓi na: «Mbur miyakaŋ ar sukwi ngi buyo, aru nga hirwuy mikileŋ, ɓa ara cakaŋ buy madiɗa a diga, a dirba nah, ɓa a sa mawa a muŋ. 13A zilo gawla kuruˀ a wuzla gawla naŋhaya, dar a wuɗka taŋ suloy ngi ɓiri tapasl tapasl pal pal gar, a ɓa taŋ: «Mbuɗam di haŋ, hã tapas ya misa mo le.» 14Amma mizli ngi hirwuy naŋhay a hirsakaŋ le, a slinam mizli aseˀe ɓa ara ɓam: «Ndr'anta i wuɗam ɓa a zum buy angi ndra ta.»

15A dirba taŋ mucakaŋ ar buyo, a mo nga hirwuy naŋ a muŋ, a zilo gawla naŋhay, naŋ muwuɗka taŋ dala tuwa ɓa a si na yam naŋ, taŋ mulumam anga. 16Joˀ gawla mudumbuŋ a sawa, a ɓaŋ: ‹Buy, suloy ka muvuliy di tuwa, yi lum yam naŋ le anga kuruˀu.› 17Buy a ɓaŋ: ‹Naŋ kuy, gawla mezle. Ki gi slra mikaslsla le ti gwat mineˀkini, zum buy ar walahay kuruˀu.› 18Mucuw naŋ a sawa ya, a ɓaŋ: «Buy, suloy ka muvuliy di na, a siko le anga zlum.» 19Buy a ɓa mbur nah kanah ma: ‹Ka, zum buy ar walahay zlum.› 20Gawla mekelem a sawa, a ɓaŋ: ‹Buy, suloy ɗike n'ani. Yi mbuza mbizeˀ, ɗum ti kecekece. 21Yi zluwun le ti ka, asi ki mbur mihimaˀ. Gwat ka mika ta, ki zuɓa. Ki gi sifi ngi gwat manja ki zligi.› 22Buy a ɓaŋ: ‹Gawla malambaˀ vu! Yi guw kiita ti mingiɓi ɗik tehhe a muŋ. Ki si na le yi mbur mihimaˀ, gwat ya mika ta, yi zuɓa, yi gi sifi ngi gwat ya mizliga ta ma na, 23anja ki pa dala ɗu angi baŋke ta vur mike? Ya mimawa ani na, anja yi hila ti yam naŋ anga takwa?› 24Joˀ buy a ɓa mizli misi akẽh na: ‹Tuɓaka suloy nga naŋ, vulaka da mbur misi suloy kuruˀ tuwa.› 25A ɓakaŋ: ‹Buy, nga naŋ ada kuruˀ si!› 26Buy a mbiɗa taŋ di: ‹Yi ɓukum na: Mbur misi gwat, a sa vulakaŋ ava ma. Yo mbur manja gwata, mineˀ ngi si haŋ naŋ na, a sa tiɓaka ava. 27Amma mesene ɗuwoy mawuɗam ɓa yi cifi buy ar taŋ ta na, soko taŋ nga mbuŋ ɗu aka, slaka ˀay taŋ.›»

Yesu mici nga Zeruzalem

(Yo pura Mat 21.1-11; Mark 11.1-11; Zaŋ 12.12-19)

28A dirba mingiɓi hana na, Yesu a ki ɓaˀ a mbuŋ ɓa aru nga Zeruzalem. 29Ti naŋ mindil ng'ar walahay Betfaze ati Betani, kini ng'avu muwã mazilaka muwã Tutumbur na, a slin mizli ngi seˀehey cuw, 30a ɓa taŋ: «A ram ng'ar walahay ngi mbuŋ kum na. Kum masa cam na, kisa lumam zinga ngi zungu mujuwa le kaˀ, mbur a jiɗ ɗaˀ ara taruŋ. Puskoko di, soko di. 31Da mbur a cufuɗukum le: ‹Ki puskaka ngi gi mike› na, kisa mbiɗakaŋ di: ‹I Buy mawuɗo.›»

32Dar misliney a ram, ara lumaka gwata ka Yesu miɓa taŋ di tuwa. 33Ti taŋ mapuskaka zungu tuwa na, buy ngi zunguhoy a ɓaka taŋ: «Ki puskaka zungu nah ngi gi mike?» 34A mbiɗaka taŋ di: «I Buy mawuɗo.» 35A ram ti zungu tuwa da Yesu, dar a ciyaka zana taŋhay a duba naŋ, a zuɓaka Yesu anga. 36Naŋ mira ru gar na, mizli ara ciyaka zana taŋhay a jiviɗe. 37Taŋ gweˀ avu li pi sar tir muwã Tutumburo si. Mizli ngi seˀehey gar a jam kaw kaw, a zluzluɓam ti mumul haɗi, a zlaka a hunumaka Buymisemuŋ ti ˀay paɗ a muŋ vur cekenehey, taŋ mupuraka taŋ gar, 38a ɓam:

«Anja Buymisemuŋ a ɗuwula mi da buy madiɗa maso ti slimiɗ naŋ na!

Anja muŋ andir ti zuy,

yo anja dadala muŋ a lum dudoko!»

39Farisa mekelemey ngi wuzla zigiduwo, a ɓaka Yesu: «Kumani, ɓa mizli ɗikey na ɓa a taˀaka mi.» 40Amma a mbiɗa taŋ di: «Yi ɓukum na: Da taŋ a taˀaka mi le na, i ɗuguroy masa wudam.»

Yesu mutuwa Zeruzalem

41Yo ti Yesu mindil gweˀ avu Zeruzaleme, naŋ mupura keɗ na, a tuwaŋ. 42A ɓi: «Zeruzalem, ko ki si na jiviɗ ngi luuma zuyo ar hin hanayna ta! Amma kay, i muɗumo le a mihiri ɗike. 43Asi hin ɗik a sa ndilawa, tapasa, mesene ɗikey a sa gunukuw gun ti gwat ngi vurumoy, a sa nguslukuw ti ka ti ka gar. 44Ka ati ziri ɗikeye, a sa zuzukum wãˀ, anta sa pulukuw ɗugur mijirngasl a hirnga cala ta, asi ko ki ki slimiɗ ngi si na hin ngi Buymisemuŋ misawa ɓa a jinuw na mata.»

Yesu ar hay ngi Bumbulvuŋ a Zeruzalem

(Yo pura Mat 21.12-17; Mark 11.15-19; Zaŋ 2.13-22)

45Joˀ Yesu a ci ng'ar hay ngi Bumbulvuŋ a Zeruzaleme, a zla a ɓula migi terereheye ng'avra. 46A ɓa taŋ: «A tohoko na: ‹Hay ɗu, a sa gi i hay ngi dira dibiɗi.› Na kumo, ki tiram di butum ngi mufuyovuhoy mbrike?#19.46 Pura Eza 56.7; Zer 7.11.!»

47Vur hin gar na, Yesu ara dubuna gwat da mizli ar hay ngi Bumbulvuŋ. Masay madiɗahay ati buy ngi ɓimujuwahay waɗ mizli madiɗa ngi Yudehey ara puram jiviɗ ɓa a kiɗakaŋ vagay. 48Amma a sinam wer ngi zizi naŋ ta, asi mizli gar ara jikam slimiɗ ngi cine mingiɓi naŋ.

Currently Selected:

Luk 19: BEGDC

Highlight

Copy