MIGI KIITAHAY 6
6
Mizli Madiyanay magaka bonoy da Israyeleye
1Israyeley, a gam malambaˀ le a mbuŋ Bumbulvuŋ si ma. Joˀ Bumbulvuŋ a vula taŋ asi haŋ ngi mizli Madiyanay hã vi tarnaˀ. 2Madiyanay ara gaka bonoy kuyta wãˀ da Israyeleye. Vurˀe, Israyeley a hinam ar wala muwãhay, ar butumoy malla ar muwã misi li jiɗe tuwaˀ haɗa. 3Yo ma na, Israyeley mizligam gwat le ar guva gar na, mizli madiyanay a soko ati Amalekey waɗ mizli maslikiɗam aka aka misi tisi pas ngi miprike, a soko, a zumaka taŋ. 4A ra pam ti walahay guɗuko a ciki Israyeleye, a zumaka taŋ gwat ngir guvahaya, hãkal kal ar maakway ngi Gaza, ko t'anta pulam gwat ngi ngir ti naŋ neˀ le asi ruwuy Israyele ta, ko tumuŋ, ko sla, malla ko zungu gar si. 5Naŋ kine, a soko ti ginew taŋhay ati guɗuk taŋhay a haŋ. A ndiloko haɗaka jaray. Taŋ ati zlogomo taŋhaya, a slufam ta. A cam ng'asi ruwuyo, ɓa a zumaka gwatay. 6Mizli Madiyanaya, a hĩhĩyaka Israyeleye le wãˀ, joˀ Israyeley a wudam ng'avu Bumbulvuŋ.
7Ti Israyeley mawudam ng'avu Bumbulvuŋ, ɓa a laha taŋ avu Madiyanay tuwa na, 8Bumbulvuŋ a slino taŋ mijiviɗi, a ɓa taŋ na: «Bumbulvuŋ, Buymisemuŋ ngi Israyele, a ɓukum ani: mubo ti kum ti ruwuy Ezipte, tir li ngi beke na, i ya. 9I loho kum le tisi haŋ ngi Eziptehey waɗ tisi haŋ ngi mizli muguzuvur kumoyo gar. I ɓula taŋ le a mbuŋ kumo, yo i vulukum hirwuy taŋ le da kum. 10I ɓukum le: ‹I ya Bumbulvuŋ, Buymisemuŋ kum. Kuli ngi Amorihey, kum misi angi hirwuy taŋ na, ki zluwunam ti taŋ ta!› Amma ko ki cinikiy mi ɗu ta.»
Bumbulvuŋ mizila Zedeyoŋ ngi laha Israyeley
11Modro ngi Bumbulvuŋ, aru ng'ar walahay Ofra, ara cifi asi widis ka miter ngi mbur mazilaka Yoak, muy ngi Abiyezer, naɓa mangal naŋ Zedeyoŋ ara ɗuk daw alkamari ar gwat ngi ɗuco yi ngi gudubun, ɓa a ɗum di avu Madiyanaya. 12Modro ngi Bumbulvuŋ tuwa, a bigaŋ vu, dar a ɓaŋ: «Migi vurum miwirwir, Bumbulvuŋ naŋ da ati ka!» 13Zedeyoŋ a mbiɗaŋ di: «Ambuh takwa kumani ɗu! Da Bumbulvuŋ naŋ da ati ndra na, gwatay migam avu ndra kahana na vur mike? Gwat ngi zuma hirngahay, cine ndrahay muslufam ndra ɓi taŋ na taŋ ama ani ska? A ɓam na: ‹I Bumbulvuŋ mubo ti ndra ti ruwuy Ezipte kini ta kwa?› Na wurenna, Bumbulvuŋ a pula ndra le zlaɗ asi haŋ ngi Madiyanay so.» 14Bumbulvuŋ a mbiɗi hiri ng'avi Zedeyoŋ, a ɓaŋ: «Gidaŋ ka misi ti naŋ na, ara loho di Israyeley avu Madiyanaya! Haˀaw, i ya maslinuw!» 15Amma Zedeyoŋ a mbiɗaŋ di: «Ambuh kumani ɗu! I sa laha Israyeleye mbri mbrike? Sukwi ɗu, muy ɗuwoy ar sukwi ngi Manase i miĩya wãˀ, yo ya kwana, yi zuŋ hiri meciɗek wãˀ a hay baha!» 16Bumbulvuŋ a mbiɗaŋ di: «I sa ndir ati ka, vurˀe, kisa kiɗa Madiyanaya, kaɓa makiɗam mbur purla si.» 17Zedeyoŋ a mbiɗaŋ di: «Da ki puriy le kuy avu hiri ɗike gisiŋ na, inga bigiy di ti gwat neˀ, ɓa i sina, i ka maɓiy takwa. 18Ambuh! Ki cuh t'aruŋ, kutikiy i mo ng'avi ka ɗagay, pas ngi suw ti gwat ngi ɗuvuw di taˀ a mbuŋ ɗike.» Bumbulvuŋ a ɓaŋ: «I ra kutukuw hã ki mawa.»
