EZEKIYEL 7
7
Bumbulvuŋ mitil mi ti ɓi ngi bonoy ngi kiɗa mi naŋ
1Bumbulvuŋ a ɓiy ani: 2«Ka mburu, cin! Ya Bumbulvuŋ, Buymisemuŋ i ɓa mizli ngi si ruwuy Israyeleye na: A kiɗ mi le. Kiɗa mi ngi gwat ara ndilo asi gazlavay kurzluˀ gar. 3Wurenna i kiɗa mi mindilo avu kum: i sa vunaha ji mevel ɗu ar kum, i sa gukum kiita weˀe avu gwat ngi gi kumoy, yo gi gwat kum mukuyta wãˀ na, i sa pukum ɓi nah nga hirnga kum. 4Ko y'anta sa purukum geˀ ircece ta wãˀ, na zle y'anta sa pur ircece ta si. Asi mike na, gi gwat kumo, i sa pa ɓi nah nga hirnga kum, yo gi gwat kum mukuyta wãˀ na, kisa ndiram di kine. Dar kisa sinaka, yi Bumbulvuŋ.
5Ya Bumbulvuŋ, Buymisemuŋ i ɓi na: «Kay, bonoy mupuram ɗaˀ ta ndiɗaˀ! Kay, bonoy! Nˀani, ara ndilawa. 6Kiɗa mi ngi gwat a ndilo le, kiɗa mi a ndilo le. A wuno mi le ng'ar kum. Nˀani, ara ndilawa. 7Kum mizli ngi si ruwuy Israyel, a ndir ar kum aya, pas ngi bonoy a ndilo le, hin naŋ gweˀe. Ar muwãhaya, i muɗa didak, mbak mumulo le. 8I wuɗ i pa himaˀ ɗu ng'ar kum kutum, wurenna vuna si. Ya miji mevel ar kum na, i ru di hã avu kiɗa mi naŋ. I sa gukum kiita weˀe avu gi gwat kumo, yo gi gwat kum mukuyta wãˀ na, i sa pa ɓi nah nga hirnga kum. 9Y'anta sa purukum geˀ ircece ta, na zle y'anta sa pur ircece ta si. I sa wurkukum weˀe avu gi gwat kumo, yo kisa ndiram ti gi gwat kum mukuyta wãˀ na. Dar kisa sinaka, makiɗukum na, i ya Bumbulvuŋ.
10Hin a ndilo le, n'ani, gwat ngi kiɗa kum a ndilo le, n'ani a jiviɗi. Gi moˀore ara ru nga mbuŋ nga mbuŋ, cin ta muwãˀ naŋ ara sik nga mbuŋ nga mbuŋ. 11Gi himaˀ anta kirih kirah le ta, kaɓa ganday ngi moˀore. Gwat anta sa ndir neˀ le avu kum mata, taˀ kum a sa ndir neˀ le ta, ko buc kum anta sa ndir ta. Anta sa tuwukum mata. 12Pas naŋ a ndila le, hin naŋ a ndir mata. Anja mbur mahiɗik gwata, a mumul ta, anja mbur migi terere a lik ta, asi himaˀ ɗu a slikiɗ le fõh fõh ar zlili ngi si ruwuy gar. 13Mbur migi terere, ko da naŋ da ti siifa kwana, naŋ anta sa luuma gwat ngi terere naŋhaya mata. Ɓi ya mupura masa gi a hirnga zlili ngi si ruwuy gar na, anta pul teˀ mata. Mbur gar a sa ndir ar gi gwat malambaˀ naŋ kine, vurˀe ko mbur masa lum gidaŋ a muŋ anta purla ta. 14Mizli a sa fam tulum, a sa juwam vu, amma ko mbur loŋ masa ru ng'ar vurum anta, asi i slikiɗ himaˀ le ar zlili ngi si ruwuyo gar.
Mbur masa lih avu kiita anta
15Avra, i maslalam masa zuma mizli, a haya, i jiji mozorbono ati may masa ngizla mizli. Mbur misi ar guva, a sa kiɗaka ti maslalam, yo mizli misi ar walahaya, i may ati jiji mozorbono masa ngizla taŋ. 16Mizli mulakay a sa kilam nga muwãhay, taŋ gar kaɓa gonokoy matuwam ar sozo, mbur gar na asi mungra nga naŋ nga naŋ.
17Haŋ taŋhay gar a sa giram wãˀ,
saray a sa gam guluɓ guluɓ.
18A sakam buhu ar deɗe ngi zana,
zluwun a sa jijika taŋ ngbaˀ ngbaˀ.
Mesem a sa kiɗa taŋ gar ɓaˀɓaˀ,
a sa hijaka hirngahaya kuleɗ kuleɗe.
19A sa zliɗaka ɓiri bara taŋhay a jiviɗ madiɗahay,
ɓiri tapasl tapasl taŋhay a sa tiram avu taŋ i gwat ngi zliɗ ar kitikil.
Asi mike na, ar hin ngi Bumbulvuŋ, ko ɓiri bara taŋhay, malla ɓiri tapasl tapasl taŋhay anta laha taŋ ta.
Tˀanta sa mbam ta,
kwacay taŋhay anta sa naham ta.
Asi mike, mungra taŋ a so ti vu ɓiri tapasl tapasl ati ɓiri bara vuna.
20Gwat mezle ngi ɗiyavu taŋ na, a tiram di gwat ngi huhumo vu, a ɗiyam di kuli taŋ malambaˀ, mukuy tahay wãˀ. Vurˀe, i sa tiri di i gwat ngi zliɗ ar kitikil avu taŋ.
21I sa pula mbak asi haŋ ngi mulakay, ɓa a hilakaŋ,
i sa pula da mizli mukuwahay ar deɗe ngi gwat ngi lum taŋ ar vurum.
A sa hiryakaŋ.
22Da a hiryaka zlili ɗu le na,
i sa mbiɗa hiri ɗu avu taŋ.
Mivi vuhoy a sa soko,
a sa hiryakaŋ.
23Ɗiy celelu,
asi hirwuy a nih le ti gi kiita ngi kiɗa hirngahay,
yo walahay a nih le ti gi moˀore.
24I sa so ti sukwi ngi mizli mukuyta wãˀ,
a sa tiɓaka hayaya.
I sa kiɗa mi ngi huhumo vu ngi mizli migidaŋhaya,
yo li taŋ mipal palaya, a sa hiryam.
25Zluwun madiɗa ara ndilawa,
mizli a sa sipam jiviɗ ngi luuma zuy, amma gar ngataraŋ.
26Bonoy madiɗa a sa so asi cala asi cala,
labara malambaˀ asi cala asi cala,
a sa cufuɗam mijiviɗ ngi Buymisemuŋ, ɓa a pura taŋ gwat ti kileŋ,
masay anta sa dubun gwat da mizli mata,
ko mi ngi kuti vu kwana, anta sa bo tivi mizli micawwahaya mata.
27Buy madiɗa a sa ndir ti tuwuy a hiri,
yarma a sa ki ar deɗe ngi zana i lika ɓi,
mizli gar na, haŋ taŋhay a sa jijikam ngbaˀ ngbaˀ.
I sa ga taŋ gwata weˀe avu gwat ngi gi taŋ,
yo i sa ga taŋ kiita weˀe avu kiita taŋ magaka vuna ya,
dar a sa sinaka, yi Bumbulvuŋ.»
Currently Selected:
EZEKIYEL 7: BEGDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.