EZEKIYEL 8
8
Gi kuli ar hay ngi Buymisemuŋ
1A dirba ji mizli ng'ar beke, hin muzlum naŋ, ngi kiya mimerkeɗ naŋ, ngi vi mimerkeɗ naŋ na, i ro a hay ɗu, waɗ mizli micawwa ngi Zudahay joˀ a mbuŋ ɗu na, Bumbulvuŋ, Buymisemuŋ a jiy kaw. 2I pur hiri, keɗ na, gwat kaɓa mbur. Zle avu li misi kaɓa li juwa gwat ngi duba naŋ, waɗ nga ruwuyo i vu. Yo zle avu li juwa gwat ngi duba naŋ, waɗ nga muŋ kwana, sukwi ngi wucuɗ ngi gwat, kaɓa wucuɗ ngi ɓiri jiriy jiriy. 3A tilo gwat kaɓa haŋ til ng'avi ya, waɗ a jiy kaw avu ngwic ngi hirnga. Akẽh na, ˀUf ngi Bumbulvuŋ a zuɓiy faw nga makapal muŋ, i pur gwat ngi Bumbulvuŋhoy ti kleŋ. Aru ti ya nga Zeruzalem, a mizlingre ngi huroˀo, misi hiri pulaˀ tir vay muŋ, ar li kuli ngi suloŋ, maslikiɗ suloŋ na. 4Dudok ngi Buymisemuŋ ngi Israyel ada angi li nah vuna, a bam vu ati gwat, ya mupura taŋ ar sozo zleˀe tuwa. 5Buymisemuŋ a ɓiy na: «Ka mburu, zuɓa hiri, pur kini tir vay muŋ so.» Yi zuɓa hiri paɗ, keɗ na, gwatay anihĩ: a mizlingre, tir vay muŋ naŋ na, li gi mikuli anga, waɗ kuli ngi suloŋ nah tuwa, naŋ da a jiviɗe. 6A ɓiy ma: «Ka mburu, k'ada pura gwat mizli magaka na ya? Gwat madiɗa mukuy tahay wãˀ, Israyeley magaka taŋ aka, ɓa i kirih kileŋ avu hay ɗu na, k'ada pura ya? Ki sa pur gwat makelem madiɗa mukuy tahay wãˀ vuna ma.»
7Aru ti ya nga mizlingre ngi ci nga wazlaray ngi hay ngi Buymisemuŋ, keɗ na, vigiɗ avu moholo. 8A ɓiy na: «Ka mburu, inga slina moholo.» I slina moholo mbilif na, mifiliw njoŋ ava. 9A ɓiy na: «Ci ɓa ki pura gwat mukuyta wãˀ mamuɗ didak, taŋ magaka aka na.» 10I ci kulaˀ, keɗ na, sukwi ngi gwat mukurmuɗ ti kwacay ati gwat misãmihey, gwat mihiris lihey, waɗ kuli Israyeley gar mutohoko taŋ doh doh avu mohol. 11Mizli micawwa ngi Israyeley kukur tarnaˀ, waɗ Yazaniya, mangal ngi Safaŋ, deŋ a wuzla taŋ. Taŋ gar dedeŋ dedeŋ a mbuŋ kuli tayna, mbur gar ti gojogoɗ ngi zluma urdi avu haŋ avu haŋ, cunju ngi urdi ara ngis sẽwwe nga muŋ tir gojogoɗoy tuwa. 12Buymisemuŋ a ɓiy na: «Ka mburu, mizli micawwa ngi Israyeleye, gwat taŋ magaka angi luvuŋ, mbur gar angi viŋ ngi kuli naŋ na, k'ada pura taŋ ya? Asi a ɓam na: ‹Bumbulvuŋ anta pura ndra gu ta, a muɗ haŋ le avu hirwuyo.›» 13A ɓiy ma: «Gwat madiɗa mekelem mukuy tahay wãˀ, taŋ magaka na, kisa pur aruŋ ma.»
14Aru ti ya a mizlingre ngi ci ngi hay Bumbulvuŋ, misi pulaˀ hiri tir vay muŋ na, keɗ na, ngwasay joˀ a diga, ara tuwam Tamus.#8.14 Tamus i kuli ngi Mezopotamihey. Hinpas migi le gar na, a tuwakaŋ tuweˀ le. 15A ɓiy: «Ka mburu, ki pura le takwa? Gwat madiɗa mekelem mukuy tahay fineˀ hanayna, kisa pur ma.»
16Aru ti ya a wazlaray hur hay ngi Bumbulvuŋ, keɗ a mizlingre ngi ci ngi hay Bumbulvuŋ, ar wala ngi jawleeru ati li gi mikuli na, mizli mizilehey, a gi gwat ngi kukur cuw nga zlum a diga, duba pulaˀ pulaˀ da hay ngi Bumbulvuŋ waɗ hiri pulaˀ pulaˀ ngir tisi si pas ngi miprik, ara huruk hurukam a mbuŋ pas, ng'asi pas ngi mipriki. 17A ɓiy ma: «Ka mburu, ki pura le ya? Gwat mukuyta wãˀ, mizli Zudahay magaka aka na, naŋ pireˀ kwa? A nahaka hirwuyo le ti gi moˀore, ani a zlaka slikiɗikiy mevel le si ma, ara bigaka gidaŋ taŋ ti mevel fõh fõh. 18Ya kwana, yi ga gwat ngi mevel ɗu ya so. Tˀanta sa gikiy ircece geˀ le ta, na zle y'anta pur ircece ta si. A sa hizigoko widi ngirzliŋŋe nga slimiɗ ɗu, amma y'anta sa cine taŋ di ta.»
Currently Selected:
EZEKIYEL 8: BEGDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.