EZEKIYEL 41

1Mbur tuwa a ci ti ya ng'ar viŋ madiɗa. A wa ɓamtalaya, sliprik taŋ: metir merkeɗ tir vay ka, metir merkeɗ tir vay diga.

2Sliprik ngi li ngi ci ngi haya: metir zlum, mivay ngi ciki naŋhay ti ka ti ka gar na: metir cuw ti reta cuw ti reta. A wa jek ngi viŋ: metir kukur cuw, sliprik naŋ: metir kuruˀu. 3A ci kulaˀ nga huroˀo, a wa ɓamtal mikaˀ a miviŋ ngi ci ngi haya: metir pal, mi ngi li ci ngi haya: metir makir. Mivay ngi huroˀ ngi ci ngi haya: metir makir ti reta.

4A wa viŋ meciɗeke mupuɗak ar viŋ madiɗa: giluw naŋ ti ka ti ka gar i misi purla: metir kuruˀ kuruˀu. Joˀ a ɓiy: «Hana i li mipal wãˀ.»

Hayay mujom ng'avi hay madiɗa

5A wa dalam ngi hur hay ngi Bumbulvuŋ: ɓiɓir naŋ metir makir. Hayay mujom ng'avi hay ngi Bumbulvuŋ, gun gun hirnga naŋ na, ɓiɓir ngi dalama: metir cuw. 6Hay mujom ng'avi hay madiɗa tayna a ndiraka taŋ a hirnga cala a hirnga cala, jirngasl jirngasl makir. Hay mijirngasl gar na, viŋhey ara kukur makir. Viŋ tayna a cam le kulaˀa kulaˀa ng'ar dalam ngi mohol mugun gun hay ngi Bumbulvuŋ, amma a cam ng'ar dalam ngi hay ngi Bumbulvuŋ ta ɓula. 7Viŋ tayna, ar jirngisl ngi hay gar na, ara wun pitikayya, gun hirnga ngi hay ngi Bumbulvuŋ. Vurˀe, haya nga muŋ naŋ na, a wun le. Zle avu hay mijirngasl ngi ruwuyo, a jiɗam ng'ar mijirngasl ngi wuzla, a dirba nah na, ng'ar ngi muŋ. 8Si virzi ngi hay ngi Bumbulvuŋ, i pura na, i midirka le gun gun zlar, zle avu viŋ mujumoko ng'ava jom tuwa, gil naŋ metir makir. 9Ɓiɓir vay ngi vra ngi dalam ngi viŋ mujom ti jom na: metir cuw ti reta. Li mupula firndiw kine misi ar wala ngi viŋ mujumoko ng' avu hay ngi Bumbulvuŋ 10ati viŋ mekelemey mugun gun na: metir kuruˀu. 11Li ci ng'ar viŋ mujom ng'avi hay ngi Bumbulvuŋ, taŋ tir li mupula firndiw kine tuwa: purla tir vay muŋ waɗ purla tir vay ruwuy. Sliprik ngi li mupula firndiwe: metir cuw ti reta, gun gun zlar. 12Hay ada puɗak ar wazlaraya, tir vay si pas ngi pastaˀa: sliprik naŋ, metir kukur makir nga zlum. Ɓiɓir ngi dalam ngi hay vuna: metir cuw ti reta, gun gun zlar. Jek naŋ: metir kukur mufaɗ nga zlum. 13Mbur vuna a wa haya, jek naŋ: metir kukur zlum, li mupula firndiw kine, hay ati mohol naŋhaya: metir kukur zlumo ma. 14Sliprik ngi mbuŋ hay ati li mupula firndiw kine tisi pas ngi miprike: metir kukur zlum. 15A wa jek ngi hay misi a mbuŋ li mupula firndiw ti duba hay ngi Bumbulvuŋ, waɗ li ngi cuhoy ti ka ti ka gar na: metir kukur zlum.

Hur hay ngi Bumbulvuŋ

Viŋ madiɗa ngi huroˀo, jawleeru mupuɗak nga wazlaraya, 16li ɗuva sar ngi miviŋheye, fenetirey munjororo ati li cuhoy mugun gun hay mijirngisla makir, mupuɗak ar li ɗuva sar ngi miviŋ na, i miga taŋ ti dum, zle a ruwuyo gun gun zlar, ko fenetirey kwana i misirta taŋ ti dum. 17Miviŋ ngi hay ngi Bumbulvuŋ, zle a muŋ ti vra naŋ, hã ti huroˀo, yo ɓaˀa moholo gun gun ti huroˀo, ti vra gar na, a ɗiyam li le ɗiyeˀ ɗiyeˀ, 18ngi gi wuya ti kerubeŋ ati mihaŋ ngi dibinojehey, mihaŋ ngi babazla geˀ ar wala ngi kerubeŋhey cuwo. Kerubeŋ gar na, mihiri ava cuw. 19Mihiri ngi mbur, pulaˀ hiri ng'avi mihaŋ ngi babazla vay ka, yo mihiri ngi mobor, pulaˀ hiri ng'avi mihaŋ ngi babazla vay diga. A gaka taŋ kanah kanah gun gun hay ngi Bumbulvuŋ zlar. 20A gam kerubeŋhey ati mihaŋ ngi dibinojehey geˀ geˀ avu miviŋ ngi dalam ngi viŋ madiɗa, zle a ruwuy hã a muŋ. 21Dum ngi miviŋ ngi viŋ madiɗa, giluw naŋ ti ka ti ka gar na rak rak.

A mbuŋ li mipal na, gwat a puro kaɓa 22li gi mikuli miɗiya ti dum, gil naŋ, metir pal ti reta, jek naŋ, metir pal. Zlirɗiy naŋhay, sar naŋ ati hur naŋ gar na, i miga taŋ ti dum. Mbur tuwa a ɓiy: «Hana i tabul ngi mbuŋ Bumbulvuŋ.» 23Viŋ madiɗa ati li mipala, miviŋhey avu taŋ cuw. 24Miviŋ tayna, palalam ngi miviŋhey avu taŋ cuw cuw, cuw avu hana cuw avu hana. 25Avi miviŋ ngi viŋ madiɗa na, a gam kerubeŋ ati mihaŋ ngi dibinojehey ceɗ ceɗ avu taŋ, kaɓa migaka taŋ zleˀe avu dalam tuwa ya. A mbuŋ jawleeru vay ngi vra naŋ na, palak ngi dum zuɗukko zlumbaˀ ng'avaŋ. 26jawleeru ati viŋhey mujom ng'avi hay ngi Bumbulvuŋ waɗ palak ngi dum muzuɗukko a mi jawleeru tuwa na, fenetir njororo avu taŋ waɗ wuya ti mihaŋ ngi dibinojehey geˀ geˀ avu taŋ ti ka ti ka gar.

Currently Selected:

EZEKIYEL 41: BEGDC

Highlight

Copy