EZEKIYEL 6
6
Ɓi a hirnga mihuruk huruk a mbuŋ kulihey
1Bumbulvuŋ a ɓiy anihĩ: 2«Ka mburu, ɗuva hiri taˀ ng'ar muwã Israyeleye, guco taŋ mi da mizli ngi digahaya ti mingiɓi ɗu ani. 3Ki sa ɓa taŋ na: Mizli ngir muwã Israyeley, cinaka mingiɓi ngi Bumbulvuŋ, Buymisemuŋ ani. Bumbulvuŋ, Buymisemuŋ a ɓukum, kum mizli ngir muwãhay ati ngir li miɗingir ɗingirey, ngir hurjijiŋ ati ngir sozohoy na: Y'ani i ra ga ɓa vurum a ndilo ar kum, i sa hirya li miɗingir ɗingir kumoy mipal ngi gi mikuliheye. 4A sa hiryaka li gi mikuli kumoyo, a sa wahaka li wura urdi kumoyo, yo i sa ga ɓa mizli a ndilam mumucahay a mbuŋ kuli kumoyo. 5I sa pa vagay ngi Israyeley a mbuŋ kuli taŋhaya, yo i sa zliɗa tesl taŋhaya gun hirnga li gi mikuli taŋhaya. 6Ar li kum mucufam le anga gar na, walahayay a sa ndiram njoŋ njoŋ kine, manja mizli, li miɗingir ɗingir kum ngi gi mikuliheye, a sa hiryam, hã li gi mikuli kumoy a sa hiryam, a puram hiris le, kuli kumoy a sa ngurfom, hiryeˀ hiryeˀe, gwat ngi wura urdi kumoy a sa waham, waɗ gwat kum miɗiyaka taŋ a sa hiryam. 7Mizli a sa ndilam mumucahay kurosso a wuzla kumo, dar kisa sinaka yi Bumbulvuŋ. 8Amma, i sa pul mizli cah a wuzla kumo, ɓa a laham tir vurumo, yo mizli milaha tayna a sa zliɗam hirnga ng'asi ruwuy mulakay. 9Mizli kumoy milaha tayna, ar taŋ misi a wuzla sukwi mijaka taŋ nga ruwuy mulak tuwa na, a sa wulkam keŋ ar ya. Mevel taŋ magi sulome, mimbiɗi hirnga avu ya, waɗ pura hiri taŋ magi sulome ati kulihey na, i sa hirya taŋ. Gwat mahiryi vu ati gi gwat taŋ mukuyta wãˀ tuwa na, a sa puraka vu taŋ kuyta wãˀ vurˀe. 10Dar a sa sinaka yi Bumbulvuŋ, ya maɓi ɓi ngi ga taŋ malambaˀ na, i ngatara ta.»
11Ya Bumbulvuŋ, Buymisemuŋ i ɓi na: «Humbuɗ haŋ, mbuzla sara, ɓi: ‹Kay, a kiɗ mi le muduba!› vur ɓi ngi gi gwat mukuyta wãˀ ngi Israyeley, maslalam masa hina taŋ a ruwuy, may waɗ jiji mitiɓi vu. 12Mbur mikileŋ, i jiji mitiɓi vu masa kiɗaŋ, yo mbur migweˀe, a sa kiɗaka vagay ti maslalam. Mindiramaya, i may masa kiɗa taŋ. Ya mislikiɗ himaˀ fõh fõh ng'ar taŋ na, i sa kiɗa mi naŋ gbaˀa. 13Ti di mizli masa ndilam mumucahay ɓaˀ ɓaˀ a wuzla kuli taŋhay malla ɓaˀ ɓaˀ gun hirnga ngi li gi mikuli taŋhay, ar li miɗingir ɗingir madiɗahay, a hirnga muwãhay gar, asi widis mutukuf tukufoy malla asi widis madiɗa madiɗa hay, ar li taŋ magaka mikuli ngi tisla mevel da kuli taŋhay vuna gar na, kisa sinaka, yi Bumbulvuŋ so. 14I sa zuɓa haŋ i kiɗa taŋ, yo hirwuy taŋ masa cifam anga, ko a maka gar na, i sa tiri di diŋ, zle a wuzlaɓuh mikirɗak kirɗak, sesẽŋ a Ribla. Dar a sa sinaka yi Bumbulvuŋ.»
Currently Selected:
EZEKIYEL 6: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