19Zedeyoŋ ara ji zuŋ ˀaw, a daŋ, waɗ hapa kilo kukur makir, a di di ɗaf manja ˀis ara. A pa useˀ angi gadagar, waɗ mbilewe ar gandaf. Dar a so taŋ cek ng'asi widis madiɗa ka miter tuwa, a bigaŋ taŋ. 20Modro tuwa, a ɓaŋ: «Zuɓa useˀ ati ɗaf, pa taŋ sek ar mandazlay hana, yo pa mbilew ngi useˀe nga hirnga naŋ.» Zedeyoŋ a ga kanah. 21Modro ngi Bumbulvuŋ tuwa, a ska mi ngi ganday mikaw a haŋ naŋ, a wusa useˀ ati ɗaf manja ˀis ara tuwa duk ti naŋ. Vu a bawa, a zuma useˀ ati ɗaf manja ˀis ara tuwa. Akẽh na, modro a susuyum a mihiri naŋ. 22Dar Zedeyoŋ a sla wala nah le muduba so, i modro ngi Bumbulvuŋ, a ɓi: «Aw Bumbulvuŋ, Buymisemuŋ! I pura modro ngi ɗik ka Bumbulvuŋ le hiri taˀ ava!» 23Amma Bumbulvuŋ a mbiɗaŋ di: «Ndir zuy zuy! Ki zluwun ta, k'anta kisa muc ta.»
24Zedeyoŋ a ndir li gi mikuli da Bumbulvuŋ ar li nah vuna, dar a zila li tuwa: «Bumbulvuŋ ngi zuy.» Hã dana aruŋ kwana, li gi mikuli nah, naŋ da a Ofra, walahay ngi muy ngi Abiyezere.
Zedeyoŋ a waha li gi mikuli magaka da Baˀal
25Ngi duvuɗ nah vuna, Bumbulvuŋ a ɓa Zedeyoŋ: «Ja gusoŋ ngi bunuk, gusoŋ ngi vi tarnaˀ, mijingaˀ ngi madiɗa na. Yo waha li gi mikuli ngi bunuk maga da Baˀal na, buko kuli ɓamtal mikaˀ a cikeˀe na avra. 26A dirba nah, kisa ndir li gi mikuli ndar ndar, kuy kuy da Bumbulvuŋ, Buymisemuŋ ɗike, a hirnga li hana. Dar kisa ja gusoŋ, mijingaˀ ngi madiɗa tuwa, kisa gi di mikuli mizlam zlam wãˀ ti dum ngi kuli ɓamtal, ka mubuko tuwa.» 27Zedeyoŋ a hil mizli kuruˀ asi gawla naŋhaya, dar a ga kaɓa Bumbulvuŋ miɓaŋ di tuwa. Amma ɓa ngi ga slra tayna cek ti papas na, a zluwun mizli ngi hay taŋhay ati mizli ngir walahaya, a ga taŋ ngi duvuɗu. 28Mizli ngir walahay mupuɗukam ngi miprik prike, keɗ na, li gi mikuli da Baˀala, i muwaha le, kuli ɓamtal mikaˀ a cikeˀe na, i munguma le. Yo gusoŋ mijingaˀ ngi madiɗa na, a gam di mikuli mizlam zlam le, ar li gi mikuli mindira wureˀ aruŋ na. 29Mizli a cufuɗam vu ar wala taŋ: «Miga gwat hana i waka?» A laka virzi naŋ, cufaɗ cufaɗ ɓi nah na, a ɓam: «I Zedeyoŋ mangal ngi