MIGI KIITAHAY 5
5
Dimis ngi Debora.
1Tapasa, Debora ati Barak mangal ngi Abinoˀama, a zlaka dimis ani:
2«Angi hirwuy Israyele, da mizli a vulaka vu taŋ le taˀ wãˀ,
da a pulaka vu taŋ le mbak wãˀ ngi mongoy taŋ na,
gaka sise da Bumbulvuŋ.
3Kum buy madiɗahay, cinam, kum buy mimaɗiɗahay jikam slimiɗe!
Yi wuɗ i zli dimis ngi hunuma Bumbulvuŋ.
yi wuɗ i gi muguzlum da Bumbulvuŋ, Buymisemuŋ ngi Israyele.
4Bumbulvuŋ, ti ka mapo sar ti muwã Seˀir,
ti ka maso ti ruwuy Edom na,
hirwuy a jijik, muŋ a po vuŋ,
gazlavay a po yam.
5Muwãhay a cifam virzi a mbuŋ ka Bumbulvuŋ ngi Sinaya,
a mbuŋ ka Bumbulvuŋ, Buymisemuŋ ngi Israyele.
6Ar hin ngi Samgar, mangal ngi Anat,
ar hin ngi Yaˀele, zuɓa mulak hiɗim hiɗime, a kiɗ mi le,
yo mizli mazuɓam mulaka, a ram tir jiviɗ mugun gunoy.
7Mizli anta ar walahayaya mata,
asi ruwuy Israyele, mizli anta mata,
hã sey tapas, ya Debora mubawa,
hã sey tapas ya Debora mubawa, ya mumuŋ ngi Israyeley.
8Mizli Israyeley a wunam kulihey, dambalaka vurum a ndilo taŋ le a duba sar.
Soje durmuk kukur mufaɗ asi ruwuy Israyele,
amma ko mbaray malla ziwit purla tekeɗe anta asi haŋ taŋ ta.
9Mevel ɗu naŋ ar miwi Israyeley,
naŋ ar mizli muvulaka vu taŋ le taˀ wãˀ ngi mongoy taŋ.
Gaka sise da Bumbulvuŋ!
10Kum mizli majiɗam ar madiya zungu babarahay,
kum macifam ar tapihey,
yo kum mizli muzuɓa jiviɗey, wulkam.
11Mijiginey ar li vula yam da gineweye,
ara slufaka ɓi ngi Bumbulvuŋ mulum bugawla,
naŋ mulum bugawla ti gidaŋ naŋ asi ruwuy Israyel.
Akẽh na, mizli ngi Bumbulvuŋhay a pam sar nga mizlingreŋ.
12Debora, puɗuku, puɗuku!
Puɗuku, puɗuku, zuɓa dimis ngaŋ avu mi.
Barak, mangal ngi Abinoˀam, slikiɗi,
mo ti mizli mija ɗikeye.
13Dar mizli mindiram ti siyfa, a jumom ng'avu buyoy,
mizli ngi Bumbulvuŋhay a soko ng'avi ya ti wuzla bugawlahay.
14Bugawla Amalekey a soko ti Efrayim,
Benjamin a sipa taŋ ɓaˀ a dirba ɗike ti soje ɗikey,
miwi sojehey a soko ti Makir,
yo miji ganday ngi buy miwi liheye, a soko ti Zabuloŋ.
15Buy ngir sukwi ngi Isakaraya taŋ ati Debora.
Barak i mbur ngisi Isakar, a ki ɓaˀ aseˀe ar li micaya.
Angi muy ngi Rubeneye, ngilawuy a gi le haɗa.
16Ki cifi ar wala ngi gezleŋhey,
ɓa ki cin tuwuy ngi ginewey vur mike?
A wuzla muy ngi Rubeneye, cufuɗ a gi le haɗa!
17Galaˀat a cifi hã duba Zurdeŋ.
Na, Daŋ, ki cifi ar palalam ngi yamay vur mike?
Aser a ndir a mi mubuliy,
yo a cifi gweˀ avu li pi sar ngi palalam naŋhay.
18mizli ngi Zabuloŋhoy a ndiram mata ngi mucu,
waɗ mizli ngi neftalihey ar li gi vurumo.
19Buyoy a soko, a kiɗam vu,
buy kanaˀanay, a zlaka kiɗa vu,
a Taˀanak, gweˀ a mi yam Megido,
amma ko gwat ngi vurum, ɓiri bara a lumam ta.
20Wurzlaŋhay a kiɗam vu a dadala muŋ a diga,
zle ar hay taŋhay a diga, a kiɗoko Sizera.
21Mizaw Kisoŋ a kil taŋ le leɗeɗ,
Mizaw Kisoŋ, mizaw mivi!
Akum nga mbuŋ ti kiɗa vu!
22Dar sar ngi pilisey a hurmom a ruwuyo,
a kukurom, a kukurom kaɓa pilisey mapam taŋ mi.
23Modro ngi Bumbulvuŋ a ɓi na, nisaka walahay Meroso,
nisaka mizli ngi raˀahaya,
asi a kiloko widi ngi Bumbulvuŋ ta,
a kiloko widi ngi Bumbulvuŋ ati bugawlahaya ta.
24Yaˀel, ngwas ngi Heber, mbur Keni na, anja Bumbulvuŋ a ɗuwuluw mi,
anja a ɗuwuluw mi a wuzla ngwas micifa ngir guɗukoyo gar!
25Sizera a cufuɗ yam na, naŋ a vulaŋ ɗuwa,
a vulaŋ wursla angi sikiɗ ngi buyoy.
26A tila haŋ til ng'avu dum,
a tila haŋ hazumo ng'avu tokom ngi ɓiri ngi migi slrahay,
a kiɗa Sizera, a hirnga kuyop,
a kiɗaŋ, waɗ li tinike mangil hoyoɓ hoyoɓ.
27A diɗ ndirɗaɗ asi sar naŋ, simtiraˀ,
a diɗ ndirɗaɗ asi sar naŋ, simtiraˀ,
li naŋ midiɗ ndirɗaɗ ara na, a muc wãˀ ara.
28Mumuŋ ngi Sizera a puro hiri tir ɓiri munjororo,
hirnga girizlzle tir fenetire, a puro hiri, dar a ɓi:
Mota ngi vurum naŋ a muro kahana vur mike?
Mota ngi vurum naŋhay a soko zãyaˀ zãyaˀ vur mike?
29Ngwas misi sinmijileŋ ngi wuzla cil naŋhay a mbiɗaŋ di:
a maŋ di, a ɓaŋ na:
30‹Ko mbri na, a roko hilam zlili ar vurum, yo a roko ar li wunuk naŋ takwa?
Vur mbur migi vurum gar na, diili mija purla malla cuw takwa?
Zana misi yam wal wal ava waɗ midira le dar dar da Sizera,
zana midirahay le cuw ngi luw asi ˀay ngi diili mijahay le.›
31Bumbulvuŋ, anja mesene ɗikey a ngizlam gar kahana,
amma ngama ɗikeye, anja a ndiram kaɓa pas majiɗo ti jiɗ aruŋ.»
Joˀ hirwuy a ndir setette vi kukur mufaɗa.
Sukwi ngi Benjameŋ a sipataŋ, a jum ng'ar ngay taŋ
Currently Selected:
MIGI KIITAHAY 5: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.