Yoak miga gwat hana.» 30Mizli ngir walahaya, a ɓaka Yoak a na: «Bo ndra ti mangal ɗik na, ɓa i kiɗaka vagay. Asi a waha Baˀala le, yo kuli ɓamtal mikaˀ a cikeˀe na, a buko le.» 31Yoak a, a ɓa mizli mideŋ deŋ ngi cikeˀeheye gar: «Macikam vu a hirnga Baˀala, i kum kwa? Makiloko widi naŋ i kum kwa? Mbur macik vu a hirnga Baˀal na, li a wun di hã ti miprike! Da Baˀal i Buymisemuŋ na, anja naŋ vuna, a cik vu vur hirnga naŋ tihaŋ naŋ, asi Zedeyoŋ muwahaŋ li gi mikuli naŋ na!» 32Tapasa, a zilaka Zedeyoŋ Yerubaˀal, mbiɗeˀvra: «Anja Baˀal a cik vu a hirnga naŋ avu Zedeyoŋ.» Asi Zedeyoŋ muwahaŋ li gi mikuli naŋ na.
Zedeyoŋ a cufuɗa Buymisemuŋ ɓa a zilaŋ mi
33Mizli Madiyanay, Amalekey waɗ mizli maslikiɗam aka aka ngisi pas ngi miprikeye, a ngiɓam ˀay purla, a cikilam cek, a tuwuɗaka mizaw Zurdeŋ, ara pam ti walahay guɗuko ar li micayya ngi Zizreyel. 34ˀUf ngi Bumbulvuŋ a ci avu Zedeyoŋ, mbak pula tulum ngi zilo muy ngi Abiyezereye, ɓa a sipakaŋ. 35Zedeyoŋ a slin mizli ng'asi ruwuy ngi Manase keɗeɗe, joˀ taŋ kwana, a sipakaŋ ma. Yo a slin mizli ng'avu sukwi ngi Aser, ngi Zabuloŋ, waɗ ngi Neftali, ara jam di hirnga.
36Zedeyoŋ a ɓa Buymisemuŋ: «Da ki wuɗ le ɓa ki laha Israyele tisi haŋ ɗu, kaɓa ka miɓa na, 37y'ani i ra njira garak ngi tumuŋ ani ti ngwic a məlaŋ. Da kap ti duvuɗo, wulngar a ji sey i ngwic tew si, hirwuy ngi ciki naŋ haram haram na, naɓa i si na le, ki wuɗ le ɓa i ya malaha Israyeleye, kaɓa ka miɓa vuna.» 38Joˀ a gi kanah gisiŋ. Li naŋ muwuno, Zedeyoŋ a slikiɗi, a ɗuco garaka ti ngwice ɗucco na, wulngar yorororo, zuŋ sikiɗ cererere. 39Zedeyoŋ a ɓa Buymisemuŋ: «Anja ki ji mevel ta, i wuɗ i ɓi sar pal ava ma. Puliy jiviɗ ngi pur gwat sar purla ava ma ti garak misi ngwic na takwa: Anja i ngwic ngi garak pal naŋ mandir haram harama, amma wulngar ẽc ẽc gun ciki naŋ gar ɓula.» 40Ngi duvuɗo, Buymisemuŋ a ga kanah. Ngwic misi avu garaka a ndir haram haram, amma wungar ẽc ẽc gun ciki naŋ.
Currently Selected:
MIGI KIITAHAY 6: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
